(vovworld) – ໂດຍສືບຕໍ່ການຢ້ຽມຢາມ ແລະ ເຮັດວຽກຢູ່ ລາຊະອານາຈັກ ກຳປູເຈຍ, ວັນທີ 15/8, ທ່ານຮອງນາຍົກລັດຖະມົນຕີຫວຽດນາມ Nguyen Xuan Phuc, ປະທານຄະນະກຳມະການແຫ່ງຊາດກ່ຽວກັບການປາບປາມຢາເສບຕິດ, AIDS ແລະ ໂສເພນີຫວຽດນາມ ໄດ້ມີການເຈລະຈາກັບທ່ານຮອງນາຍົກລັດຖະມົນຕີ Ke Kim Yan, ປະທານອົງການແຫ່ງຊາດປາບປາມຢາເສບຕິດ ກຳປູເຈຍ. 2 ຝ່າຍໄດ້ເຫັນດີເປັນເອກະພາບເພີ່ມທະວີການແລກປ່ຽນຂໍ້ມູນຂ່າວສານປ້ອງກັນ, ຕ້ານການຄ້າຂາຍຢາເສບຕິດ, ໃນສະພາບການອາດຊະຍາກຳຢາເສບຕິດນັບມື້ນັບເລັ່ງໃສ່ ກຳປູເຈຍ ດັ່ງສະຖານທີ່ສົ່ງຕໍ່ຢາເສບຕິດໃນພາກພື້ນ. ຫວຽດນາມ ໃຫ້ຄຳໝັ້ນສັນຍາຊ່ວຍ ກຳປູເຈຍ ບຳລຸງສ້າງຖັນແຖວທ່ານໝໍ, ພະນັກງານການແພດ ທີ່ເຮັດວຽກໃນບັນດາສູນບຳບັດຜູ້ເສບຢາເສບຕິດໃນວົງຄະນະຍາດ. ທ່ານຮອງນາຍົກລັດຖະມົນຕີ ກຳປູເຈຍ ຕີລາຄາສູງການຮ່ວມມືລະຫວ່າງ ກຳປູເຈຍ ແລະ ຫວຽດນາມ ໃນບັ້ນຮົບປາບປາມຢາເສບຕິດຢ່າງມີປະສິດທິຜົນ.
“ການປາບປາມຢາເສບຕິດແມ່ນຄວາມຮັບຜິດຊອບຂອງແຕ່ລະປະເທດ. ພິເສດແມ່ນບັນດາປະເທດ ອາຊຽນ ພວມມຸ້ງໄປເຖິງຈຸດໝາຍລົບລ້າງຢາເສບຕິດຢ່າງສົມບູນໃນປີ 2015. ບັນດາປະເທດສະມາຊິກລ້ວນແຕ່ຕ້ອງມານະພະຍາຍາມປະຕິບັດວຽກງານປາບປາມຢາເສບຕິດ. ກຳປູເຈຍ ແລະ ຫວຽດນາມ ແມ່ນ 2 ປະເທດບ້ານໃກ້ເຮືອນຄຽງມີເສັ້ນຊາຍແດນຮ່ວມ ດັ່ງນັ້ນການຮ່ວມມືປາບປາມຢາເສບຕິດຕ້ອງໄດ້ຖືເປັນສຳຄັນ.”
ທີ່ການເຈລະຈາ, 2 ຝ່າຍກໍຢືນຢັນຄວາມຈຳເປັນຂອງເລື່ອງຈັດຕັ້ງບັນດາກອງປະຊຸມປາບປາມຢາເສບຕິດລະຫວ່າງ 3 ປະເທດ ກຳປູເຈຍ, ຫວຽດນາມ ແລະ ລາວ.