ແຕ່ວັນທີ 27 – 29/2, ຢູ່ບັງກອກ ປະເທດໄທ ໄດ້ດຳເນີນກອງປະຊຸມລັດຖະມົນຕີສະຫະກອນບັນດາປະເທດ ອາຊີ - ປາເຊຟິກ, ດ້ວຍການເຂົ້າຮ່ວມຂອງບັນດາລັດຖະມົນຕີ, ເຈົ້າໜ້າທີ່ຂັ້ນສູງມາຈາກ 20 ປະເທດໃນພາກພື້ນ, ພ້ອມກັບຜູ້ຕາງໜ້າອົງການອາຫານ - ການກະເສດ ສະຫະປະຊາຊາດ ແລະ ບາງອົງການສາກົນອື່ນ. ທ່ານ ຫງວຽນດັງຄວາ, ຮອງລັດຖະມົນຕີກະຊວງກະສິກຳ ແລະ ພັດທະນາຊົນນະບົດຫວຽດນາມນຳໜ້າຄະນະຜູ້ແທນຫວຽດນາມ ໄດ້ເຂົ້າຮ່ວມ ແລະ ກ່າວຄຳເຫັນທີ່ກອງປະຊຸມ, ໃນນັ້ນຊີ້ແຈ້ງກາລະໂອກາດພັດທະນາ, ບັນດາຄວາມຫຍູ້ງຍາກ, ສິ່ງທ້າທາຍ ແລະ ບາງບັນຫາເພື່ອພັດທະນາຮູບແບບສະຫະກອນ, ພ້ອມກັນນັ້ນກໍຢືນຢັນວ່າ: ຫວຽດນາມຈະມານະພະຍາຍາມຮ່ວມມືກັບສະຫະພັນບັນດາສະຫະກອນສາກົນ ແລະ ບັນດາປະເທດ ເພື່ອນຳການເຄື່ອນໄຫວຂອງສະຫະກອນນັບມື້ນັບມີປະສິດທິຜົນ.
ກ່ອນໜ້ານັ້ນ, ກ່າວຄຳເຫັນທີ່ພິທີໄຂກອງປະຊຸມ, ທ່ານນາງ Pauline Green, ປະທານສະຫະພັນສະຫະກອນສາກົນ (ຫຼື ICA) ໄດ້ຄັດສະເໜີການຕີລາຄາຂອງສະຫະປະຊາຊາດໂດຍຖືວ່າ: “ບັນດາສະຫະກອນໄດ້ປະກອບສ່ວນປັບປຸງຊີວິດການເປັນຢູ່ຂອງ 50% ຈຳນວນປະຊາກອນຂອງໂລກ”. ທ່ານນາງ Green ໃຫ້ຮູ້ວ່າ, ເລື່ອງປະກາດປີ 2012 ແມ່ນ “ປີບັນດາສະຫະກອນສາກົນ” ເພື່ອສ້າງໂລກໜຶ່ງດີງາມກ່ວາ, ສະຫະປະຊາຊາດ ໄດ້ກຳນົດບົດບາດສຳຄັນຂອງຮູບແບບສະຫະກອນໃນການຊຸກຍູ້ ແລະ ໜູນຊ່ວຍການພັດທະນາເສດຖະກິດ - ສັງຄົມໃນທົ່ວໂລກໃນປະມານ 180 ປີຜ່ານມາ.