(vovworld) - ວັນທີ 17/04, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ເປັນປະທານກອງປະຊຸມກ່ຽວກັບເລື່ອງເປັນເຈົ້າພາບ ແລະ ກະກຽມຈັດຕັ້ງ ງານມະຫາກຳກິລາອາຊີ ຄັ້ງທີ 18 (ASIAD 18) ໃນປີ 2019.
ພາຍຫຼັງຮັບຟັງບົດລາຍງານຂອງກະຊວງວັດທະນະທຳ ກິລາ ແລະ ທ່ອງທ່ຽວ, ບົດລາຍງານຂອງຫ້ອງວ່າການລັດຖະບານ ແລະ ຄຳເຫັນຂອງບັນດາຜູ້ແທນເຂົ້າຮ່ວມກອງປະຊຸມ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ສະຫຼຸບເລື່ອງເປັນເຈົ້າພາບ ແລະ ຈັດຕັ້ງບັນດາເຫດການກິລາພາກພື້ນ ແລະ ສາກົນສຳເລັດຜົນ ຈະໄດ້ປະກອບສ່ວນພັດທະນາເສດຖະກິດ, ສັງຄົມ ແລະ ໂຄສະນາຮູບພາບ, ຍົກສູງທີ່ຕັ້ງຂອງປະເທດຊາດ. ແຕ່ວ່າ, ຖ້າການຈັດຕັ້ງບໍ່ຮອບຄອບທີ່ຖ້ວນ, ບໍ່ສຳເລັດ ຈະສົ່ງຜົນສະທ້ອນບໍ່ດີ. ໃນສະພາບຫວຽດນາມ ພວມຮັບຜົນສະທ້ອນຢ່າງໜັກໜ່ວງຈາກວິກິດການການເງິນ ແລະ ການຊຸດໂຊມດ້ານເສດຖະກິດທົ່ວໂລກ, ສະພາບເສດຖະກິດ, ສັງຄົມຂອງປະເທດຍັງປະສົບກັບຄວາມຫຍຸ້ງຍາກຫຼາຍຢ່າງ, ງົບປະມານຂອງລັດ ຍັງສຸມໃສ່ໃຫ້ບຸລິມະສິດແກ່ການລົງທຶນໃຫ້ບັນດາໜ້າທີ່ຮີບດ່ວນ ແລະ ຈຳເປັນ. ສະນັ້ນ, ທ່ານນາຍົກລັດຖະມົນຕີ ໄດ້ມອບໜ້າທີ່ໃຫ້ກະຊວງວັດທະນະທຳກິລາ ແລະ ທ່ອງທ່ຽວ, ສົມທົບກັບກະຊວງການຕ່າງປະເທດ ແລະ ຄະນະກຳມະການປະຊາຊົນນະຄອນຮ່າໂນ້ຍ ເຮັດວຽກກັບສະພາ Olympic ອາຊີ (OCA) ແລະ ບັນດາຄູ່ຮ່ວມມືທີ່ກ່ຽວຂ້ອງຢ່າງຮີບດ່ວນ ເພື່ອມີວິທີຖອນການເລື່ອງເຈົ້າພາບ, ບໍ່ຈັດຕັ້ງ ASIAD 18 ຢູ່ຮ່າໂນ້ຍ ຢ່າງເໝາະສົມ. ຫວຽດນາມ ຈະຂໍເປັນເຈົ້າພາບຈັດຕັ້ງ ASIAD ໃນຈຸດເວລາທີ່ເໝາະສົມ.