ຫວຽດນາມ - ຈີນ ເພີ່ມທະວີການຮ່ວມມື ຮອບດ້ານ
(ທ່ານຫງວຽນທ້ຽນເຍີນ ພົບປະກັບທ່ານ ອີເຈີ້ງເສິ່ງ)
(vovworld) - ໂດຍໄດ້ຮັບຄຳເຊີນຈາກທ່ານ ອີເຈີ້ງເສິ່ງ, ກຳມະການປະຈຳກົມການເມືອງ, ຫົວໜ້າສະພາປຶກສາການເມືອງປະຊາຊົນຈີນ, ທ່ານຫງວຽນທ້ຽນເຍີນ, ກຳມະການກົມການເມືອງ, ປະທານຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ນຳໜ້າຄະນະຜູ້ແທນຂັ້ນສູງຄະນະກຳມະການສູນກາງແນວໂຮມປະເທດຊາດຫວຽດນາມ ຢ້ຽມຢາມສັນຕະວະໄມຕີຈີນ ໃນລະຫວ່າງວັນທີ 21 - 25/02. ຕອນບ່າຍວັນທີ 23/02, ຢູ່ປັກກິງ, ທ່ານ ຫງວຽນທ້ຽນເຍີນ ໄດ້ມີການເຈລະຈາກັບທ່ານ ອີເຈີ້ງເສິ່ງ. ທ່ານ ຫງວຽນທ້ຽນເຍີນ ໃຫ້ຮູ້ວ່າ, ພາຍຫຼັງການຢ້ຽມຢາມຈີນ ຂອງທ່ານປະທານປະເທດເຈືອງເຕີນຊາງ ແລະ ການຢ້ຽມຢາມຫວຽດນາມຂອງທ່ານນາຍົກລັດຖະມົນຕີ ຫຼີເຄີສຽງ ໃນປີ 2013, ການຢ້ຽມຢາມຈີນ ຄັ້ງນີ້ຂອງຄະນະຜູ້ແທນຂັ້ນສູງຄະນະກຳມະການສູນກາງແນວໂຮມປະເທດຊາດຫວຽດນາມ ອີກເທື່ອໜຶ່ງໄດ້ຢັ້ງຢືນນະໂຍບາຍສະເໝີຕົ້ນສະເໝີປາຍຂອງຫວຽດນາມ ແມ່ນປາດຖະໜາຢາກເພີ່ມທະວີການຮ່ວມມືຮອບດ້ານລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດຢ່າງບໍ່ຢຸດຢັ້ງ. ທ່ານ ອີເຈີ້ງເສິ່ງ ກໍ່ສະແດງຄວາມຫວັງວ່າ ສະພາປຶກສາການເມືອງປະຊາຊົນຈີນ ແລະ ຄະນະກຳມະການສູນກາງແນວໂຮມປະເທດຊາດຫວຽດນາມ ສືບຕໍ່ເພີ່ມທະວີການພົບປະແລກປ່ຽນໃນໄລຍະຈະມາເຖິງ, ພິເສດແມ່ນເພີ່ມທະວີບັນດາການຢ້ຽມຢາມຂັ້ນສູງລະຫວ່າງ 2 ຝ່າຍ, ຈັດຕັ້ງກອງປະຊຸມສຳມະນາ, ແບ່ງປັນບົດຮຽນກ່ຽວກັບການຕິດຕາມກວດກາ,
ສິ້ນສຸດການເຈລະຈາ 2 ຝ່າຍໄດ້ລົງນາມໃນສັນຍາຮ່ວມມືລະຫວ່າງຄະນະກຳມະການສູນກາງແນວໂຮມປະເທດຊາດຫວຽດນາມ ແລະ ສະພາປຶກສາການເມືອງປະຊາຊົນຈີນ ໄລຍະ 2014 – 2019.