ຫວຽດນາມຍົກສູງຈຸດສຸມການເຊື່ອມໂຍງກັບສາກົນໃນນະໂຍບາຍການຕ່າງປະເທດ
ການເຮັດວຽກລະຫວ່າງ 2 ຝ່າຍ
(ພາບ: Đỗ Sinh/Vietnam+)
|
(vovworld) - ໃນການຢ້ຽມຢາມ ອັງກິດ ເພື່ອເຂົ້າຮ່ວມການເຈລະຈາຄູ່ຮ່ວມມືຍຸດທະສາດ ຫວຽດນາມ - ອັງກິດ ຄັ້ງທີ 5, ຕອນບ່າຍວັນທີ 7/3, ທ່ານ ບູ່ຍແທງເຊີນ, ລັດຖະມົນຕີຊ່ວຍວ່າການກະຊວງການຕ່າງປະເທດ ໄດ້ມີບົດປາຖະກະຖາ ຢູ່ສະຖາບັນຄົ້ນຄ້ວາສາກົນ ແຫ່ງລາຊະອານາຈັກ ອັງກິດ ກ່ຽວກັບການເຊື່ອມໂຍງກັບສາກົນຂອງ ຫວຽດນາມ. ທ່ານ ລັດຖະມົນຕີຊ່ວຍວ່າການ ບູ່ຍແທງເຊີນ ຢືນຢັນວ່າ, ການເຊື່ອມໂຍງກັບສາກົນ ແມ່ນຈຸດສຸມຢ່າງສະເໝີຕົ້ນສະເໝີປາຍໃນນະໂຍບາຍການຕ່າງປະເທດຂອງ ຫວຽດນາມ ໃນປະຈຸບັນ ແລະ ໃນຫຼາຍປີຈະມາເຖິງ. ປະຈຸບັນ, ຫວຽດນາມ ມີ 15 ຄູ່ຮ່ວມມືຍຸດທະສາດ ແລະ 10 ຄູ່ຮ່ວມມືຮອບດ້ານ, ເປັນສະມາຊິກຕັ້ງໜ້າ, ມີຄວາມຮັບຜິດຊອບ ດ້ວຍການປະກອບສ່ວນແທດຈິງຫຼາຍຢ່າງເພື່ອຜົນປະໂຫຍດລວມຂອງປະຊາຄົມສາກົນ, ພິເສດແມ່ນໃນອາຊຽນ, ເວທີປາໄສຮ່ວມມື ອາຊີ - ເອີລົບ (ອາແຊມ), ສະພາສິດທິມະນຸດ, ສະພາຄວາມໝັ້ນຄົງສະຫະປະຊາຊາດ… ຫວຽດນາມ ໄດ້ລົງນາມໃນຂໍ້ຕົກລົງດ້ານການຄ້າເສລີ (FTA).
ທ່ານ ລັດຖະມົນຕີຊ່ວຍວ່າການ ບູ່ຍແທງເຊີນ ເນັ້ນໜັກວ່າ, ໃນວິວັດແຫ່ງການເປີດປະຕູ ແລະ ເຊື່ອມໂຍງຂອງຕົນ, ຫວຽດນາມ ຍາມໃດກໍ່ຖືເປັນສຳຄັນບົດບາດຂອງອັງກິດ ແລະ ປາຖະໜາຢາກຮ່ວມມືຮອບດ້ານກັບ ອັງກິດໃນທຸກຂົງເຂດ. ໃນໄລຍະຈະມາເຖິງ, ສອງຝ່າຍສຸມໃສ່ເຂົ້າໃນການປະຕິບັດ 7 ບຸລິມາສິດ ເຊິ່ງໄດ້ເປັນເອກະພາບນຳກັນໃນການຢ້ຽມຢາມ ຫວຽດນາມ ຂອງທ່ານ ນາຍົກລັດຖະມົນຕີ ອັງກິດ David Cameron ເມື່ອເດືອນ 7/2015, ເຊິ່ງລວມມີການຮ່ວມມືດ້ານການເມືອງ - ຍຸດທະສາດ, ການປ້ອງກັນຊາດ - ປ້ອງກັນຄວາມສະຫງົບ, ການຄ້າ - ການລົງທຶນ, ການຮ່ວມມືພັດທະນາ, ການສຶກາ - ບຳລຸງສ້າງ - ວັດທະນະທຳ, ວິທະຍາສາດ - ເຕັກໂນໂລຢີ, ການອອກແຮງງານ.