ຫວຽດນາມ ຕັດສິນໃຈຕ້ານການຟອກເງິນ ແລະ ຕ້ານການອຸປະຖຳໃຫ້ແກ່ການກໍ່ການຮ້າຍ
(vovworld) - ຕອນເຊົ້າວັນທີ 19/11, ກອງປະຊຸມຮູບແບບຕ້ານການຟອກເງິນ ແລະ ຕ້ານການອຸປະຖຳໃຫ້ແກ່ການກໍ່ການຮ້າຍຄັ້ງທີ 15 ຂອງກຸມອາຊີປາຊີຝິກ (APG)ໄດ້ໄຂຂຶ້ນຢູ່ຮ່າໂນ້ຍ. ກ່າວຄວາມເຫັນທີ່ກອງປະຊຸມ, ທ່ານຮອງນາຍົກລັດຖະມົນຕີ Vu Van Ninh ຢືນຢັນວ່າ, ໃນຫຼາຍປີຜ່ານມາ, ປະຊາຄົມໂລກ ໄດ້ມີຄວາມມານະພະຍາຍາມ ພ້ອມກັນຮ່ວມມືດ້ວຍຂໍ້ລິເລີ່ມຫຼາຍຂໍ້ ເພື່ອແນໃສ່ສະກັດກັ້ນການເຄື່ອນໄຫວຟອກເງິນ ແລະ ການອຸປະຖຳໃຫ້ແກ່ການກໍ່ການຮ້າຍ. ຫວຽດນາມ ຕັດສິນໃຈປະຕິບັດຫຼາຍມາດຕະການຢ່າງຄົບຊຸດ; ໃນນັ້ນເອົາໃຈໃສ່ເຖິງການສ້າງ ແລະ ປັບປຸງເອກະສານນິຕິກຳຕາມມາດຖານສາກົນ. ກ່ອນທີ່ຈະເຂົ້າຮ່ວມ APG (5/2007), ຫວຽດນາມໄດ້ມີການຈັດການຟອກເງິນ ແລະ ອຸປະຖຳໃຫ້ແກ່ການກໍ່ການຮ້າຍເຂົ້າໃນກົດໝາຍອາຍາ ແລະ ໄດ້ຮັບການຮັບຮອງເອົາເມື່ອປີ 2009. ເດືອນ 6/2012, ສະພາແຫ່ງຊາດຫວຽດນາມ ໄດ້ປະກາດໃຊ້ກົດໝາຍວ່າດ້ວຍຕ້ານການຟອກເງິນ ແລະ ກົດໝາຍນີ້ຈະເລີ່ມມີຜົນສັກສິດນັບແຕ່ວັນທີ 1/1/2013 ເປັນຕົ້ນໄປ; ຫວຽດນາມ ໄດ້ປັບປຸງຮ່າງກົດໝາຍວ່າດ້ວຍຕ້ານການກໍ່ການຮ້າຍ ແລະ ຄາດວ່າຈະຍື່ນສະເໜີຕໍ່ສະພາແຫ່ງຊາດຮັບຮອງເອົາໃນປີ 2013.