ຫລາຍອົງການຈັດຕັ້ງມະຫາຊົນຫວຽດນາມຄັດຄ້ານເລື່ອງຈີນນຳຮ້ານເຈາະນຳ້ມັນເຂົ້າເຄື່ອນໄຫວຢ່າງຜິດກົດໝາຍ
(vovworld)- ວັນທີ 10/5, ສະມາຄົມວິທະຍາສາດປະຫວັດສາດຫວຽດນາມ ໄດ້ອອກຖະແຫລງການຄັດຄ້ານຈີນ ນຳຮ້ານເຈາະນຳ້ມັນເຂົ້າເຄື່ອນໄຫວຢ່າງຜິດກົດໝາຍຢູ່ ເຂດອະພິສິດເສດຖະກິດຂອງຫວຽດນາມ, ມີການກະທຳນາບຂູ່ບັນດາກຳລັງປະຕິບັດກົດໝາຍຂອງຫວຽດນາມ, ນາບຂູ່ບັນດາກຳປັ່ນຂອງຫວຽດນາມທີ່ພວມປະຕິບັດຫນ້າທີ່. ສະມາຄົມວິທະຍາສາດປະຫວັດສາດຫວຽດນາມ ຖືວ່າ: ການກະທຳທີ່ອັນຕະລາຍດັ່ງກ່າວຂອງຈີນ ແມ່ນລະເມີດອະທິປະໄຕ ແລະ ຜືນແຜນດິນອັນຄົບຖ້ວນຂອງຫວຽດນາມ, ລ່ວງລະເມີດຢ່າງເປີດແປນເຂົ້າເຂດອະພິສິດເສດຖະກິດຂອງຫວຽດນາມ ຕາມສົນທິສັນຍາ ສປຊ ກ່ຽວກັບທະເລປີ 1982. ການກະທຳຂອງຈີນຍັງສົ່ງຜົນສະທ້ອນເຖິງຄວາມໝັ້ນຄົງ, ຄວາມປອດໄພການເດີນທະເລບົນທະເລຕາເວັນອອກທີ່ກ່ຽວຂ້ອງເຖິງຜົນປະໂຫຍດຂອງບັນດາປະເທດ ອາຊີຕາເວັນອອກສຽງໃຕ້ ແລະ ໂລກ. ສະມາຄົມວິທະຍາສາດປະຫວັດສາດຫວຽດນາມ ເດັດດ່ຽວຮຽກຮ້ອງຝ່າຍຈີນ ຕ້ອງຖອນຮ້ານເຈາະນ້ຳມັນພ້ອມດ້ວຍບັນດາກຳປັ່ນອອກຈາກເຂດທະເລຂຶ້ນກັບອະທິປະໄຕ ແລະ ອຳນາດສານຂອງຫວຽດນາມ ເພື່ອຟື້ນຟູສະພາບສັນຕິພາບ, ສະຖຽນລະພາບ ແລະ ຄວາມປອດໄພການເດີນທະເລບົນທະເລຕາເວັນອອກ.
ກຳປັ່ນຈີນ ບຸກໂຈມຕີ ກຳປັ່ນຂອງຫວຽດນາມ
|
ໃນວັນດຽວກັນ, ສະມາຄົມພຸດທະສາສະຫນາຫວຽດນາມ ກໍ່ຮຽກຮ້ອງຈີນຖອນຮ້ານເຈາະນ້ຳມັນ ອອກຈາກເຂດທະເລຂອງຫວຽດນາມ.
ແລະກໍໃນວັນທີ 10/5, ທ່ານ ຖ້ວນຫືວ, ປະທານສະມາຄົມນັກຂ່າວ ຫວຽດນາມ ໄດ້ສົ່ງຈົດໝາຍເຖິງປະທານສະມາຄົມນັກຂ່າວຈີນ, ໃນນັ້ນ ເດັດດ່ຽວຄັດຄ້ານເລ່ືອງຈີນ ນຳຮ້ານເຈາະນ້ຳມັນເຂົ້າເຄື່ອນໄຫວຢູ່ເຂດທະເລຂອງຫວຽດນາມ. ສະມາຄົມນັກຂ່າວຫວຽດນາມ ຮຽກຮ້ອງໃຫ້ຝ່າຍຈີນ ຈົ່ງຢຸດຕິບັນດາການເຄື່ອນໄຫວຜິດກົດໝາຍຢ່າງທັນທີ່ ແລະ ຖອນຮ້ານເຈາະນ້ຳມັນ ແລະ ກຳປັ່ນທັງໝົດອອກຈາກເຂດທະເລຂອງຫວຽດນາມ, ບໍ່ໃຫ້ເກີດການກະທຳຄ້າຍຄືກັນອີກ.
ໃນວັນດຽວກັນ, ສະມາຄົມທະນາຍຄວາມ ນະຄອນໂຮ່ຈີມີນ ໄດ້ຈັດຕັ້ງງານຊຸມນຸມ ຄັດຄ້ານເລ່ືອງຈີນ ນຳຮ້ານເຈາະນ້ຳມັນເຂົ້າເຄື່ອນໄຫວຢູ່ເຂດອະພິສິດເສດຖະກິດ ແລະ ໄຫລ່ທະວີບ ຂອງຫວຽດນາມ. ເຂົ້າຮ່ວມງານຊຸມນຸມ ມີນັກຮຽນຮູ້, ປັນຍາຊົນ, ສາສະຫນາ, ຊົນເຜົ່າ, ນັກສິລະປິນ, ນັກສຶກສາ, ຊາວຫນຸ່ມນະຄອນ ນັບພັນຄົນ. ທະນາຍຄວາມ ຫງວຽນທ້ວນ ຢືນຢັນວ່າ:
“ເລ່ືອງຈີນ ນຳຮ້ານເຈາະນ້ຳມັນເຂົ້າເຄື່ອນໄຫວຢູ່ເຂດທະເລຂອງຫວຽດນາມ ນັ້ນແມ່ນການລະເມີດຢ່າງເປີດແປນບັນດາຂໍ້ມາດຕາທີ່ໄດ້ກຳນົດລະອຽດ: ປະເທດນີ້ບໍ່ໄດ້ນຳຮ້ານເຈາະນ້ຳມັນຕັ້ງຢູ່ທະເລຂອງປະເທດອື່ນ.”