ຫວຽດນາມ - EU ມານະພະຍາຍາມສຳເລັດການເຈລະຈາ FTA
(ພາບປະກອບ)
(vovworld) - ວັນທີ 13/01, ທີ່ການເຈລະຈາສັນຍາການຄ້າເສລີຫວຽດນາມ - ສະຫະພາບເອີລົບ (FTA) ຄັ້ງທີ 6 ເຊິ່ງໄດ້ໄຂຂຶ້ນຢູ່ນະຄອນຫຼວງ Brussels, ປະເທດແບນຊິກ ຢ່າງເປັນທາງການ ດ້ວຍຈຸດໝາຍສຳເລັດການເຈລະຈາເຊິ່ງການນຳ 2 ຝ່າຍໄດ້ວາງອອກໂດຍໄວ. ຄະນະຜູ້ແທນຫວຽດນາມ ໂດຍຮອງລັດຖະມົນຕີກະຊວງອຸດສາຫະກຳ ການຄ້າ, ຫົວໜ້າຄະນະເຈລະຈາລັດຖະບານກ່ຽວກັບເສດຖະກິດ ແລະ ການຄ້າສາກົນ, ທ່ານ ເຈີນກ໋ວກແຄ໋ງ ນຳໜ້າ. ຫົວໜ້າຄະນະເຈລະຈາຝ່າຍສະຫະພາບເອີລົບ (EU) ໂດຍທ່ານ Mauro Petriccione, ຫົວໜ້້າກົມໃຫຍ່ກົມການຄ້ານຳໜ້າ. ການເຈລະຈາໄດ້ດຳເນີນຕາມຂັ້ນຫົວໜ້າຄະນະ, ຮອງຫົວໜ້າຄະນະ ແລະ 12 ກຸ່ມອື່ນໆ ດ້ວຍເນື້ອໃນຄື ການຄ້າສິນຄ້າ, ການຄ້າການບໍລິການ, ການລົງທຶນ, ຮ່ວມມືດ້ານພາສີ, ຫຼັກການແຫຼ່ງຜະລິດ, ກວດໂລກລະບາດສຳລັບສັດພືດ (SPS)....
ທີ່ວາລະໄຂ, ຫົວໜ້າຄະນະຜູ້ແທນຫວຽດນາມ ແລະ EU ສືບຕໍ່ເນັ້ນໜັກເຖິງຈຸດໝາຍສຳເລັດການເຈລະຈາເຊິ່ງການນຳ 2 ຝ່າຍໄດ້ວາງອອກໂດຍໄວ, ພ້ອມທັງຢືນຢັນຈະຍາດໄດ້ຄວາມຕັດສິນໃຈ ແລະ ແຫຼ່ງກຳລັງເພື່ອປະຕິບັດຈຸດໝາຍດັ່ງກ່າວ. ບົນພື້ນຖານນັ້ນ, ຫົວໜ້າຄະນະເຈລະຈາ 2 ຝ່າຍ ໄດ້ສະເໜີໃຫ້ບັນດາຜູ້ຊ່ຽວຊານຍູ້ແຮງຄວາມຄືບໜ້າໃນການເຈລະຈາ, ມຸ່ງໄປເຖິງສິ້ນສຸດການເຈລະຈາເຕັກນິກສຳລັບບາງເນື້ອໃນເຊິ່ງທັດສະນະຂອງ 2 ຝ່າຍບໍ່ຕ່າງກັນປານໃດ. ສຳລັບເນື້ອໃນອື່ນໆ, ບັນດາກຸ່ມຈະສືບຕໍ່ແລກປ່ຽນເພື່ອແນໃສ່ຮັດແຄບຊ່ອງຫວ່າງໃນບັນດາເນື້ອໃນການເຈລະຈາ.
ໃນຊຸມມື້ຈະມາເຖິງ, ຫົວໜ້າຄະນະເຈລະຈາ 2 ທ່ານ ຈະສືບຕໍ່ເຈລະຈາບັນດາທັດສະນະ, ກຳນົດທິດ ແລະ ຂັ້ນຕອນແກ້ໄຂບັນດາຂົງເຂດທີ່ກ່ຽວຂ້ອງຢ່າງລະອຽດ, ເພື່ອແນໃສ່ຊຸກຍູ້ການເຈລະຈາສຳລັບບັນດາເນື້ອໃນທີ່ໄດ້ວາງອອກ, ສ້າງພື້ນຖານເພື່ອເຮັດໃຫ້ການເຈລະຈາບັນລຸໄດ້ໝາກຜົນເທື່ອລະກ້າວ, ຕອບສະໜອງໄດ້ຄວາມມຸ່ງຫວັງຂອງທັງ 2 ຝ່າຍ. 2 ຝ່າຍກໍ່ຈະປຶກສາຫາລືຂັ້ນຕອນມຸ່ງໄປເຖິງສິ້ນສຸດການເຈລະຈາສັນຍາດັ່ງກ່າວ.