ຫວຽດນາມຕັ້ງໜ້າເຂົ້າຮ່ວມຍຸດທະສາດເສດຖະກິດພາສາຝຣັ່ງ
ຄະນະຜູ້ແທນຫວຽດນາມ ເຂົ້າຮ່ວມກອງປະຊຸມ
(ພາບ: Thống Nhất/TTXVN)
(vovworld) - ວັນທີ 30/11, ກອງປະຊຸມຂັ້ນສູງບັນດາປະເທດໃຊ້ພາສາຝຮັ່ງ ຄັ້ງທີ 15 ອັດລົງຢູ່ນະຄອນຫຼວງ Dakar, Senegal. ການນຳຂັ້ນສູງບັນດາປະເທດສະມາຊິກຮັບຮອງເອົາເອກະສານສຳຄັນມີລັກສະນະກຳນົດທິດໃຫ້ບັນດາການເຄື່ອນໄຫວຂອງປະຊາຄົມໃຊ້ພາສາຝຣັ່ງ ໃນໄລຍະຈະມາເຖິງ, ຈາກບັນດາຂົງເຂດສັນຕິພາບ, ປ້ອງກັນຄວາມສະຫງົບ, ພາສາເປັນຫຼາຍຮູບແບບ ແລະ ວັດທະນະທຳ, ການສຶກສາຕະຫຼອດຮອດການຮ່ວມມືເສດຖະກິດ, ພັດທະນາແບບຍືນຍົງ. ພິເສດ, ກອງປະຊຸມຮັບຮອງເອົາຍຸດທະສາດເສດຖະກິດພາສາຝຣັ່ງ, ສ້າງພື້ນຖານໃຫ້ບັນດາການເຄື່ອນໄຫວຊຸກຍູ້ການຮ່ວມມືເສດຖະກິດໃນການໃຊ້ພາສາຝຣັ່ງ ໄລຍະຈະມາເຖິງ. ກອງປະຊຸມກໍ່ຮັບຮອງເອົາ 9 ມະຕິກ່ຽວກັບສະພາບວິກິດການ, ການປະທະກັນຢູ່ບາງປະເທດ ແລະເຂດແຄ້ວນ, ຕ້ານກໍ່ການຮ້າຍ, ການສຶກສາ ແລະ ບຳລຸງສ້າງ… ເປັນຄັ້ງທຳອິດ, ບັນດາການນຳລັດ ແລະ ລັດຖະບານບັນດາປະເທດໃຊ້ພາສາຝຣັ່ງ ກໍ່ເຕື້ອງເຖິງບັນຫາທະເລຕາເວັນອອກ, ສະແດງຄວາມວິຕົກວັງວົນຢ່າງເລິກເຊິ່ງກ່ຽວກັບສະພາບການຢູ່ທະເລຕາເວັນອອກໃນໄລຍະຜ່ານມາ, ຮຽກຮ້ອງໃຫ້ບັນດາຝ່າຍກ່ຽວຂ້ອງຈົ່ງລະງັບໃຈ, ແກ້ໄຂຄວາມຂັດແຍ້ງກັນໂດຍສັນຕິວິທີ, ບົນພື້ນຖານເຄົາລົບກົດໝາຍສາກົນ, ໃນນັ້ນມີສົນທິສັນຍາຂອງ ສປຊ ກ່ຽວກັບກົດໝາຍທະເລປີ 1982. ກອງປະຊຸມໄດ້ເລືອກຕັ້ງທ່ານນາງ Michaelle Jean ເປັນເລຂາທິການໃຫຍ່ຄົນໃໝ່. ຄະນະຜູ້ແທນ ຫວຽດນາມ ໂດຍທ່ານນາງ ຫງວຽນທິຢວານ, ຮອງປະທານປະເທດເປັນຫົວໜ້າຄະນະໄດ້ເຂົ້າຮ່ວມກອງປະຊຸມ. ຢູ່ນອກກອງປະຊຸມ, ທ່ານນາງ ຫງວຽນທິຢວານ ມີການພົບປະກັບການນຳ 2 ປະເທດ, ເລຂາທິການໃຫຍ່ບັນດາປະເທດໃຊ້ພາສາຝຮັ່ງເພື່ອແລກປ່ຽນບັນດາມາດຕະການເພື່ອຊຸກຍູ້ການພົວພັນ 2 ຝ່າຍ ແລະ ແລກປ່ຽນກ່ຽວກັບບັນດາບັນຫາທີ່ຕ່າງຝ່າຍຕ່າງມີຄວາມສົນໃຈ.