(vovworld) – ວັນທີ 11/4, ໃນຂອບເຂດການຢ້ຽມຢາມ ຊູແອດ ຢ່າງເປັນທາງການ, ທ່ານຮອງນາຍົກລັດຖະມົນຕີ ຫວຽດນາມ ຫວູວັນນີງ ໄດ້ເຂົ້າຢ້ຽມຂຳ່ນັບທ່ານ Per Westerberg, ປະທານສະພາແຫ່ງຊາດ ຊູແອດ. ທ່ານປະທານສະພາແຫ່ງຊາດ Per Westerberg ຕີລາຄາສູງການພົວພັນມິດຕະພາບທີ່ເປັນມູນເຊື້ອອັນດີງາມລະຫວ່າງ ຊູແອດ ແລະ ຫວຽດນາມ, ຢືນຢັນວ່າ: ຊູແອດ ຍາມໃດກໍ່ເອົາໃຈໃສ່ຊຸກຍູ້ການພົວພັນຮ່ວມມືກັບ ຫວຽດນາມ. ທ່ານຮອງນາຍົກລັດຖະມົນຕີ ຫວູວັນນີງ ຢືນຢັນວ່າ: ແຫຼ່ງທຶນ ODA ຂອງ ຊູແອດ ໄດ້ປະກອບສ່ວນສຳຄັນໃນການລົບລ້າງຄວາມອຶດຫິວຫລຸດຜ່ອນຄວາມທຸກຍາກ ແລະ ພັດທະນາເສດຖະກິດ - ສັງຄົມຢູ່ ຫວຽດນາມ. ທ່ານຮອງນາຍົກລັດຖະມົນຕີ ຫວູວັນນີງ ປາດຖະໜາວ່າ: ສະພາແຫ່ງຊາດ ຊູແອດ ຈະສືບຕໍ່ສະໜັບສະໜູນ ແລະ ໜູນຊ່ວຍຫວຽດນາມ ຜ່ານບັນດາຮູບການຮ່ວມມືທີ່ເໝາະສົມໃນໄລຍະຈະມາເຖິງ.
ແລະກໍ່ໃນວັນດຽວກັນ, ເມື່ອເຮັດວຽກກັບລັດຖະມົນຕີກະຊວງການຄ້າ ແລະ ຮ່ວມມື ເອີລົບເໜືອຂອງ ຊູແອດ ທ່ານ Ewa Bjorling, ທ່ານຮອງນາຍົກລັດຖະມົນຕີ ຫວູວັນນີງ ຢືນຢັນວ່າ: ໃນນະໂຍບາຍການຕ່າງປະເທດຂອງຕົນ, ຍາມໃດ ຫວຽດນາມ ກໍ່ຖືເປັນສຳຄັນການປັບປຸງ ແລະ ພັດທະນາການພົວພັນກັບບັນດາປະເທດເພື່ອນມິດທີ່ເປັນມູນເຊື້ອຢູ່ ເອີລົບເໜືອ, ໃນນັ້ນມີ ຊູແອດ. ທ່ານຮອງນາຍົກລັດຖະມົນຕີ ຫວູວັນນີງ ຢືນຢັນ: ລັດຖະບານ ຫວຽດນາມ ຈະສ້າງທຸກເງື່ອນໄຂອຳນວຍຄວາມສະດວກເພື່ອໃຫ້ບັນດາວິສາຫະກິດ ຊູແອດ ເຄື່ອນໄຫວລົງທຶນ ແລະ ດຳເນີນທຸລະກິດ ຍາວນານ ຢູ່ ຫວຽດນາມ.
ໃນການເຮັດວຽກກັບທ່ານລັດຖະມົນຕີການຕ່າງປະເທດ Frank Belfrage, ທ່ານຮອງນາຍົກລັດຖະມົນຕີ ຫວູວັນນີງ ຢືນຢັນວ່າ: ຫວຽດນາມ ກຽມພ້ອມເປັນຂົວເຊື່ອມຕໍ່ເພື່ອໃຫ້ຊູແອດ ພັດທະນາການພົວພັນກັບ ອາຊຽນ ແລະ ບັນດາປະເທດສະມາຊິກ. ຝ່າຍ ຊູແອດ ຢືນຢັນສະໜັບສະໜູນເລື່ອງແກ້ໄຂບັນດາການພິພາດຢູ່ທະເລຕາເວັນອອກ ດ້ວຍບັນດາມາດຕະການສັນຕິພາບ ບົນພື້ນຖານກົດໝາຍສາກົນ.
ວັນທີ 12/4, ທ່ານຮອງນາຍົກລັດຖະມົນຕີ ຫວູວັນນີງ ເດີນທາງອອກຈາກ Stockholm ໄປ ລອນດອນ, ເລີ່ມເຕົ້ນການຢ້ຽມຢາມ ລາຊະອານາຈັກ ອັງກິດ ຢ່າງເປັນທາງການຕາມຄຳເຊື້ອເຊີນຂອງລັດຖະບານສະຫະພັນ ລາຊະອານາຈັກ ອັງກິດ ແລະ ໄອແລນເໜືອ.