ລັດຖະມົນຕີກະຊວງແຜນການ ແລະ ການລົງທຶນ ແດນມາກ ເປັນສັກຂີພິຍານພິທີລົງນາມ
(ພາບປະກອບ)
(vovworld) - ກອງປະຊຸມສຳມະນາ “ການຮ່ວມມື ຫວຽດນາມ - ແດນມາກ ໃນຂົງເຂດກຳຈັດສິ່ງເສດເຫຼືອ ແລະ ຜະລິດພະລັງງານຄືນໃໝ່” ຖືກຈັດຂຶ້ນໃນຕອນເຊົ້າວັນທີ 7/3 ຢູ່ ຮ່າໂນ້ຍ ໂດຍມີການເຂົ້າຮ່ວມຂອງທ່ານນາງ ລັດຖະມົນຕີກະຊວງການຄ້າ ແລະ ການລົງທຶນ ແດນມາກ Pia Olsen Dyhr, ເນື່ອງໃນໂອກາດທີ່ທ່ານນາງພວມຢ້ຽມຢາມ ແລະ ເຮັດວຽກຢູ່ ຫວຽດນາມ, ທ່ານຮອງລັດຖະມົນຕີກະຊວງກໍ່ສ້າງ ຫວຽດນາມ ກາວລ້າຍກວາງ ແລະ ວິສາຫະກິດ ແດນມາກ, ຫວຽດນາມ ຫຼາຍແຫ່ງທີ່ເຄື່ອນໄຫວໃນຂົງເຂດນີ້.
ກ່າວຄຳເຫັນທີ່ກອງປະຊຸມສຳມະນາ, ທ່ານຮອງລັດຖະມົນຕີກະຊວງກໍ່ສ້າງ ຫວຽດນາມ ກາວລ້າຍກວາງ ໃຫ້ຮູ້ວ່າ: ຕາມການສະຖິຕິຂອງກະຊວງຊັບພະຍາກອນ ແລະ ສິ່ງແວດລ້ອມ ຫວຽດນາມ ແລ້ວ, ປະລິມານສິ່ງເສດເຫຼືອໃນການດຳລົງຊີວິດ ຢູ່ ຫວຽດນາມ ແມ່ນປະມານ 17 ລ້ານໂຕນ/ ປີ. ເຖິງວ່າລັດຖະບານ ຫວຽດນາມ ໄດ້ກໍ່ສ້າງກອບກົດໝາຍ, ລົງທຶນຢ່າງແຮງໃຫ້ແກ່ຂົງເຂດກຳຈັດສິ່ງເສດເຫຼືອ ແລະ ຜະລິດພະລັງງານຄືນໃໝ່, ແຕ່ໂດຍແມ່ນປະເທດພວມພັດທະນາ, ຫວຽດນາມ ຕ້ອງການແຫຼ່ງເງິນໜູນຊ່ວຍ, ລົງທຶນຈາກພາຍນອກຫຼາຍ, ພິເສດແມ່ນບັນດາບົດຮຽນ, ຄວາມຮູ້ ແລະ ເຕັກໂນໂລຢີ ຈາກ ແດນມາດ. ທີ່ກອງປະຊຸມສຳມະນາ, ທ່ານນາງ ລັດຖະມົນຕີກະຊວງການຄ້າ ແລະ ການລົງທຶນ ແດນມາກ Pia Olsen Dyhr ຮຽກຮ້ອງໃຫ້ບັນດານັກລົງທຶນ ແດນມາກ ເອົາໃຈໃສ່ລົງທຶນເຂົ້າຂົງເຂດນີ້ກ່ວາອີກ, ປະກອບສ່ວນຫັນການພົວພັນຮ່ວມມືຍຸດທະສາດ ຫວຽດນາມ - ແດນມາກ ເປັນລະອຽດ. ທ່ານນາງໄດ້ກ່າວວ່າ:
“ມື້ນີ້, ມີວິສາຫະກິດແດນມາກ ຫຼາຍແຫ່ງ ທີ່ເຄື່ອນໄຫວໃນຂົງເຂດນີ້ ໄດ້ມີໜ້າຢູ່ທີ່ນີ້ ເພື່ອຊອກຫາຄູ່ຮ່ວມມື ຫວຽດນາມ. ການມອບສົ່ງເຕັກໂນໂລຢີຄວບຄຸມສິ່ງເສດເຫຼືອ ໃຫ້ແກ່ ຫວຽດນາມ ໄປຄຽງຄູ່ກັບຍຸດທະສາດເຕີບໂຕຂຽວຂອງລັດຖະບານ ແດນມາກທີ່ມີຕໍ່ ຫວຽດນາມ. ຂ້າພະເຈົ້າເຊື່ອໝັ້ນຢ່າງແນ່ວແນວ່າ: ການພັດທະນານີ້ ບໍ່ພຽງແຕ່ຊ່ວຍໃຫ້ພວກເຮົາແກ້ໄຂບັນດາສິ່ງເສດເຫຼືອໃນປະຈຸບັນ ຢູ່ ຫວຽດນາມ ເທົ່ານັ້ນ ຫາກຍັງຊ່ວຍໃຫ້ພວກເຮົາຮັບມືກັບບັນຫາແຫຼ່ງຊັບພະຍາກອນໃນໂລກພວມບົກແຫ້ງໄປອີກດ້ວຍ, ແລະຜ່ານນັ້ນຈະນຳມາເຊິ່ງການເຕີບໂຕຢ່າງໝັ້ນຄົງຢູ່ທັງ 2 ປະເທດ ແດນມາກ ແລະ ຫວຽດນາມ”