(vovworld) - ໃນຂອບເຂດເວທີປາໄສປະສິດທິຜົນການອຸປະຖຳ, ວັນທີ 19/11, ກະຊວງແຜນການ ແລະ ການລົງທຶນຫວຽດນາມ ໄດ້ຈັດກອງປະຊຸມຂັ້ນສູງກ່ຽວກັບການຜັນຂະຫຍາຍເອກະສານການພົວພັນຄູ່ຮ່ວມມື Busan (BPD) ຢູ່ຫວຽດນາມ. ທີ່ກອງປະຊຸມ, ກະຊວງແຜນການ ແລະ ການລົງທຶນໄດ້ປຶກສາຫາລືຮ່າງເອກະສານສຸດທ້າຍກ່ຽວກັບການພົວພັນຄູ່ຮ່ວມມືຫວຽດນາມ (VPD). ກ່າວຄຳເຫັນໄຂກອງປະຊຸມ, ທ່ານຮອງລັດຖະມົນຕີຜູ້ປະຈຳການກະຊວງແຜນການ ແລະ ການລົງທຶນ Cao Viet Sinh ໃຫ້ຮູ້ວ່າ, ລັດຖະບານຫວຽດນາມ ໃຫ້ຄຳໝັ້ນສັນຍາສ້າງໂຄງປະກອບທະນາຄານ, ການລົງທຶນຂອງລັດ ແລະ ລັດວິສາຫະກິດຄືນໃໝ່ ເພື່ອປົວແປງໝາກຜົນຂອງການພັດທະນາ. ລັດຖະບານຫວຽດນາມ ຈະສຸມໃສ່ເຂົ້າໃນບັນດາຜົນງານທີ່ກ່ຽວຂ້ອງເຖິງ: ການພັດທະນາເສດຖະກິດຢ່າງໝັ້ນຄົງ, ຮັບປະກັນຊີວິດສັງຄົມ ແລະ ສະຫວັດດີການສັງຄົມ; ນຳໃຊ້ແຫຼ່ງຊັບພະຍາກອນທຳມະສາດ, ປົກປັກຮັກສາສິ່ງແວດລ້ອມ, ຫຼຸດຜ່ອນໄພທຳມະຊາດ, ຮັບມືກັບການປ່ຽນແປງສັງຄົມ ແລະ ການເຕີບໂຕຂຽວຢ່າງມີປະສິດທິຜົນ. ທີ່ກອງປະຊຸມ, ບັນດາຜູ້ແທນກໍແບ່ງປັນບົດຮຽນສາກົນຕ່າງໆ ໃນການປະຕິບັດເອກະສານການພົວພັນຄູ່ຮ່ວມມື Busan, ໃນນັ້ນ ສ.ເກົາຫຼີ ຄືດັ່ງແບບຢ່າງທີ່ດີເດັ່ນໃນການປະຕິບັດວຽກງານອຸປະຖຳຢ່າງມີປະສິດທິຜົນ.
ຮ່າງ VPD ເພື່ອແນໃສ່ຫັນບັນດາຂໍ້ຕົກລົງທີ່ບັນລຸໄດ້ທີ່ເວທີປາໄສຂັ້ນສູງຄັ້ງທີ 4 ກ່ຽວກັບປະສິດທິຜົນການອຸປະຖຳຢູ່ Busan ຢ່າງລະອຽດ. ຕາມຮ່າງເອກະສານແລ້ວ, VPD ຈະປະຕິບັດໃນໄລຍະ 2012 – 2015. VPD ຈະໄດ້ຍືນສະເໜີເພື່ອຮັບຮອງເອົາຢູ່ກອງປະຊຸມປະຈຳປີກຸ່ມທີປຶກສາບັນດານັກອຸປະຖຳ (CG) ໃຫ້ແກ່ຫວຽດນາມ ເຊິ່ງຈະຈັດຂຶ້ນຢູ່ຮ່າໂນ້ຍໃນວັນທີ 10/12.