ຫວຽດນາມ ເຂົ້າຮ່ວມ ງານຕະຫຼາດນັດທ່ອງທ່ຽວ ສາກົນ Brussels 2014
Vietnam Airlines ເຂົ້າຮ່ວມງານຕະຫຼາດນັດທ່ອງທ່ຽວສາກົນ Brussels 2014
(ພາບ: vietnamplus.vn)
(vovworld) - ບໍລິສັດການບິນແຫ່ງຊາດຫວຽດນາມ (Vietnam Airlines) ແມ່ນບໍລິສັດໜຶ່ງດຽວຂອງຫວຽດນາມ ເຂົ້າຮ່ວມງານຕະຫຼາດນັດທ່ອງທ່ຽວສາກົນ Brussels 2014 ໄດ້ຈັດຂຶ້ນຢູ່ນະຄອນຫຼວງແຫ່ງລາຊະອານາຈັກແບນຊິກ ແຕ່ວັນທີ 06 – 10/02.
ທີ່ງານຕະຫຼາດນັດ, Vietnam Airlines ໄດ້ໂຄສະນາກັບແຂກທ່ອງທ່ຽວແບນຊິກ ບັນດາລາຍການທ່ອງທ່ຽວທີ່ດູດດື່ມຄື ທ່ອງທ່ຽວຄົ້ນຫາທຳມະຊາດ, ທ່ອງທ່ຽວທະເລ... ດ້ວຍລາຄາປີ້ຍົນພິເສດ. ທ່ານນາງ ຫງວຽນທິຖຸຍຈາງ, ຜູ້ຕາງໜ້າຂອງ Vietnam Airlines ໃຫ້ຮູ້ວ່າ ໃນຊຸມປີມໍ່ໆມານີ້, ຈຳນວນແຂກທ່ອງທ່ຽວເອີລົບ, ພິເສດແມ່ນແຂກທ່ອງທ່ຽວແບນຊິກ ມາຫວຽດນາມ ດ້ວຍການບໍລິການຂອງ Vietnam Airlines ນັບມື້ນັບເພີ່ມຂຶ້ນ. ແຂກທ່ອງທ່ຽວສ່ວນຫຼານໄປເປັນກຸ່ມ ແລະ ຢ້ຽມຢາມໃນໄລຍະຍາວ. ສະນັ້ນ, Vietnam Airlines ເພີ່ມທະວີການຮ່ວມມືກັບບັນດາບໍລິສັດທ່ອງທ່ຽວເພື່ອຫັນການບໍລິການເປັນຫຼາຍຮູບຫຼາຍແບບ ແລະ ດຶງດູດແຂກທ່ອງທ່ຽວ. ຜູ້ຕາງໜ້າໃຫ້ບໍລິສັດທ່ອງທ່ຽວ Nature Vietnam ມີສາຂາຢູ່ຝລັ່ງ, ທ່ານນາງ Marie Aude Ma ໃຫ້ຂໍ້ສັງເກດວ່າ, ຫວຽດນາມ ແມ່ນປະເທດທີ່ເປີດອົກເປີດໃຈ, ມີທິວທັດທຳມະຊາດສວນງາມ, ຊາວຫວຽດນາມ ມີຄວາມສະໜິດຕິດພັນ, ຮັກແພງແຂກຄົນ. ໂຄງລ່າງໂຮງແຮມຂອງຫວຽດນາມ ໄດ້ຮັບການພັດທະນາຢ່າງແຮງໃນ 10 ປີຜ່ານມາ. ນີ້ແມ່ນຈຸດນັດພົບທີ່ດູດດື່ມສຳລັບແຂກທ່ອງທ່ຽວຝລັ່ງ. ງານຕະຫຼາດນັດທ່ອງທ່ຽວສາກົນ Brussels ໄດ້ຈັດຂຶ້ນໃນເດືອນ 02 ແຕ່ລະປີ ເພື່ອແນະນຳໃຫ້ແຂກທ່ອງທ່ຽວບັນດາຜະລິດຕະພັນທ່ອງທ່ຽວ ແລະ ສະຖານທີ່ທ່ອງທ່ຽວທີ່ດູດດື່ມໃນທົ່ວໂລກ. ງານຕະຫຼາດນັດປີນີ້ມີ 700 ບໍລິສັດທ່ອງທ່ຽວ ແລະ ບໍລິສັດການບິນທີ່ມາຈາກ 4 ທະວີບເຂົ້າຮ່ວມ.