ຫວຽດນາມຕັດສິນໃຈປົກປັກຮັກສາອະທິປະໄຕຜືນແຜ່ນດິນຂອງປະເທດຊາດ
ທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມກວາງວິງ
(ພາບ: http://vtc.vn/)
|
(vovworld)- ວັນທີ 29/5 ທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມກວາງວິງ ໄດ້ມີການຕອບສຳພາດຜູ້ດຳເນີນລາຍການ, ບັນນາທິການ Kristie Lu Stout ຂອງລາຍການ News Stream ຂອງ CNN. ທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມກວາງວິງ ໄດ້ຢັ້ງຢືນອະທິປະໄຕ ຂອງຫວຽດນາມທີ່ມີຕໍ່ໝູ່ເກາະ ຮ່ວາງຊາ, ສິດອະທິປະໄຕ, ສິດອຳນາດສານ ທີ່ມີຕໍ່ບັນດາເຂດທະເລຕາມຂໍ້ກຳນົດຂອງ ສົນທິສັນຍາສະຫະປະຊາຊາດ ກ່ຽວກັບກົດໝາຍທະເລປີ 1982; ຄັດຄ້ານຢ່າງຮຸນແຮງເລື່ອງຈີນຕັ້ງຮ້ານເຈາະນ້ຳມັນໄຮຢາງ 981 ພ້ອມດ້ວຍບັນດາກຳປັ່ນຄຸ້ມກັນ, ນັບທັງກຳປັ່ນທະຫານລ່ວງລ້ຳເລິກເຂົ້າເຂດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ, ລ່ວງລະເມີດກົດໝາຍສາກົນ, ສົ່ງຜົນສະທ້ອນໂດຍກົງເຖິງສັນຕິພາບ, ສະຖຽນລະພາບ, ຄວາມສະຫງົບປອດໄພ ແລະ ສິດເສລີໃນການເດີນທະເລ; ຮຽກຮ້ອງຈີນຕ້ອງຖອນຮ້ານເຈາະນ້ຳມັນໄຮຢາງ 981 ພ້ອມດ້ວຍບັນດາກຳປັ່ນຄຸ້ມກັນ ອອກຈາກເຂດທ່ານທະເລຂອງຫວຽດນາມ. ເລື່ອງຈີນນຳໃຊ້ກຳລັງອາວຸດຢຶດຄອງໝູ່ເກາະຮ່ວາງຊາຂອງຫວຽດນາມ ແມ່ນໄດ້ລ່ວງລະເມີດກົດໝາຍສາກົນ ແລະ ບໍ່ອາດຮັບຮູ້ໄດ້. ທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມກວາງວິງ ຊີ້ແຈ້ງວ່າ ຫວຽດນາມຄັດຄ້ານຢ່າງຮຸນແຮງເລື່ອງຈີນຢຶດຄອງໝູ່ເກາະຮ່ວາງຊາຂອງຫວຽດນາມຢ່າງຜິດກົດໝາຍ; ຫວຽດນາມຕັດສິນໃຈປົກປັກຮັກສາອະທິປະໄຕຜືນແຜ່ນດິນ ແລະ ບັນດາຜົນປະໂຫຍດອັນຊອບທຳຂອງຕົນຢູ່ທະເລຕາເວັນອອກດ້ວຍບັນດາມາດຕະການໂດຍສັນຕິວິທີ, ສອດຄ່ອງກັບກົດໝາຍສາກົນ, ໃນນັ້ນມີສົນທິສັນຍາສະຫະປະຊາຊາດ ກ່ຽວກັບກົດໝາຍທະເລປີ 1982 .
ກ່ຽວຂ້ອງເຖິງກໍລະນີກຳປັ່ນຫາປາຂອງຫວຽດນາມຖືກກຳປັ່ນຈີນຕຳໃຫ້ຈົມໃຕ້ນ້ຳຢູ່ເຂດຫາປາທີ່ມີມາແຕ່ດົນນານ ແລະ ຂຶ້ນກັບເຂດເສດຖະກິດຈຳເພາະຂອງຫວຽດນາມ, ທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມ ກວາງວິງຢືນຢັນວ່າ : ບັນດາການກະທຳຂອງຈີນແມ່ນໄດ້ລ່ວງລະເມີດກົດໝາຍສາກົນ, ທຳລາຍຊີວິດອີນຊີ , ຊັບສິນ ແລະ ຜົນປະໂຫຍດອັນຊອບທຳຂອງຊາວປະມົງຫວຽດນາມ. ຫວຽດນາມຮຽກຮ້ອງຈີນຈົ່ງຢຸດຕິບັນດາການກະທຳໄຮ້ມະນຸດສະທຳ, ເຄົາລົບກົດໝາຍສາກົນ ແລະ ບໍ່ປະໃຫ້ເກີດການກະທຳເຊັ່ນດຽວກັນຄືນໃໝ່. ທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມ ກວາງວິງເນັ້ນໜັກວ່າ ການກະທຳຂອງຈີນຢູ່ທະເລເລຕາເວັນອອກ ຍິ່ງເຮັດໃຫ້ເພີ່ມທະວີຄວາມເຄັ່ງຕຶງ, ສົ່ງຜົນຮ້າຍຕໍ່ສັນຕິພາບ, ຄວາມສະຫງົບປອດໄພໃນການເດີນທະເລຢູ່ພາກພື້ນ.