ທ່ານ ເລຫາຍບີງໂຄສົກກະຊວງການຕ່າງປະເທດຫວຽດນາມ
ພາບ:thanhnien.vn
|
(vovworld)-ວັນທີ 11/7, ໂຄສົກກະຊວງການຕ່າງປະເທດຫວຽດນາມ ເລຫາຍບີງ ຊີ້ແຈງວ່າ: ຫວຽດນາມຊົມເຊີຍເລື່ອງສະພາສູງອາເມລິກາ ອອກມະຕິ 412 ຮຽກຮ້ອງຈີນ ຖອນຮ້ານເຈາະນ້ຳມັນໄຮຢາງ 981 ແລະ ບັນດາກຳລັງຄຸ້ມຊູອອກຈາກເຂດເສດຖະກິດຈຳເພາະ ແລະ ໄຫລ່ທະວີບຂອງຫວຽດນາມ, ບໍ່ມີການເຄື່ອນໄຫວໄປຝືນກັບຂໍ້ກຳນົດສາກົນກ່ຽວກັບການປ້ອງກັນຕຳກັນຢູ່ທະເລ, ກ່າວປະນາມການກະທຳນາບຂູ່ຫລືນຳໃຊ້ອາວຸດ, ປ່ຽນແປງສະພາບເດີມຢູ່ທະເລຕາເວັນອອກຫລືກໍ່ຂາດສະຖຽນລະພາບຢູ່ພາກພື້ນ ອາຊີ ປາຊີຟີກ. ທ່ານເລຫາຍບີງ ໃຫ້ຮູ້ວ່າ: ຫວຽດນາມ ປາດຖະຫນາຢາກໃຫ້ບັນດາປະເທດພາຍໃນ ແລະ ນອກພາກພື້ນ, ໃນນັ້ນ ມີອາເມລີກາ ສືບຕໍ່ມີການປະກອບສ່ວນຢ່າງແຮງ, ແທດຈິງ, ມີປະສິດທິຜົນ ແລະ ມີລັກສະນະສ້າງສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພ ແລະ ຄວາມເສລີໃນການເດີນທະເລ, ການບິນຢູ່ພາກພື້ນ.
ເວເນຊູເອລາສະໜັບສະໜູນຫຼັກໝັ້ນຂອງຫວຽດນາມກ່ຽວກັບບັນຫາທະເລຕາເວັນອອກ
ຕອນບ່າຍວັນທີ 10/7, ທ່ານເອກອັກຄະລັດຖະທູດຫວຽດນາມ ປະຈຳເວເນຊູເອລາ ໄດ້ເຮັດວຽກກັບກຸ່ມບັນດາສະມາຊິກລັດຖະສະພາມິດຕະພາບເວເນຊູເອລາ-ຫວຽດນາມ ຂຶ້ນກັບສະພາແຫ່ງຊາດເວເນຊູເອລາ ແລະ ມອບບົດບັນທຶກຊ່ວຍຈຳກ່ຽວກັບເລື່ອງຈີນ ຕັ້ງຮ້ານເຈາະນ້ຳມັນ ໄຮຢາງ 981 ຢ່າງຜິດກົດໝາຍ ໃນເຂດເສດຖະກິດຈຳເພາະ ແລະ ໄຫຼ່ທະວີບຂອງ ຫວຽດນາມ. ທ່ານປະທານກຸ່ມບັນດາສະມາຊິກລັດຖະສະພາມິດຕະພາບເວເນຊູເອລາ-ຫວຽດນາມ ຢືນຢັນວ່າ: ທຸກໆການຂັດແຍ້ງຢູ່ທະເລຕາເວັນອອກຕ້ອງໄດ້ຮັບການແກ້ໄຂຜ່ານການເຈລະຈາໂດຍສັນຕິ ແລະ ເຄົາລົບກົດໝາຍສາກົນ. ເວເນຊູເອລາ ປາດຖະໜາວ່າ, ບັນດາຄວາມບໍ່ລົງລອຍກັນຢູ່ທະເລຕາເວັນອອກລະຫວ່າງຫວຽດນາມ ແລະ ຈີນ ຈະໄດ້ຮັບການແກ້ໄຂໂດຍສັນຕິວິທີ, ຫລີກລ້ຽງເກີດການປະທະກັນດ້ວຍອາວຸດ ເພື່ອແນໃສ່ຮັກສາສະຖຽນລະພາບໃນພາກພື້ນ, ຮັບປະກັນສິດເສລີພາບ, ຄວາມປອດໄພໃນການເດີນທະເລ ແລະ ສາກົນ./.