ຫວຽດນາມຖືມົງໂກນແມ່ນຄູ່ຮ່ວມມືສຳຄັນ
 |
(vovworld)- ຕອນບ່າຍວັນທີ 4/4 ຢູ່ ຮ່າໂນ້ຍ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ໃຫ້ການຕ້ອນຮັບລັດຖະມົນຕີການຕ່າງປະເທດ ມົງໂກນ Tsend Munkh Orgil ພວມຢ້ຽມຢາມຫວຽດນາມ ຢ່າງເປັນທາງການ. ທ່ານນາຍົກລັດຖະມົນຕີ ຫງວຽນຊວນຟຸກ ຢືນຢັນວ່າ: ໃນນະໂຍບາຍການຕ່າງປະເທດ, ຫວຽດນາມ ຍາມໃດກໍຖື ມົງໂກນ ແມ່ນຄູ່ຮ່ວມມືສຳຄັນ ແລະ ປາດຖະຫນາຢາກເພີ່ມທະວີການພົວພັນທີ່ເປັນມູນເຊື້ອລະຫວ່າງສອງປະເທດໃຫ້ນັບມື້ນັບພັດທະນາຢ່າງແຮງ. ທ່ານນາຍົກລັດຖະມົນຕີ ຫງວຽນຊວນຟຸກ ສະເຫນີ: ສອງປະເທດສືບຕໍ່ຮັກສາບັນດາການຢ້ຽມຢາມ ແລະ ພົບປະຂັ້ນສູງ, ເປີດກວ້າງການພົວພັນຮ່ວມມືໃນບັນດາຂົງເຂດຄື: ການທູດ, ການປ້ອງກັນຄວາມສະຫງົບ, ປ້ອງກັນຊາດ. ພ້ອມກັບການປະສານສົມທົບທີ່ບັນດາເວທີປາໄສສາກົນ ແລະ ພາກພື້ນເປັນຢ່າງດີ, ຫວຽດນາມ ກໍສະເຫນີ ມົງໂກນ ສະຫນັບສະຫນູນຫລັກໝັ້ນຂອງຫວຽດນາມ ແລະ ອາຊຽນ ກ່ຽວກັບການຮັກສາສັນຕິພາບ, ສະຖຽນລະພາບ ແລະ ຮັບປະກັນຄວາມໝັ້ນຄົງ, ຄວາມປອດໄພ ແລະ ຄວາມເສລີໃນການເດີນທະເລ, ການບິນ ຢູ່ທະເລຕາເວັນອອກ, ເຄົາລົບວິວັດການການທູດ ແລະ ນິຕິທຳຢ່າງຄົບຖ້ວນ, ແກ້ໄຂບັນດາຄວາມຂັດແຍ້ງໂດຍສັນຕິວິທີບົນພື້ນຖານກົດໝາຍສາກົນ, ໃນນັ້ນ ມີສົນທິສັນຍາ ສປຊ ກ່ຽວກັບກົດໝາຍທະເລປີ 1982. ສ່ວນທ່ານລັດຖະມົນຕີ Tsend Munkh Orgil ແຈ້ງໃຫ້ທ່ານນາຍົກລັດຖະມົນຕີ ຊາບກ່ຽວກັບໝາກຜົນອັນດີງາມຂອງການເຈລະຈາກັບທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບີງມີງ.