ຫວຽດນາມ ປະຕິບັດບັນດາສິດທິຂອງປະຊາຊົນຢ່າງຄົບຖ້ວນ
ທ່ານ ຮອງລັດຖະມົນຕີການຕ່າງປະເທດ, ຫົວໜ້າຄະນະຜູ້ແທນຫວຽດນາມ ເລເລືອງມິນ
(ພາບ: ສຳນັກຂ່າວສານຫວຽດນາມ)
(vovworld) - ກ່າວຄຳເຫັນທີ່ວາລະປະຊຸມຂັ້ນສູງສະພາສິດທິມະນຸດ ສະຫະປະຊາຊາດ ຖືກຈັດຂຶ້ນຢູ່ສະວິດ ເມື່ອວັນທີ 29/2, ທ່ານ ເລເລືອງມິນ, ຮອງລັດຖະມົນຕີການຕ່າງປະເທດ, ຫົວໜ້າຄະນະຜູ້ແທນຫວຽດນາມ ຢືນຢັນວ່າ: ຫວຽດນາມ ໃຫ້ຄຳໝັ້ນສັນຍາປະຕິບັດບັນດາສິດທິຂອງປະຊາຊົນຢ່າງຄົບຖ້ວນ. ຕາມທ່ານເລເລືອງມິນ ແລ້ວ, ຫວຽດນາມປະຕິບັດຄຳໝັ້ນສັນຍານີ້ຜ່ານການປະຕິບັດບັນດານະໂບບາຍ ຖືມະນຸດເປັນຈຸດສຸມ ແລະ ເພື່ອຜູ້ທຸກຍາກ, ລົງທຶນເຂົ້າບັນດາຂົງເຂດມີຜົນປະໂຫຍດທີ່ສຸດໃຫ້ແກ່ປະຊາຊົນ. ໃນສະພາບການມີຄວາມຫຍຸ້ງຍາກຫຼາຍຢ່າງຍ້ອນຜົນສະທ້ອນຈາກວິກິດການເສດຖະກິດ - ການເງິນທົ່ວໂລກ. ຫວຽດນາມໄດ້ມານະພະຍາຍາມຮັກສາລະດັບເຕີບໂຕດ້ານເສດຖະກິດແຕ່ລະປີແມ່ນ 6%, ສ້າງພື້ນຖານຢ່າງໝັ້ນຄົງເພື່ອຮັບປະກັນປະຕິບັດບັນດາສິດທີ່ເປັນພື້ນຖານຂອງປະຊາຊົນ. ລັດຖະບານຫວຽດນາມສະຫງວນບຸລິມະສິດສູງໃຫ້ແກ່ການປະຕິຮູບກົດໝາຍ, ການບໍລິຫານ ແລະ ຕຸລາການເພື່ອແນໃສ່ຮັບປະກັນເພີ່ມທະວີສິດທິຂອງປະຊາຊົນທັງໃນກົດໝາຍ ແລະ ຕົວຈິງກ່ວາອີກ, ລວມມີສິດຕິດຕາມກວດກາການປະຕິບັດກົດໝາຍ, ສຳພັດກັບຂໍ້ມູນຂ່າວສານ. ໃນລະດັບພາກພື້ນ, ຫວຽດນາມ ຕັ້ງໜ້າເຂົ້າຮ່ວມພ້ອມກັບບັນດາປະເທດ ອາຊຽນ ຊຸກຍູ້ບັນດາການເຄື່ອນໄຫວຂອງອົງການລະຫວ່າງລັດຖະບານ ອາຊຽນ ກ່ຽວກັບສິດທິມະນຸດ (ຫຼື AICHR).