(vovworld) – ຄືດັ່ງພວກເຮົາໄດ້ໃຫ້ຂ່າວໄປແລ້ວ, ວັນທີ 1/5, ຈີນ ໄດ້ນຳຮ້ານເຈາະນ້ຳມັນໝາຍເລກໄຮຢາງ 981 ເຄື່ອນໄຫວຜິດກົດໝາຍຢູ່ແປງນ້ຳມັນອາຍແກດ 143, ຂຶ້ນກັບເຂດເສດຖະກິດຈຳເພາະ ແລະ ເຂດໄລ່ທະວີບ ຫວຽດນາມ. ການເຄື່ອນໄຫວນີ້ໄດ້ລະເມີດອະທິປະໄຕ ແລະ ສິດຕັດສິນອັນຖືກຕ້ອງສຳລັບເຂດເສດຖະກິດຈຳເພາະ ແລະ ເຂດໄຫລ່ທະວີບຂອງ ຫວຽດນາມ, ລະເມີດສົນທິສັນຍາຂອງ ສະຫະປະຊາຊາດ ກ່ຽວກັບກົດໝາຍວ່າດ້ວຍທະເລປີ 1982 ແລະ ບັນດາຂໍ້ຕົກລົງ 2 ຝ່າຍ ຫວຽດນາມ - ຈີນຢ່າງຮ້າຍແຮງ. ວັນທີ 7/5, ກະຊວງການຕ່າງປະເທດ ຫວຽດນາມ ໄດ້ຈັດຕັ້ງການປະຊຸມຂ່າວສາກົນ ເພື່ອແນໃສ່ປະກາດເຖິງຫາງສຽງທັງພາຍໃນ ແລະ ຕ່າງປະເທດ ກ່ຽວກັບການກະທຳຜິດພາດຂອງຈີນ.
ທີ່ການປະຊຸມຂ່າວ, ທ່ານ ໂງງອກທູ, ຮອງຫົວໜ້າເສນາທິການ, ກອງບັນຊາການຕຳຫຼວດທະເລ ຫວຽດນາມ, ໃຫ້ຮູ້ວ່າ: ມາຮອດປະຈຸບັນ, ຈີນ ໄດ້ລະດົມກຳ່ປັນຊະນິດຕ່າງໆ 80 ລຳໄປເຖິງເຂດທີ່ຕັ້ງຮ້ານເຈາະນ້ຳມັນ ໄຮຢາງ 981. ສິ່ງທີ່ໜ້າສົນໃຈແມ່ນ, ກຳ່ປັນການທະຫານຂອງ ຈີນ ໄດ້ປະກົດຕົວຫ່າງຈາກໝູ່ເກາະ ຫຼີເຊີນ ຂອງ ຫວຽດນາມ ປະມານ 50 ໄມທະເລ. ທ່ານ ໂງງອກທູ ໃຫ້ຮູ້ວ່າ:
“ເມື່ອບັນດາກຳ່ປັນປະຕິບັດກົດໝາຍຂອງ ຫວຽດນາມ ໄປກວດກາ, ສະກັດກັ້ນການລະເມີດຢ່າງຜິດກົດໝາຍຂອງຮ້ານເຈາະນ້ຳມັນໄຮຢາງ 981, ບັນດາກຳ່ປັນປົກປ້ອງຂອງ ຈີນ, ໂດຍໄດ້ມີການໜູນຊ່ວຍຂອງເຮືອບິນ, ໄດ້ຕຳ່ໃສ່ບັນດາກຳ່ປັນຂອງ ຫວຽດນາມ, ໃສ່ທໍ່ສິດນ້ຳດ້ວຍກຳລັງແຮງສູງ ເພື່ອສິດນ້ຳໃສ່ກຳ່ປັນຂອງ ຫວຽດນາມ, ເຮັດໃຫ້ກຳ່ປັນ ແລະ ບັນດາອຸປະກອນໃນກຳ່ປັນຖືກເປເພ, ກໍ່ຄວາມບາດເຈັບໃຫ້ແກ່ລູກເຮືອໃນກຳ່ປັນ.”
ຕໍ່ໜ້າສະພາບການດັ່ງກ່າວ, ບັນດາກຳລັງປະຕິບັດກົດໝາຍຂອງ ຫວຽດນາມ ໄດ້ມີໜ້າຢູ່ບ່ອນເກີດເຫດໃນທັນທີ, ດຳເນີນການສະກັດກັ້ນການເຄື່ອນໄຫວລະເມີດໃນເຂດທະເລຂອງ ຫວຽດນາມ ຜິດກົດໝາຍຂອງຮ້ານເຈາະນ້ຳມັນ ແລະ ກຳລັງກຳ່ປັນປົກປ້ອງຂອງຈີນ. ທ່ານ ເຈີ່ນຢູຍຫາຍ, ຮອງຫົວໜ້າຄະນະກຳມະການຊາຍແດນແຫ່ງຊາດ ຫວຽດນາມ, ຢືນຢັນວ່າ:
“ພາຍຫຼັງໄດ້ຮັບຂ່າວ ຈີນ ນຳຮ້ານເຈາະນ້ຳມັນນ້ຳເລິກ ໄຮຢາງ 981 ເຂົ້າເຂດໄຫລ່ທະວີບຂອງ ຫວຽດນາມ, ກະຊວງການຕ່າງປະເທດ ໄດ້ມີມາດຕະການຕໍ່ສູ້. ມີການພົບປະສອງຝ່າຍໃນລະດັບຕ່າງໆ 8 ຄັ້ງ. ໃນການເຮັດວຽກຄັ້ງຕ່າງໆ, ຫວຽດນາມ ລ້ວນແຕ່ຢືນຢັນວ່າ: ຈີນ ໄດ້ລະເມີດບັນດາຂໍ້ກຳນົດຂອງກົດໝາຍສາກົນຢ່າງຮ້າຍແຮງ, ລະເມີດບັນດາຂໍ້ຕົກລົງທີ່ການນຳຂັ້ນສູງ 2 ປະເທດໄດ້ຮັບຮອງເອົາ. ຫວຽດນາມ ເດັດດຽວຄັດຄ້ານບັນດາການເຄື່ອນໄຫວຂອງ ຈີນ. ກະຊວງການຕ່າງປະເທດ ຫວຽດນາມ ໄດ້ຮຽກໂຮມອຸປະທູດ ຈີນ ມາເພື່ອມອບສານທາງການຄັດຄ້ານ, ຮຽກຮ້ອງ ຈີນ ຖອນ ຮ້ານເຈາະນ້ຳມັນອອກຈາກເຂດທະເລ ຫວຽດນາມໃນທັນທີ.”
ເມື່ອຕອບສຳພາດຄຳຖາມຂອງສື່ມວນຊົນພາຍໃນ ແລະ ຕ່າງປະເທດ ກ່ຽວກັບບັນດາການກະທຳຂອງ ຫວຽດນາມ ໃນໄລຍະຜ່ານມາ, ໂຄສົກກະຊວງການຕ່າງປະເທດ ຫວຽດນາມ ເລຫາຍບີ່ງ ໃຫ້ຮູ້ວ່າ: ມາຮອດຈຸດເວລານີ້, ເຖິງວ່າ ຈີນ ສືບຕໍ່ເພີ່ມທະວີການເຄື່ອນໄຫວເຄັ່ງຕຶງຢູ່ເຂດທະເລຕາເວັນອອກ ກໍ່ຕາມ, ແຕ່ ຫວຽດນາມ ຍັງຄົງປະຕິບັດບັນດາມາດຕະການຕໍ່ສູ້ດ້ານການທູດບົນພື້ນຖານໂອ້ລົມສົນທະນາສັນຕິພາບ. ເຖິງຢ່າງໃດກໍ່ຕາມ, ຫວຽດນາມ ກໍ່ຈະປະຕິບັດທຸກໆມາດຕະການປົກປັກຮັກສາອະທິປະໄຕທະເລໝູ່ເກາະ ແລະ ການປ້ອງກັນຕົວຖ້າມີຄວາມຈຳເປັນ.