(vovworld) - ວັນທີ 12/11, ສະມັດຊາໃຫຍ່ສະຫະປະຊາຊາດຄັ້ງທີ 68 ໄດ້ດຳເນີນການປ່ອນບັດເລືອກຕັ້ງ 14 ປະເທດສະມາຊິກໃໝ່ຂອງສະພາສິດທິມະນຸດອາຍຸການ 2014 – 2016. ດ້ວຍ 184 ບັດເຫັນດີໃນຈຳນວນ 193 ບັດ, ຫວຽດນາມ ໄດ້ຮັບການເລືອກຕັ້ງດ້ວຍຈຳນວນສະໜັບສະໜູນສູງກວ່າໝູ່ໃນຈຳນວນ 14 ປະເທດ ແລະ ເປັນຄັ້ງທຳອິດທີ່ຫວຽດນາມ ໄດ້ເຂົ້າເປັນສະມາຊິກຂອງສະພາສິດທິມະນຸດສະຫະປະຊາຊາດ. ນີ້ກໍ່ແມ່ນຄວາມຮັບຮູ້ຂອງວົງຄະນະຍາດສາກົນທີ່ມີຕໍ່ບັນດາຜົນງານຂອງຫວຽດນາມ ໃນການຮັບປະກັນບັນດາສິດຂອງພົນລະເມືອງໃນທຸກຂົງເຂດການເມືອງ, ສັງຄົມ, ເສດຖະກິດ, ວັດທະນະທຳ, ການສຶກສາ, ສາສະໜາ, ການເຫຼື້ອມໄສນັບມື້ນັບດີກວ່າ. ເລື່ອງຫວຽດນາມ ເຂົ້າເປັນສະມາຊິກດ້ວຍຈຳນວນບັດສະໜັບສະໜູນສູງນັ້ນກໍ່ສະແດງໃຫ້ເຫັນທີ່ຕັ້ງ ແລະ ອິດທິຜົນຊື່ສຽງທີ່ນັບມື້ນັບສູງຂອງປະເທດຊາດບົນເວທີສາກົນ. ໃນອາຍຸການ 3 ປີທີ່ເປັນສະມາຊິກສະພາສິດທິມະນຸດ, ຫວຽດນາມ ຈະມີໂອກາດປະກອບສ່ວນໂດຍກົງເຂົ້າໃນການກໍ່ສ້າງ ແລະ ມີຄວາມຮັບຜິດຊອບຕໍ່ພາລະກິດປົກປັກຮັກສາ ແລະ ຊຸກຍູ້ບັນດາຄຸນຄ່າສິດຂອງມະນຸດໃນຂອບເຂດທົ່ວໂລກ, ກໍ່ຄືມີເງື່ອນໄຂແບ່ງປັນ ແລະ ຮໍ່າຮຽນເອົາບົດຮຽນທີ່ດີຈາກເພື່ອນມິດສາກົນ ແນໃສ່ຮັບປະກັນສິດຂອງພົນລະເມືອງ ຫວຽດນາມ ແຕ່ລະຄົນ ໃຫ້ນັບມື້ນັບດີກວ່າເກົ່າ.
ພາຍຫຼັງໄດ້ຮັບເລືອກຕັ້ງເປັນສະມາຊິກສະພາສິດທິມະນຸດສະຫະປະຊາຊາດ, ຫວຽດນາມ ໄດ້ຮັບຄຳອວຍພອນຈາກບັນດາປະເທດເພື່ອນມິດສາກົນ. ທ່ານຫົວໜ້າຄະນະຜູ້ຕາງໜ້າປາກິດສຖານ ປະຈຳສະຫະປະຊາຊາດ Masood Khan ຖືວ່າ.
“ນີ້ແມ່ນຜົນງານທີ່ຜົ້ນເດັ່ນ ແລະ ຂ້າພະເຈົ້າຂໍອວຍພອນລັດຖະບານ ແລະ ປະຊາຊົນຫວຽດນາມ ກໍ່ຄືຄະນະຜູ້ຕາງໜ້າຫວຽດນາມ ປະຈຳສະຫະປະຊາຊາດ. ໝາກຜົນການເລືອກຕັ້ງ ສະແດງໃຫ້ເຫັນອິດທິພົນຊື່ສຽງ ແລະ ກຳລັງແຮງຂອງຫວຽດນາມ ໃນບົດບາດເປັນປະເທດທີ່ມີການປະກອບສ່ວນຫຼາຍຢ່າງເຂົ້າໃນວິວັດການຊຸກຍູ້ ແລະ ປົກປັກຮັກສາສິດທິມະນຸດຢູ່ໃນໂລກ”.
ທ່ານ Santos Sergio, ຄະນະຜູ້ແທນບຣາຊິວ ປະຈຳສະຫະປະຊາຊາດ, ໄດ້ແບ່ງປັນວ່າ ເລື່ອງຫວຽດນາມ ໄດ້ຮັບຈຳນວນບັດສະໜັບສະໜູນສູງກວ່າໝູ່ໃນບັນດາປະເທດຮັບສະໝັກເລືອກຕັ້ງໄດ້ສະແດງໃຫ້ເຫັນການສະໜັບໜູນ ຢ່າງກວ້າງຂວາງຂອງປະຊາຄົມສາກົນທີ່ມີຕໍ່ຫວຽດນາມ.
ສ່ວນທ່ານ Filippe Savadogo, ເອກອັກຄະລັດຖະທູດ - ຜູ້ຕາງໜ້າອົງການຈັດຕັ້ງບັນດາປະເທດທີ່ໃຊ້ພາສາຝລັ່ງ ປະຈຳສະຫະປະຊາຊາດ ໃຫ້ຮູ້ວ່າ.
“ຂ້າພະເຈົ້າພຶງພໍໃຈທີ່ສຸດຕໍ່ເລື່ອງຫວຽດນາມ ໄດ້ຮັບເລືອກຕັ້ງເປັນສະມາຊິກສະພາສິດທິມະນຸດ ຍ້ອນວ່າ, ກຳລັງແຮງຂອງປະຊາຄົມໃຊ້ພາສາຝລັ່ງ ຈະໄດ້ຮັບການເພີ່ມທະວີ. ຂ້າພະເຂົ້າໄດ້ເປັນສັກຂີພິຍານບັນດາຄວາມານະພະຍາຍາມຂອງຫວຽດນາມ ເພື່ອແນໃສ່ປະກອບສ່ວນຢ່າງຕັ້ງໜ້າເຂົ້າໃນກຸ່ມໃຊ້ພາສາຝລັ່ງ ໃນນັ້ນມີຂົງເຂດສິດທິມະນຸດ”.
ທ່ານເອກອັກຄະລັດຖະທູດ ເລຮ່ວາຍຈຸງ, ຫົວໜ້າຄະນະຫວຽດນາມ ປະຈຳສະຫະປະຊາຊາດ ໃຫ້ຮູ້ວ່າ, ປະຊາຄົມໂລກພວມຕັ້ງຄວາມຫວັງຕໍ່ຫວຽດນາມ ແລະ ເຊື່ອໝັ້ນວ່າ ຫວຽດນາມ ຈະມີບັນດາການປະກອບສ່ວນອັນແທດຈິງ, ລະອຽດ ໃນອາຍຸການຈະມາເຖິງຢູ່ສະພາສິດທິມະນຸດສະຫະປະຊາຊາດ.