ທ່ານ Alain Fontenas ຢູ່ ມູ່ກັງຈ໋າຍ
|
(vovworld) – 40 ປີພາຍຫຼັງສົງຄາມສິ້ນສຸດລົງ, ເມື່ອມາ ຫວຽດນາມ, ເພື່ອນມິດສາກົນລ້ວນແຕ່ມີຄວາມຮູ້ສຶກລວມວ່າ: ປະເທດໜຶ່ງດ້ວຍປະຫວັດສາດນີ້ພວມໄດ້ຮັບການປ່ຽນແປງໃນແຕ່ລະວັນ, ດ້ວຍຮູບພາບຂອງປະເທດໜຶ່ງທີ່ພັດທະນາຢ່າງຂະຫຍັນຂັນເຄື່ອນ, ເຊື່ອມໂຍງ ແລະ ສະໜິດສະໜົມ.
Alain Fontenas, ເຊິ່ງແມ່ນນັກຈິດຕະກຳສະໝັກຫຼິ້ນຊາວ ຝຣັ່ງ, ໄດ້ມາ ຫວຽດນາມ ເປັນຄັ້ງທຳອິດໃນຊຸມມປີ 90 ຂອງສັດຕະວັດທີ 20, ທ່ານມີຄວາມປະທັບໃຈຕໍ່ທັດສະນີຍະພາບ, ມະນຸດ ແລະ ອາຫານການກິນ, ທ່ານໄດ້ແຕ້ມກ່ຽວກັບປະເທດຊາວ ແລະ ຊາວ ຫວຽດນາມ ດ້ວຍຄວາມເມົາມົວ. ນັບແຕ່ນັ້ນມາ, ທ່ານໄດ້ມາ ຫວຽດນາມ ເຖິງ 8 ເທື່ອແລ້ວ ແລະ ເທື່ອໃດກໍ່ຢູ່ໃນເວລາກ່ວາ 2 ເດືອນ. ຫ້ອງວາງສະແດງພາບແຕ້ມຂອງ Alain Fontenas ຢູ່ ຝຣັ່ງ ໄດ້ກາຍເປັນຈຸດນັດພົບຂອງຊາວ ຝຣັ່ງຜູ້ຮັກແພງປະເທດຊາດ ແລະ ຊາວ ຫວຽດນາມ ຫຼາຍຄົນ.
“ການປ່ຽນແປງຂອງ ຫວຽດນາມ ແມ່ນສິ່ງທີ່ໃຜໆກໍ່ຮັບຮູ້ໄດ້, ສິ່ງດັ່ງກ່າວສະແດງໃຫ້ເຫັນຢ່າງຈະແຈ້ງຜ່ານຊີວິດປະຈຳວັນຂອງປະຊາຊົນ, ເງື່ອນໄຂດຳລົງຊີວິດ, ພື້ນຖານໂຄງລ່າງ… ຕົວຢ່າງຈະແຈ້ງທີ່ສຸດນັ້ນແມ່ນ, ເມື່ອມາ ຫວຽດນາມ ຄັ້ງທຳອິດໃນປີ 1990, ປະເທດຂອງພວກເພື່ອນຍັງປະສົບກັບຄວາມຫຍຸ້ງຍາກຫຼາຍຢ່າງ, ແຕ່ປະຈຸບັນໄດ້ມີການປ່ຽນແປງຫຼາຍຢ່າງ, ຖະໜົນຫົນທາງກໍ່ດີກ່ວາ ແລະ ພິເສດແມ່ນມີຫຼາຍຄອບຄົວຊື້ໄດ້ລົດໂອໂຕ… ອາດຈະຢືນຢັນໄດ້ວ່າ, ຫວຽດນາມ ພວມພັດທະນາຢ່າງຖືກທິດ.”
ສ່ວນທ່ານນາງ Rahayu Saraswati, ເຊິ່ງແມ່ນສະມາຊິກສະພາແຫ່ງຊາດ ໄດ້ມາ ຫວຽດນາມ ເຂົ້າຮ່ວມກອງປະຊຸມໃຫຍ່ສະຫະພັນລັດຖະສະພາສາກົນຄັ້ງທີ 132 (IPU 132) ກໍ່ມີຄວາມຕົກສະເງີ້ຕໍ່ລະດັບການພັດທະນາເສດຖະກິດສັງຄົມຂອງ ຫວຽດນາມ:
“ຂ້າພະເຈົ້າຖືວ່າ, ຫວຽດນາມ ປະຕິບັດໄດ້ບັນດາສິ່ງທີ່ດີເລີດ. ມາ ຫວຽດນາມ ຄັ້ງນີ້, ຂ້າພະເຈົ້າໄດ້ເຫັນປະຈັກຕາການພັດທະນາກະໂດດຂັ້ນຂອງພວກເພື່ອນ, ພິເສດແມ່ນໃນຂົງເຂດເສດຖະກິດ ແລະ ດຶງດູດການລົງທຶນໄດ້ຫຼາຍ. ດ້ວຍສະພາບແວດລ້ອມແຫ່ງການລົງທຶນຢ່າງສະດວກ, ກໍ່ຄືນະໂຍບາຍເປີດປະຕູນັ້ນ, ຫວຽດນາມ ພວມຍື່ນຕໍ່ໜ້າກາລະໂອກາດຫຼາຍຢ່າງ. ”