(vovworld) - ຫວຽດນາມ ຖື ລັດເຊຍ ແມ່ນຄູ່ຮ່ວມມືຍຸດທະສາດຢ່າງຮອບດ້ານ, ເປັນມູນເຊື້ອ ແລະ ຍາວນານ, ນີ້ແມ່ນຄຳຢືນຢັນຂອງທ່ານເອກອັກຄະລັດຖະທູດຫວຽດນາມ ປະຈຳສະຫະພັນລັດເຊຍ ຟ້າມຊວນເຊີນ, ທີ່ກອງປະຊຸມສະຫຼຸບວຽກງານປີ 2013 ຂອງສະຖານທູດຫວຽດນາມ ປະຈຳລັດເຊຍ, ໃນວັນທີ 31/12. ທ່ານເອກອັກຄະລັດຖະທູດ ຟ້າມຊວນເຊີນ ເນັ້ນໜັກວ່າ ສະຖານທູດຫວຽດນາມ ປະຈຳລັດເຊຍ ຕ້ອງເພີ່ມທະວີ, ຊຸກຍູ້ການພົວພັນດັ່ງກ່າວຢ່າງບໍ່ຢຸດຢັ້ງ.
ໃນປີ 2014, ໝູ່ພະນັກງານ, ພາລະກອນສະຖານທູດຫວຽດນາມ ປະຈຳລັດເຊຍ ໄດ້ຊາບຊຶມຈິດໃຈຂອງກອງປະຊຸມການທູດຄັ້ງທີ 28 ດ້ວຍຫົວຂໍ້ “ການທູດເປັນເຈົ້າການ, ຕັ້ງໜ້າເຊື່ອມໂຍງເຂົ້າກັບສາກົນ”, ເປັນເຈົ້າການຍົກອອກບັນດາມາດຕະການຍົກສູງການປະຕິບັດວຽກງານຢ່າງມີປະສິດທິຜົນ, ກໍ່ສ້າງໂຄງການເຄື່ອນໄຫວເພື່ອແນໃສ່ປະຕິບັດໜ້າທີ່ການເມືອງຢ່າງມີໄຊ ແລະ ກໍ່ສ້າງສະຖານທູດຫວຽດນາມ ໃຫ້ນັບມື້ນັບມີຄວາມສາມັກຄີ, ໝັ້ນຄົງເຂັ້ມແຂງ, ປະກອບສ່ວນເພີ່ມພູນຄູນສ້າງໃຫ້ສາຍພົວພັນມິດຕະພາບທີ່ເປັນມູນເຊື້ອລະຫວ່າງ ລັດ ແລະ ປະຊາຊົນ 2 ປະເທດຫວຽດນາມ - ລັດເຊຍຢ່າງມີປະສິດທິຜົນກວ່າອີກ.