ຫວຽດນາມ - ແດນມາກ ເພີ່ມທະວີການຮ່ວມມື
ການເຈລະຈາລະຫວ່າງນາຍົກລັດຖະມົນຕີສອງທ່ານ
(ພາບ:thutuong.chinhphu.vn)
(vovworld) - ຕອນເຊົ້າວັນທີ 8/11, ຢູ່ຮ່າໂນ້ຍ, ໄດ້ດຳເນີນພິທີຕ້ອນຮັບທ່ານນາງນາຍົກລັດຖະມົນຕີແດນມາກ Helle Thorning Schmidt ເດີນທາງມາຢ້ຽມຢາມຫວຽດນາມ ຢ່າງເປັນທາງການ, ຕາມຄຳເຊີນຂອງທ່ານນາຍົກລັດຖະມົນຕີຫວຽດນາມ Nguyen Tan Dung. ທີ່ການເຈລະຈາຫຼັງພິທີຕ້ອນຮັບ, ສອງຝ່າຍໄດ້ເຫັນດີເປັນເອກະສັນຈະໃຫ້ບຸລິມະສິດຜັນຂະຫຍາຍການພົວພັນຄູ່ຮ່ວມມືຍຸດທະສາດໃນບັນດາຂົງເຂດການປ່ຽນແປງຂອງດິນຟ້າອາກາດ, ສິ່ງແວດລ້ອມ, ພະລັງງານ ແລະ ການເຕີບໂຕຂຽວລະຫວ່າງສອງປະເທດຢ່າງແຂງແຮງ, ສຸມໃສ່ຊຸກຍູ້ການຮ່ວມມືດ້ານເສດຖະກິດ, ການຄ້າ, ສົ່ງເສີມບັນດາວິສາຫະກິດແດນມາກ ລົງທຶນເຂົ້າຫວຽດນາມ. ທ່ານນາຍົກລັດຖະມົນຕີຫວຽດນາມ Nguyen Tan Dung ສະເໜີໃຫ້ແດນມາກ ຈົ່ງສືບຕໍ່ສະໜັບສະໜູນຫວຽດນາມ ເພີ່ມທະວີການພົວພັນຮອບດ້ານກັບສະຫະພາບເອີລົບ (EU) ແລະ ຢືນຢັນວ່າຫວຽດນາມ ຈະຊຸກຍູ້ການພົວພັນລະຫວ່າງ ASEAN-EU ເວົ້າລວມ ແລະ ASEAN ກັບແດນມາກ ເວົ້າສະເພາະ. ພາຍຫຼັງການເຈລະຈາ, ນາຍົກລັດຖະມົນຕີສອງທ່ານໄດ້ເປັນສັກຂີພິຍານພິທີລົງນາມຂໍ້ຕົກລົງການຮ່ວມມືຈຳນວນໜຶ່ງໃນບັນດາຂົງເຂດການປະຕິຮູບວິສາຫະກິດ, ພະລັງງານ, ນ້ຳມັນອາຍແກດ.
ໃນຕອນບ່າຍຂອງວັນທີ 8/11, ທີ່ສຳນັກງານປະທານປະເທດ, ທ່ານປະເທດປະເທດຫວຽດນາມ Truong Tan Sang ໄດ້ໃຫ້ການຕ້ອນຮັບທ່ານນາງນາຍົກລັດຖະມົນຕີແດນມາກ Helle Thorning Schmidt . ນະທີ່ນີ້, ທ່ານປະເທດປະເທດຫວຽດນາມ Truong Tan Sang ໄດ້ຢືນຢັນວ່າການຊ່ວຍເຫຼືອທຶນ ODA ຂອງລັດຖະບານແດນມາກ ພວມຖືກຂະຫຍາຍຢ່າງມີປະສິດທິຜົນທີ່ສຸດຢູ່ຫວຽດນາມ, ຄຽງຄູ່ກັນນັ້ນການພົວພັນດ້ານເສດຖະກິດການຄ້າລະຫວ່າງສອງປະເທດກໍ່ໄດ້ມີບາດກ້າວພັດທະນາຢ່າງດີງາມ. ທ່ານປະເທດປະເທດຫວຽດນາມ Truong Tan Sang ໄດ້ເນັ້ນຫນັກວ່າ, ຍາມໃດຫວຽດນາມ ກໍ່ຖືການພົວພັນຮ່ວມມືກັບແດນມາກເປັນສຳຄັນ ແລະ ຈະເຮັດຈົນສຸດຄວາມສາມາດຂອງຕົນ ເພື່ອແນໃສ່ຊຸກຍູ້ການພົວພັນອັນດີງາມລະຫວ່າງສອງປະເທດ. ສ່ວນທ່ານນາງນາຍົກລັດຖະມົນຕີແດນມາກ Helle Thorning Schmidt ກໍ່ໄດ້ຢືນຢັນວ່າ ແດນມາກ ຈະສືບຕໍ່ເປີດກ້ວາງການຮ່ວມມືກັບຫວຽດນາມ ໃນບັນດາຂົງເຂດທີ່ແດນມາກ ມີທ່າແຮງຄື: ພະລັງງານ, ຕ້ານການປ່ຽນແປງຂອງດິນຟ້າອາກາດ, ລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ….