ພາບປະກອບ
|
(vovworld) - ໂດຍຮັບຄຳເຊີນຂອງທ່ານລັດຖະມົນຕີວ່າການກະຊວງຕຳຫຼວດຫວຽດນາມ, ພົນເອກ ເຈິ່ນດ້າຍກວາງ, ທ່ານລັດຖະມົນຕີວ່າການກະຊວງຕຳຫຼວດຈີນ ກົວເຊິງຄວັນ ໄດ້ນຳໜ້າຄະນະຜູ້ແທນຂັ້ນສູງກະຊວງຕຳຫຼວດຈີນມາຢ້ຽມຢາມ ແລະ ເຮັດວຽກຢູ່ຫວຽດນາມ ໃນລະຫວ່າງວັນທີ 16-17/4.
ທີ່ການເຈລະຈາໃນຕອນບ່າຍວັນທີ 16/4 ລະຫວ່າງຄະນະຜູ້ແທນຂັ້ນສູງກະຊວງຕຳຫຼວດສອງປະເທດ, ທ່ານລັດຖະມົນຕີວ່າການກະຊວງຕຳຫຼວດຫວຽດນາມ ເຈິ່ນດ້າຍກວາງ ຢືນຢັນວ່າ, ການຢ້ຽມຢາມນີ້ແມ່ນຂີດໝາຍສຳຄັນໃນການພົວພັນຮ່ວມມືລະຫວ່າງສອງກະຊວງ, ສະແດງໃຫ້ເຫັນຈິດໃຈຕັ້ງໜ້າ, ຮີບເຮັ່ງໃນການຈັດຕັ້ງປະຕິບັດການຊີ້ນຳຂອງການນຳຂັ້ນສູງສອງປະເທດ. ໂດຍອີງໃສ່ບັນດາຜົນງານລະຫວ່າງສອງຝ່າຍໃນໄລຍະຜ່ານມາ, ທ່ານລັດຖະມົນຕີວ່າການ ເຈິ່ນດ້າຍກວາງ ແລະ ຄູ່ຕຳແໜ່ງຈີນ ກົວຊິງຄວັນ ໄດ້ລົງນາມໃນແຜນການປະຕິບັດບົດບັນທຶກຊ່ວຍຈຳກອງປະຊຸມຂັ້ນລັດຖະມົນຕີຄັ້ງທີ 4 ກ່ຽວກັບການຮ່ວມມືປ້ອງກັນ, ຕ້ານອາດສະຍາກຳ. ໃນນັ້ນຊີ້ແຈ້ງວ່າ, ສອງກະຊວງສືບຕໍ່ແລກປ່ຽນຂໍ້ມູນຂ່າວສານ, ແບ່ງປັນບົດຮຽນ, ສົມທົບກັນຕໍ່ສູ້ປ້ອງກັນ, ຕ້ານອາດສະຍາກຳ, ຮັບປະກັນຄວາມປອດໄພ, ຄວາມເປັນລະບຽບຮຽບຮ້ອຍຂອງແຕ່ລະປະເທດ; ສົມທົບກັນຕໍ່ສູ້ເຮັດໃຫ້ທຸກກົນອຸບາຍ, ການເຄື່ອນໄຫວທຳລາຍຂອງບັນດາອິດທິກຳລັງທີ່ເປັນປໍລະປັກ, ປະຕິການ ແລະ ບັນດາອາດສະຍາກຳຖືກປະລາໄຊ; ຮັບປະກັນຄວາມປອດໄພໃຫ້ແກ່ການເຄື່ອນໄຫວຂອງການນຳຂັ້ນສູງ, ກໍ່ຄືບັນດາເຫດການການທູດສຳຄັນທີ່ດຳເນີນໃນປີນີ້.
ແລະກໍ່ໃນມື້ນີ້ໄດ້ດຳເນີນການເຈລະຈາລະຫວ່າງທ່ານລັດຖະມົນຕີວ່າການກະຊວງປ້ອງກັນປະເທດຫວຽດນາມ, ພົນເອກ ຟຸ່ງກວາງແທງ ແລະ ທ່ານລັດຖະມົນຕີວ່າການກະຊວງຕຳຫຼວດຈີນ ກົວເຊິງຄວັນ. ທີ່ການເຈລະຈາ, ສອງຝ່າຍໄດ້ແລກປ່ຽນກ່ຽວກັບສະພາບການໂລກ, ພາກພື້ນ, ສະພາບສອງປະເທດ; ສະເໜີທິດທາງ ແລະ ມາດຕະການເພື່ອແນໃສ່ຊຸກຍູ້, ຍົກສູງປະສິດທິຜົນການພົວພັນຮ່ວມມືລະຫວ່າງສອງກະຊວງໃນຕໍ່ໜ້າ. ສິ້ນສຸດການເຈລະຈາ, ທ່ານລັດຖະມົນຕີວ່າການກະຊວງປ້ອງກັນປະເທດຫວຽດນາມ ຟຸ່ງກວາງແທງ ແລະ ທ່ານລັດຖະມົນຕີວ່າການກະຊວງຕຳຫຼວດຈີນ ກົວເຊິງຄວັນ ໄດ້ລົງນາມໃນຂໍ້ຕົກລົງຮ່ວມມືກ່ຽວກັບການສ້າງກົນໄກສົມທົບກັນປ້ອງກັນຊາຍແດນໃນ 3 ຂັ້ນ ລະຫວ່າງກະຊວງປ້ອງກັນປະເທດຫວຽດນາມ ແລະ ກະຊວງຕຳຫຼວດຈີນ.