ຫວຽດນາມ ແລະ ໄທ ເຫັນດີເປັນເອກະພາບທິດທາງຊຸກຍູ້ການພົວພັນຄູ່ຮ່ວມມືຍຸດທະສາດເພີ່ມທະວີ
(VOVWORLD) - ໂດຍປະຕິບັດຂໍ້ຕົກລົງລະຫວ່າງສອງກະຊວງການຕ່າງປະເທດ, ວັນທີ 06 ກັນຍາ, ທ່ານຮອງລັດຖະມົນຕີ ກະຊວງການຕ່າງປະເທດ ຫວຽດນາມ ໂດຮຸ່ງຫວຽດ ພ້ອມກັບທ່ານຮອງລັດຖະມົນຕີຜູ້ປະຈຳການກະຊວງການຕ່າງປະເທດ ໄທ Eksiri Pintaruchi ເປັນປະທານຮ່ວມກອງປະຊຸມປຶກສາຫາລືການເມືອງ ຫວຽດນາມ - ໄທ ຄັ້ງທີ 10 ຢູ່ສຳນັກງານກະຊວງການຕ່າງປະເທດ ໄທ ຢູ່ນະຄອນຫຼວງ ບາງກອກ.
 ບັນຍາກາດກອງປະຊຸມ (ພາບ: baoquocte.vn) |
ໃນກອງປະຊຸມ, ສອງຝ່າຍຕີລາຄາການພົວພັນຄູ່ຮ່ວມມືຍຸດທະສາດເພີ່ມທະວີ ຫວຽດນາມ - ໄທ ພວມພັດທະນາຢ່າງດີງາມທີ່ສຸດໃນທຸກຂົງເຂດ ແລະ ມີຄວາມເຫັນດີເປັນຢ່າງສູງຕໍ່ບາງທິດທາງຊຸກຍູ້ການຮ່ວມມືໃນໄລຍະຈະມາເຖິງ. ຕາມນັ້ນແລ້ວ, ສອງຝ່າຍຢັ້ງຢືນສົມທົບກັນຢ່າງແໜ້ນແຟ້ນ, ຊຸກຍູ້ການແລກປ່ຽນຄະນະຜູ້ແທນ, ພົບປະຄະນະຜູ້ແທນຂັ້ນສູງ ແລະ ທຸກຂັ້ນ, ພິເສດ ແມ່ນກະກຽມໃຫ້ແກ່ການຢ້ຽມຢາມ ຫວຽດນາມ ຢ່າງເປັນທາງການຂອງທ່ານນາຍົກລັດຖະມົນຕີ. ສອງຝ່າຍເຫັນດີເປັນເອກະພາບຊຸກຍູ້ປະຕິບັດໂຄງການດຳເນີນງານ ຜັນຂະຫຍາຍການພົວພັນຄູ່ຮ່ວມມືຍຸດທະສາດເພີ່ມທະວີ ໄລຍະ 2022 – 2027 ແລະ ບັນດາກົນໄກຮ່ວມມືສອງຝ່າຍສຳຄັນ ຢ່າງມີປະສິດທິຜົນ.
ສອງຝ່າຍກໍໄດ້ເນັ້ນໜັກເຖິງຄວາມສຳຄັນຂອງການເຊື່ອມຕໍ່ພື້ນຖານໂຄງລ່າງ ແລະ ການຂົນຂວາຍດ້ວຍຫຼາຍຮູບແບບພາຫະນະດ ໃນນັ້ນ ມີການຂຸດຄົ້ນເສັ້ນທາງລຽບຕາມແລວເສດຖະກິດ ຕາເວັນອອກ - ຕາເວັນຕົກ, ພັດທະນາລະບົບທາງບົກ ແລະ ທາງລົດໄຟເຊື່ອມຕໍ່ ໄທ - ລາວ - ຫວຽດນາມ.