(ພາບປະກອບ/TTXVN)
(vovworld) – ວັນທີ 27/11, ຫວຽດນາມ ພ້ອມກັບ 48 ປະເທດວາງສະແດງຜະລິດຕະພັນພື້ນເມືອງຢູ່ງານຕະຫລາດນັດ ຄິດສະມາດສາກົນ ປຣາຮາ 2016 ຊຶ່ງຈັດຂຶ້ນຢູ່ນະຄອນຫລວງ ປຣາຮາ ແຫ່ງ ສ.ເຊັກໂກ. ງານຕະຫລາດນັດ ດັ່ງກ່າວແມ່ນໜຶ່ງໃນບັນດາການເຄື່ອນໄຫວກຸສົນທີ່ສຳຄັນທີ່ສຸດຢູ່ ສ.ເຊັກໂກ ໂດຍ ສະມາຄົມສາມີ, ພັນລະຍາຂອງນັກການທູດສາກົນທີ່ຈັດຂຶ້ນໃນແຕ່ລະປີ ດ້ວຍການອຸປະຖຳຂອງພັນລະຍາຂອງປະທານາທິບໍດີ ສ.ເຊັກໂກ ແນໃສ່ສ້າງກອງທຶນໜູນຊ່ວຍບັນດາອົງການມະນຸດສະທຳຢູ່ ສ.ເຊັກໂກ. ປີນີ້ບັນດາຮ້ານວາງສະແດງຂອງ ຫວຽດນາມ ທີ່ເຂົ້າຮ່ວມງານຕະຫລາດນັດໄດ້ແນະນຳສິນຄ້າຫລາຍປະເພດຄື: ແພໄໝ, ເຄື່ອງຈັກສານ, ບັນດາຜະລິດຕະພັນສິລະປະຫັດຖະກຳ, ເຂົ້າໜົມໝາກຖົ່ວເຫຼືອງ, ກາເຟ, ຊາ ແລະ ອື່ນໆ. ທ່ານນາງ ຟ້າມງ້ອກເຈີມ ພັນລະຍາຂອງເອກອັກຄະລັດຖະທູດ ຫວຽດນາມ ປະຈຳ ສ.ເຊັກໂກ ໃຫ້ຮູ້ວ່າ:
“ນັບແຕ່ປີ 2000 ເປັນຕົ້ນມາ, ຂະນະທີ່ສະມາຄົມສາມີ, ພັນລະຍາຂອງນັກການທູດສາກົນໄດ້ຈັດຕັ້ງບັນດາການເຄື່ອນໄຫວກຸສົນ ເພື່ອສ້າງກອງທຶນສະໜັບສະໜູນບັນດາຜູ້ດ້ອຍໂອກາດໃນປະຊາຄົມຢູ່ ສ.ເຊັກໂກ, ຫວຽດນາມ ປີໃດກໍ່ໄດ້ເຂົ້າຮ່ວມ. ໃນເວລາມໍ່ໆນານີ້ຄືໃນປີ 2015 ກໍ່ໄດ້ຈັດຕັ້ງງານຕະຫລາດນັດຢ່າງສຳເລັດຜົນ. ປີນີ້ພວກຂ້າພະເຈົ້າຫວັງວ່າ ງານຕະຫລາດນັດຈະຂາຍປີ້, ຂາຍສິນຄ້າ ແລະ ແຜ່ບໍລິຈາກເງິນໄດ້ຢ່າງຫລວງຫລາຍ ເພື່ອສະໜັບສະໜູນການເຄື່ອນໄຫວກຸສົນຢູ່ ສ.ເຊັກໂກ”.