(vovworld) – ວັນທີ 17/7, ຈີນ ມີການກະທຳລວງລ້ຳອະທິປະໄຕຂອງ ຫວຽດນາມ ເມື່ອຈັດຕັ້ງພິທີອອກບັດປະຈຳຕົວ ແລະ ໜັງສືອະນຸຍາດພັກອາໄສ ຄັ້ງທຳອິດໃຫ້ແກ່ປະຊາຊົນຢູ່ອັນທີ່ເອີ້ນວ່າ “ນະຄອນ ຊານຊາ” ເຊິ່ງຄວາມຈິງແມ່ນໝູ່ເກາະ ຮ່ວາງຊາ ຂອງ ຫວຽດນາມ. ທີ່ການປະຊຸມຂ່າວນັດສາມັນຂອງກະຊວງການຕ່າງປະເທດ ຫວຽດນາມ ເມື່ອວັນທີ 18/7, ໂຄສົກກະຊວງການຕ່າງປະເທດ ຫວຽດນາມ ເລແທງຫງີ້ ຊີ້ແຈງວ່າ:
“ຫລັກໝັ້ນຂອງ ຫວຽດນາມ ກ່ຽວກັບອັນທີ່ເອີ້ນວ່າ ນະຄອນ ຊານຊາ ໄດ້ຖືກກ່າວມາຢ່າງຈະແຈ້ງຫຼາຍເທື່ອແລ້ວ. ການກະທຳດັ່ງກ່າວຂອງຝ່າຍ ຈີນ ໄດ້ລະເມີດອະທິປະໄຕຂອງ ຫວຽດນາມ ທີ່ມີຕໍ່ໝູ່ເກາະ 2 ແຫ່ງ ຮ່ວາງຊາ ແລະ ເຈື່ອງຊາ ແລະ ບໍ່ມີຄຸນຄ່າແຕ່ຢ່າງໃດ”
ກ່ອນໜ້ານັ້ນ, ວັນທີ 7/7, ກຳປັ່ນເລກໝາຍ 306 ຂອງ ຈີນ ໄດ້ຂັບໄລກຳປັ່ນຫາປາ 2 ລຳຂອງ ຫວຽດນາມ ຢູ່ເຂດໝູ່ເກາະ ຮ່ວາງຊາ ຂອງ ຫວຽດນາມ, ພ້ອມທັງຂຶ້ນກຳປັ່ນ ຫວຽດນາມ ທຸບຕີຊາວປະມົງ ແລະ ທຳລາຍຊັບສິນຂອງກຳປັ່ນ 2 ລຳດັ່ງກ່າວເມື່ອພວມເຄື່ອນໄຫວຫາປາຢ່າງຖືກຕ້ອງຕາມກົດໝາຍ. ວັນທີ 17/7, ຜູ້ຕາງໜ້າກະຊວງການຕ່າງປະເທດ ຫວຽດນາມ ໄດ້ພົບປະກັບຜູ້ຕາງໜ້າສະຖານທູດ ຈີນ ປະຈຳ ຮ່າໂນ້ຍ ມອບຈົດໝາຍທາງການຄັດຄ້ານການກະທຳດັ່ງກ່າວ ແລະ ທ່ວງໃຫ້ທົດແທນຄວາມເສຍຫາຍໃຫ້ແກ່ຊາວປະມົງ ຫວຽດນາມ. ກ່ຽວຂ້ອງເຖິງເຫດການນີ້, ທ່ານ ເລືອງແທງຫງີ້ ໃຫ້ຮູ້ຕື່ມອີກວ່າ:
“ປະຈຸບັນ, ອົງການທີ່ກ່ຽວຂ້ອງ 2 ປະເທດພວມສືບຕໍ່ຜັນຂະຫຍາຍຂໍ້ຕົກລົງສ້າງສາຍໂທລະສັບດ່ວນກ່ຽວກັບບັນດາກໍລະນີເກີດຂຶ້ນຢ່າງກະທັນຫັນໃນຂອບເຂດການເຄື່ອນໄຫວອາຊີບຫາປາບົນທະເລ. ພວກຂ້າພະເຈົ້າຫວັງວ່າ ເມື່ອສາຍໂທລະສັບດ່ວນນີ້ເຂົ້າສູ່ການເຄື່ອນໄຫວ 2 ຝ່າຍອາດຈະແລກປ່ຽນຂໍ້ມູນຂ່າວສານໂດຍໄວ ແລະ ມີມາດຕະການແກ້ໄຂຢ່າງທັນການ.”
ກໍ່ທີ່ການປະຊຸມຂ່າວນີ້, ທ່ານເລືອງແທງຫງີ້ ໄດ້ປະກາດບາງການເຄື່ອນໄຫວການທູດຂອງ ຫວຽດນາມ ໃນໄລຍະຈະມາເຖິງ, ເປັນໜ້າສົນໃຈທີ່ສຸດນັ້ນແມ່ນການຢ້ຽມຢາມ ອາເມລິກາ ຂອງທ່ານປະທານປະເທດ ເຈືອງເຕີນຊາງ.