(ການເຈລະຈາລະຫວ່າງເລຂາທິການໃຫຍ່ຫວຽດນາມກັບ,
ເລຂາທິການໃຫຍ່,ປະທານປະເທດຈີນ)
(vovworld) - ຕອນບ່າຍວັນທີ 5/11, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຈີນ, ປະທານປະເທດຈີນ ສື່ຈິນຜິງ ແລະ ພັນລະຍາ ໄດ້ມາຮອດສະໜາມບິນສາກົນ ໂນ້ຍບ່າຍ, ເລີ່ມຕົ້ນການຢ້ຽມຢາມທາງລັດຖະກິດຫວຽດນາມໃນລະຫວ່າງວັນທີ 5-6/11. ຕອນບ່າຍວັນດຽວກັນ, ພິທີຕ້ອນຮັບທ່ານເລຂາທິການໃຫຍ່, ປະທານປະເທດຈີນ ສື່ຈິນຜິງ ຖືກຈັດຂຶ້ນຢູ່ສຳນັກງານປະທານປະເທດຕາມພິທີການສູງສຸດສຳລັບປະມຸກລັດ.
ທີ່ການເຈລະຈາລະຫວ່າງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ ແລະ ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຈີນ, ປະທານປະເທດຈີນ ສື່ຈິນຜິງ, ສອງຝ່າຍໄດ້ເນັ້ນໜັກເຖິງຄວາມສຳຄັນໃນການປັບປຸງນຳ້ໃຈມິດຕະພາບທີ່ເປັນມູນເຊື້ອລະຫວ່າງສອງພັກ, ສອງລັດໃນສະພາບການໃໝ່ຢ່າງບໍ່ຢຸດຢັ້ງ. ສອງຝ່າຍເຫັນດີເປັນເອກະສັນຮັກສາທິດທາງທີ່ຖືກຕ້ອງແຫ່ງນຳ້ໃຈມິດຕະພາບຫວຽດນາມ - ຈີນ ໄວ້ຢ່າງໝັ້ນຄົງ, ຮັກສາການແລກປ່ຽນຄະນະຜູ້ແທນຂັ້ນສູງ, ປັບປຸງຄວາມໄວ້ເນື້ອເຊື່ອໃຈດ້ານການເມືອງ; ເພີ່ມທະວີການຮ່ວມມືລະຫວ່າງກະຊວງ, ຂະແໜງການ, ທ້ອງຖີ່ນຂອງສອງປະເທດ. ພ້ອມທັງຊຸກຍູ້ການຮ່ວມມືທາງດ້ານເສດຖະກິດການຄ້າ, ການລົງທຶນພັດທະນາຢ່າງມີປະສິດທິຜົນ, ເປີດກວ້າງການຮ່ວມມືໃນທຸກຂົງເຂດ; ສົມທົບກັນປະຕິບັດບັນດາເອກະສານກ່ຽວກັບການຄຸ້ມຄອງຊາຍແດນທາງບົກ, ຊຸກຍູ້ການພັດທະນາເຂດຊາຍແດນສອງປະເທດ, ພ້ອມກັນມານະພະຍາຍາມຄວບຄຸມ ແລະ ແກ້ໄຂຄວາມບໍ່ລົງລອຍກັນບົນທະເລໃຫ້ດີ, ບໍ່ໃຫ້ສົ່ງຜົນສະທ້ອນເຖິງການພັດທະນາຢ່າງມີສະຖຽນລະພາບ, ໂປ່ງໃສຂອງການພົວພັນສອງປະເທດ.
ທ່ານເລຂາທິການໃຫຍ່ ຫງວຽນຟູ໋ຈ້ອງ ຢືນຢັນວ່າ: ພັກ, ລັດ ແລະ ປະຊາຊົນຫວຽດນາມ ຍາມໃດກໍ່ຖືເປັນສຳຄັນການຮັກສາການພົວພັນຖານບ້ານໃກ້ເຮືອນຄຽງກັບຈີນ; ພ້ອມແລ້ວທີ່ຈະພ້ອມກັບຈີນ ນຳການພົວພັນຄູ່ຮ່ວມມື, ຮ່ວມມືຍຸດທະສາດຮອບດ້ານຫວຽດນາມ - ຈີນ ກ້າວເຂົ້າສູ່ລວງເລິກ.
ທ່ານເລຂາທິການໃຫຍ່ ຫງວຽນຟູ໋ຈ້ອງ ຖືວ່າ ສອງປະເທດຄວນຊຸກຍູ້ບັນດາຂົງເຂດຮ່ວມມືໃຫ້ພັດທະນາຢ່າງແທ້ຈິງ, ສົມດຸນ, ມີປະສິດທິຜົນ. ການນຳຂັ້ນສູງສອງປະເທດຕ້ອງເອົາໃຈໃສ່ຊີ້ນຳທຸກຂັ້ນ, ທຸກຂະແໜງການປະຕິບັດບັນດາຂໍ້ຕົກລົງຢ່າງເຂັ້ມງວດ; ພ້ອມທັງຕັ້ງໜ້າຜັນຂະຫຍາຍບັນດາມາດຕະການທີ່ມີປະສິດທິຜົນ, ເປີດກວ້າງ ແລະ ຊຸກຍູ້ບັນດາຂົງເຂດຮ່ວມມືຕ່າງຝ່າຍຕ່າງມີປະສິດທິຜົນ.
ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກວ່າ: ສອງປະເທດຄວນຄວບຄຸມບັນດາຄວາມບໍ່ລົງລອຍກັນ, ຮັກສາສັນຕິພາບ, ສະຖຽນລະພາບຢູ່ທະເລຕາເວັນອອກ, ບໍ່ປະໃຫ້ບັນຫານີ້ສົ່ງຜົນສະທ້ອນເຖິງການພົວພັນສອງປະເທດ. ສະເໜີຝ່າຍຈີນ ພ້ອມກັບຫວຽດນາມ ນຳໜ້າໃນການປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ແລະ ກໍ່ສ້າງປະມວນຂໍ້ກຳນົດການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ຢ່າງມີປະສິດທິຜົນໂດຍໄວ. ຫວຽດນາມ ມີທ່າທີຢ່າງຕັ້ງໜ້າສຳລັບບັນຫາຮ່ວມມືພ້ອມກັນພັດທະນາບົນທະເລຢູ່ເຂດມີການຂັດແຍ້ງກັນຢ່າງແທ້ຈິງຕາມກົດໝາຍສາກົນ, ພິເສດແມ່ນສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982.
ເນື່ອງໃນໂອກາດນີ້, ທ່ານເລຂາທິການໃຫຍ່ ຫງວຽນຟຸຈ້ອງ ໄດ້ເຊີນທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຈີນ, ປະທານປະເທດຈີນ ສື່ຈິນຜິງ ມາເຂົ້າຮ່ວມກອງປະຊຸມຂັ້ນສູງ APEC ເຊິ່ງຈະຈັດຂຶ້ນຢູ່ຫວຽດນາມ ໃນປີ 2017. ທ່ານເລຂາທິການໃຫຍ່, ປະເທດປະເທດຈີນ ສື່ຈິນຜິງ ໄດ້ຮັບຄຳເຊີນດັ່ງກ່າວ.
ສ່ວນທ່ານເລຂາທິການໃຫຍ່, ປະເທດປະເທດຈີນ ສື່ຈິນຜິງ ເນັ້ນໜັກວ່າ, ພັກ, ລັດ ຈີນ ຖືການປັບປຸງ ແລະ ພັດທະນາການພົວພັນຄູ່ຮ່ວມມື, ຮ່ວມມືຍຸດທະສາດຮອບດ້ານ ຈີນ - ຫວຽດນາມ ເປັນສຳຄັນ, ຕາມທິດນຳ “ເປັນບ້ານໃກ້ເຮືອນຄຽງມິດຕະພາບ, ຮ່ວມມືຮອບດ້ານ, ສະຖຽນລະພາບຍາວນານ, ມຸ່ງໄປສູ່ອະນາຄົດ” ແລະຈິດໃຈ “ເປັນປະເທດບ້ານໃກ້ເຮືອນຄຽງທີ່ດີ, ເປັນເພື່ອນມິດທີ່ດີ, ສະຫາຍທີ່ດີ, ຄູ່ຮ່ວມມືທີດີ”.
ທ່ານເລຂາທິການໃຫຍ່, ປະເທດປະເທດຈີນ ສື່ຈິນຜິງ ໄດ້ເຫັນດີຕໍ່ບັນດາທິດທາງ ແລະ ມາດຕະການໃຫຍ່ເພື່ອແນໃສ່ພັດທະນາການພົວພັນລະຫວ່າງ 2 ພັກ, 2 ລັດ ໂດຍທ່ານເລຂາທິການໃຫຍ່ ຫງວຽນຟຸຈ້ອງສະເໜີ. ພ້ອມທັງຢືນຢັນວ່າ ຈີນ ຈະສົ່ງເສີມບັນດາວິສາຫະກິດຈີນ ເພີ່ມທະວີການຮ່ວມມືດ້ານການຄ້າ ແລະ ເປີກກວ້າງການລົງທຶນຢູ່ຫວຽດນາມ. ຈີນ ມານະພະຍາຍາມພ້ອມກັບຫວຽດນາມ ຄວບຄຸມຄວາມບໍ່ລົງລອຍກັນຢູ່ທະເລຮັກສາການພົວພັນຈີນ - ຫວຽດນາມ ແລະ ສັນຕິພາບ, ສະຖຽນລະພາບຢູ່ທະເລຕາເວັນອອກ.
ທ່ານເລຂາທິການໃຫຍ່, ປະເທດປະເທດຈີນ ສື່ຈິນຜິງ ສະເໜີໃຫ້ 2 ຝ່າຍເພີ່ມທະວີການສົມທົບກັນທີ່ບັນດາກົນໄກຫຼາຍຝ່າຍຄື: ສະຫະປະຊາຊາດ, APEC, ASEM, ຈີນ - ອາຊຽນ; ຈີນ ແລະ ບັນດາປະເທດອາຊຽນ ຈະມານະພະຍາຍາມຊຸກຍູ້ການເຈລະຈາ, ສ້າງປະມວນຂໍ້ກຳນົດການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC), ປະກອບສ່ວນຮັກສາສັນຕິພາບ, ຄວາມວັດທະນາຖາວອນ ແລະ ການພັດທະນາຂອງພັກພື້ນ ແລະ ໂລກ; ຢືນຢັນ ຈີນ ສະໜັບສະໜູນການສ້າງຕັ້ງປະຊາຄົນອາຊຽນ…
ພາຍຫຼັງການເຈລະຈາ, ທ່ານເລຂາທິການໃຫຍ່ ຫງວຽນຟຸຈ້ອງ ແລະ ທ່ານເລຂາທິການໃຫຍ່, ປະເທດປະເທດຈີນ ສື່ຈິນຜິງ ໄດ້ເປັນສັກຂີພິຍານພິທີລົງນານໃນບັນດາເອກະສານຕົກລົງຮ່ວມມືລະຫວ່າງ 2 ຝ່າຍ…