ພິທີປະກາດບົດລາຍງານສິ່ງແວດລ້ອມແຫ່ງຊາດປີ 2011
ກ່ຽວກັບຫົວເລື່ອງ “ ທາດເສດເຫຼືອແຂງ ”
(ພາບ : baomoitruong.com)
|
Vovworld- ຕອນບ່າຍວັນທີ 7/8 ຢູ່ຮ່າໂນ້ຍ, ກະຊວງຊັບພະຍາກອນ ແລະ ສິ່ງແວດລ້ອມຫວຽດນາມໄດ້ຈັດພິທີປະກາດບົດລາຍງານສິ່ງແວດລ້ອມແຫ່ງຊາດປີ 2011 ກ່ຽວກັບຫົວເລື່ອງ “ ທາດເສດເຫຼືອແຂງ ”. ບົດລາຍງານໄດ້ສຸມໃສ່ໄຈ້ແຍກບັນດາບັນຫາທີ່ກ່ຽວຂ້ອງເຖິງ ທາດເສດເຫຼືອແຂງຢູ່ຫວຽດນາມ; ບັນດາຈຸດພິເສດໃນການກຳຈັດທາດເສດເຫຼືອແຂງ, ເກີດມີທາດເສດເຫຼືອແຂງຊະນິດໃໝ່, ການເກັບໂຮມ, ຈັດແບ່ງປະເພດ, ການຂົນສົ່ງ ແລະ ນຳໃຊ້ ທາດເສດເຫຼືອແຂງຄືນໃໝ່; ຕີລາຄາສະພາບຕົວຈິງ ແລະ ບັນດາສິ່ງທີ່ຍົງຄົງຄ້າງໃນວຽກງານຄຸ້ມຄອງ; ຈາກນັ້ນນຳສະເໜີວິທີການແກ້ໄຂ, ຄຸ້ມຄອງ ທາດເສດເຫຼືອແຂງໃນຊຸມປີທີ່ຈະມາເຖິງຢ່າງມີປະສິດທິຜົນ. ທ່ານສາດສະດາຈານ, ດຣ Pham Ngoc Dang ສັງກັດຄະນະຮຽບຮຽງ ບົດລາຍງານສິ່ງແວດລ້ອມແຫ່ງຊາດປີ 2011 ໃຫ້ຮູ້ວ່າ :
“ ການປະກາດບົດລາຍງານນີ້ ແມ່ນຢາກໃຫ້ທຸກໆອົງການ, ສ່ວນບຸກຄົນ ລ້ວນແຕ່ຮູ້ຈັກກ່ຽວກັບສະພາບຕົວຈິງຂອງ ທາດເສດເຫຼືອແຂງຢູ່ຫວຽດນາມ, ຈາກນັ້ນ ກໍພ້ອມກັນມີສະຕິເຂົ້າຮ່ວມການຫຼຸດຜ່ອນການປ່ອຍ ທາດເສດເຫຼືອ ແລະ ຈັດແບ່ງປະເພດ ກໍຄືເກັບໂຮມ ທາດເສດເຫຼືອຢ່າງເຖິງຖອງ ເພື່ອກຳຈັດຖືກຕາມເຕັກນິກ ແລະ ຄວາມປອດໄພ ຫຼັກອະນາໄມ. ເພາະວ່າມັນສົ່ງຜົນສະທ້ອນຢ່າງໃຫຍ່ຫຼວງເຖິງລະບົບຊີວະພາບ, ສຸຂະພາບຂອງປະຊາຊົນ ແລະ ນັບທັງການພັດທະນາເສດຖະກິດ ແລະ ການທ່ອງທ່ຽວ”
ບົດລາຍງານສິ່ງແວດລ້ອມແຫ່ງຊາດປີ 2011 ຍັງຍົກອອກບັນດາຂໍ້ສະເໜີແນະຕໍ່ສະພາແຫ່ງຊາດ, ລັດຖະບານໃນການຄົ້ນຄ້ວາ, ດັດປັບບາງຕົວເລກຄາດໝາຍຍຸດທະສາດກ່ຽວກັບ ທາດເສດເຫຼືອແຂງໃຫ້ສອດຄ່ອງກັບເງື່ອນໄຂຢູ່ຫວຽດນາມ.