ຫວຽດນາມ ເຫັນດີເຫັນພ້ອມຕໍ່ການສ້າງການເຈລະຈາ ແລະ ລັດຖະສະພາເອີຣົບ
(VOVWORLD) - ໃນຂອບເຂດກອງປະຊຸມສະມັດຊາລັດຖະສະພາລະຫວ່າງຊາດ ອາຊຽນ ຄັ້ງທີ 42 (AIPA 42) ຖືກດຳເນີນຕາມແບບທາງໄກ, ຕອນເຊົ້າວັນທີ 25 ສິງຫາ, ຄະນະກຳມະການ ການຈັດຕັ້ງ ໄດ້ປະຊຸມ ແລະ ພິຈາລະນາຮ່າງມະຕິສຳຄັນຫຼາຍສະບັບ. ຄະນະຜູ້ແທນ ຫວຽດນາມ ໂດຍທ່ານນາງ ເລທູຮ່າ, ກຳມະການຜູ້ປະຈຳການກຳມາທິການການຕ່າງປະເທດຂອງ ສະພາແຫ່ງຊາດ ໄດ້ນຳພາຄະນະເຂົ້າຮ່ວມກອງປະຊຸມ.
 ຄະນະຜູ້ແທນ ຫວຽດນາມ ເຂົ້າຮ່ວມກອງປະຊຸມ (ພາບ: quochoi.vn) |
ໃນກອງປະຊຸມ, ສະພາແຫ່ງຊາດ, ລັດຖະສະພາບັນດາປະເທດ ໄດ້ປຶກສາຫາລືກ່ຽວກັບບົດລາຍງານການເງິນ, ແຜນງົບປະມານຂອງຄະນະເລຂາ AIPA; ມຸ່ງໄປເຖິງການຈັດຕັ້ງການເຈລະຈາ AIPA – ASEAN ແລະ ເພີ່ມຈໍານວນປະເທດສັງເກດການຂອງ AIPA. ກ່ຽວກັບການແນະນໍາ ແລະ ຂັ້ນຕອນການເຈລະຈາ AIPA – ASEAN, ຫວຽດນາມ ເຫັນດີຊຸກຍູ້ການພົວພັນຮ່ວມມື, ຄູ່ຮ່ວມມືລະຫວ່າງ ອາຊຽນ ແລະ AIPA, ພ້ອມດຽວກັນນັ້ນ, ຄວນຄົ້ນຄວ້າ ແລະ ປຶກສາຫາລືຫຼາຍກວ່າອີກເພື່ອຊອກຫາກົນໄກແລກປ່ຽນຂໍ້ມູນຂ່າວສານ ແລະ ການສົມທົບລະຫວ່າງ AIPA ກັບ ASEAN. ຜູ້ຕາງໜ້າຄະນະຜູ້ແທນ ຫວຽດນາມ, ທ່ານນາງ ເລທູຮ່າ ກໍຖືວ່າ ຄວນປ່ຽນຊື່ຂອງກົນໄກນີ້, ບໍ່ເອີ້ນວ່າ “ເຈລະຈາ” ອາຊຽນ ແລະ AIPA. ທ່ານນາງກ່າວວ່າ:
“ຄວນຄົ້ນຄວ້າ ແລະ ປຶກສາຫາລືເພື່ອຊອກຫາກົນໄກແລກປ່ຽນຂໍ້ມູນຂ່າວສານ ແລະ ການສົມທົບກັນລະຫວ່າງ AIPA ກັບ ASEAN, ທາບທາມບົດຮຽນປະສົມການຂອງ ສະຫະພັນ ລັດຖະສະພາສາກົນ (IPU) ຈັດຕັ້ງວາລະປະຊຸມອະພິປາຍ IPU. ອາດເອີ້ນກົນໄກນີ້ວ່າ ກອງປະຊຸມອະພິປາຍ AIPA – ASEAN. ໃນວາລະປະຊຸມອະພິປາຍນີ້, ຜູ້ຕາງໜ້າຂອງຄະນະເລຂາ ອາຊຽນ ຈະລາຍງານຕໍ່ບັນດາສະມາຊິກລັດຖະສະພາ AIPA ກ່ຽວກັບການເຄື່ອນໄຫວຂອງ ອາຊຽນ ແລະ ຮັບຟັງບັນດາຂໍ້ສະເໜີຂອງບັນດາສະມາຊິກລັດຖະສະພາ AIPA.”
ກໍໃນວາລະເຮັດວຽກດັ່ງກ່າວ, ລັດຖະສະພາບັນດາປະເທດສະມາຊິກ ຕ່າງກໍເຫັນດີສ້າງການເຈລະຈາ AIPA – EP (ລັດຖະສະພາເອີຣົບ). ນອກຈາກນັ້ນ, ຄະນະເລຂາ AIPA ກໍສະເໜີວັນເວລາ ແລະ ສະຖານທີ່ຈັດຕັ້ງ AIPA 43. ຕາມນັ້ນແລ້ວ, ກອງປະຊຸມສະມັດຊາໃຫຍ່ AIPA 43 ຈະຖືກຈັດຂຶ້ນຢູ່ ກຳປູເຈຍ ໃນປີ 2022.