ທ່ານປະທານປະເທດ Truong Tan Sang ແລະ ທ່ານປະທານາທິບໍດີ Sebastian Pinera Echenique
ພາບ:TTXVN
|
(vovworld) - ພິທີຕ້ອນຮັບທ່ານປະທານາທິບໍດີ ຈີເລ Sebastian Pinera Echenique ມາຢ້ຽມຢາມຫວຽດນາມ ຢ່າງເປັນທາງການ ຕາມຄຳເຊື້ອເຊີນຂອງປະທານປະເທດຫວຽດນາມ Truong Tan Sang ໄດ້ຖືກຈັດຂຶ້ນຢ່າງສົມກຽດທີ່ສຳນັກງານປະທານປະເທດຢູ່ ຮ່າໂນ້ຍ. ທີ່ການເຈລະຈາພາຍຫລັງພິທີຕ້ອນຮັບ, ທ່ານປະທານປະເທດ Truong Tan Sang ແລະ ປະທານາທິບໍດີ ຈີເລ Sebastian Pinera Echenique ໄດ້ຕີລາຄາສູງການພັດທະນາອັນຈົບງາມຂອງການພົວພັນສອງຝ່າຍໃນໄລຍະຜ່ານມາ ແລະ ເຫັນດີຈະຮັກສາບັນດາການຢ້ຽມຢາມ ແລະ ພົບປະຂັ້ນສູງສອງຝ່າຍເປັນປະຈຳ, ການເຄື່ອນໄຫວທາບທ່າມດ້ານການເມືອງລະຫວ່າງສອງກະຊວງການຕ່າງປະເທດ, ນຳຄະນະກຳມະການຮ່ວມມືລະຫວ່າງລັດຖະບານຫວຽດນາມ ແລະ ຈີເລ ເຂົ້າເຄື່ອນໄຫວຢ່າງວ່ອງໄວ, ຊຸກຍູ້ການຮ່ວມມືໃນບັນດາຂົງເຂດຊຶ່ງທັງສອງຝ່າຍມີທ່າແຮງ. ການນຳທັງສອງທ່ານ ກໍເຫັນດີສືບຕໍ່ເພີ່ມທະວີການປະສານສົມທົບ ແລະ ສະຫນັບສະຫນູນເຊິ່ງກັນ ແລະກັນ ທີ່ບັນດາອົງການ, ເວທີປາໄສຫລາຍຝ່າຍຄື: ສະຫະປະຊາຊາດ, ຂະບວນການບໍ່ຮ່ວມກຸ່ມ, APEC, WTO ແລະອື່ນໆ.
ພາຍຫລັງການເຈລະຈາ, ທ່ານປະທານປະເທດ Truong Tan Sang ແລະ ປະທານາທິບໍດີ ຈີເລ Sebastian Pinera Echenique ໄດ້ລົງນາມໃນຖະແຫລງການຮ່ວມຫວຽດນາມ ຈີເລ, ໃນນັ້ນ ເພີ່ມທະວີການຮ່ວມມືສອງຝ່າຍໃນທຸກຂົງເຂດ.
ທີ່ການພົບປະກັບນັກຂ່າວພາຍຫລັງການເຈລະຈາ, ທ່ານປະທານປະເທດ Truong Tan Sang ຢືນຢັນວ່າ: ການຢ້ຽມຢາມຫວຽດນາມຄັ້ງນີ້ຂອງປະທານາທິບໍດີ ຈີເລ ຈະປະກອບສ່ວນຊຸກຍູ້ການພົວພັນຮ່ວມມືລະຫວ່າງ ຫວຽດນາມ ແລະ ຈີເລເຂົ້າສູ່ລວງເລີກ ແລະ ພັດທະນາຂຶ້ນສູ່ລະດັບສູງໃຫມ່. ທ່ານປະທານປະເທດ Truong Tan Sang ເວົ້າວ່າ:
“ການພົວພັນລະຫວ່າງ ຫວຽດນາມ ແລະ ຈີເລ ໂດຍປະທານ Ho Chi Minh ແລະ ປະທານາທິບໍດີ Sanvado Sinde ໄດ້ພ້ອມກັນສ້າງຂຶ້ນ, ໃນໄລຍະຜ່ານມາແມ່ນໄດ້ຮັບການພັດທະນາຢ່າງຕັ້ງຫນ້າ, ການແລກປ່ຽນບັນດາຄະນະຜູ້ແທນຂັ້ນສູງລະຫວ່າງລັດຖະບານ, ສະພາແຫ່ງຊາດຂອງສອງປະເທດກໍໄດ້ຮັກສາໄວ້ເປັນປະຈຳ. ຍາມໃດ ສອງຝ່າຍ ກໍສະຫງວນອາລົມຈິດໃຫ້ກັນ. ສອງຝ່າຍສົມທົບກັນຢ່າງແຫນ້ນແຟ້ນໃນບັນດາອົງການ ແລະ ເວທີປາໄສສາກົນ. ການພົວພັນທາງດ້ານເສດຖະກິດ ການຄ້າສອງຝ່າຍພັດທະນາ ຢ່າງວ່ອງໄວ ແລະ ຍັງມີກາລະໂອກາດຫລາຍຢ່າງເພື່ອສືບຕໍ່ພັດທະນາ.”
ສ່ວນທ່ານປະທານາທິບໍດີ ຈີເລ Sebastian Pinera Echenique ໄດ້ເວົ້າວ່າ:
“ຂ້າພະເຈົ້າມີຄວາມເຄົາລົບຕໍ່ການຕໍ່ສູ້ຍາດເອົາເອກະລາດ ແລະ ການພັດທະນາຂອງຫວຽດນາມໃນວັນນີ້. ຫວຽດນາມ ມີພື້ນຖານເສດຖະກິດທີ່ຂະຫຍັນຂັນເຄື່ອນ, ນອນໃນພາກພື້ນ ປາຊີຟີກ, ເປັນຈຸດພົ້ນເດັ່ນຂອງໂລກ. ການພົວພັນລະຫວ່າງສອງປະເທດມີບາດກ້າວພັດທະນາອັນດີງາມ ຊຶ່ງສະແດງອອກໃນການລົງນາມບັນດາສັນຍາຕ່າງໆ, ໃຫມ່ຫລ້າສຸດ, ສັນຍາການຄ້າເສລີ FTA, ຊຶ່ງແມ່ນພື້ນຖານອັນສຳຄັນເພື່ອຊຸກຍູ້ການພົວພັນທາງດ້ານເສດຖະກິດການຄ້າລະຫວ່າງສອງປະເທດ.”