ຫວຽດນາມນັບມື້ນັບມີບົດບາດສຳຄັນໃນການຮັບປະກັນສັນຕິພາບ,ສະຖຽນລະພາບໃນໂລກ
ທ່ານຮອງນາຍົກລັດຖະມົນຕີ, ລັດຖະມົນຕີວ່າການ
ກະຊວງການຕ່າງປະເທດ ຟ້າມບິ່ງມິງ
(ພາບ: thế giới & Việt Nam)
(vovworld) – “ການທູດຫວຽດນາມ: 70 ປີທີ່ເປັນມູນເຊື້ອ ແລະ ກຳນົດທິດອະນາຄົດ” ແມ່ນຊື່ຂອງກອງປະຊຸມສຳມະນາໂດຍກະຊວງການຕ່າງປະເທດຫວຽດນາມ ຈັດຕັ້ງໃນຕອນເຊົ້າວັນທີ 20/08, ຢູ່ຮ່າໂນ້ຍ, ເນື່ອງໃນໂອກາດສະເຫຼີມສະຫຼອງ 70 ປີແຫ່ງວັນປະຕິວັດເດືອນສິງຫາ, ວັນສະຖາປະນາທີ 02 ກັນຍາ ແລະ 70 ປີແຫ່ງວັນສ້າງຕັ້ງຂະແໜງການທູດຫວຽດນາມ. ເຂົ້າຮ່ວມກອງປະຊຸມສຳມະນາມີທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຟ້າມບິ່ງມິງ, ພ້ອມກັບເອກອັກຄະລັດຖະທູດ, ຮອງເອກອັກຄະລັດຖະທູດ, ຜູ້ຕາງໜ້າບັນດາອົງການຈັດຕັ້ງສາກົນ, ອົງການຈັດຕັ້ງພາກພື້ນຢູ່ຫວຽດນາມ ກວ່າ 50 ທ່ານ. ກ່າວຄຳເຫັນທີ່ກອງປະຊຸມສຳມະນາ, ທ່ານຮອງນາຍົກລັດຖະມົນຕີ ຟ້າມບິ່ງມິງ ຢືນຢັນວ່າ.
“ແຜນນະໂຍບາຍເຊື່ອມໂຍງເຂົ້າກັບສາກົນຢ່າງເລິກເຊິ່ງ, ກວ້າງຂວາງຂອງຫວຽດນາມ ຈະໄດ້ຮັບການຍູ້ແຮງກວ່າອີກ, ຫວຽດນາມ ຈະມານະພະຍາຍາມນຳບັນດາການພົວພັນການຕ່າງປະເທດໃຫ້ເຂົ້າສູ່ລວງເລິກ, ພັດທະນາການພົວພັນກັບບັນດາຄູ່ຮ່ວມມືຫຼັກແຫຼ່ງ ແລະ ປະເທດເພື່ອນມິດທີ່ເປັນມູນເຊື້ອ. ໃນການທູດຫຼາຍຝ່າຍ, ຫວຽດນາມ ສືບຕໍ່ຮັກສາບົດບາດສະມາຊິກທີ່ເປັນເຈົ້າການ, ຕັ້ງໜ້າ ແລະ ມີຄວາມຮັບຜິດຊອບຂອງອາຊຽນ, ກໍຄືບັນດາກົນໄກຫຼາຍຝ່າຍອື່ນ, ກ່ອນອື່ນໝົດແມ່ນສະຫະປະຊາຊາດ”.
ທີ່ກອງປະຊຸມສຳມະນາ, ບົດປະກອບຄວາມເຫັນຂອງບັນດາເອກອັກຄະລັດຖະທູດ, ຮອງເອກອັກຄະລັດຖະທູດ, ຜູ້ຕາງໜ້າບັນດາອົງການຈັດຕັ້ງພາກພື້ນ ແລະ ສາກົນລ້ວນແຕ່ຢືນຢັນວ່າ, ໃນຕະຫຼອດ 70 ປີທີ່ຜ່ານມາ, ຍາມໃດຫວຽດນາມ ກໍຮັກສາພື້ນຖານການທູດສັນຕິພາບໃກ້ຊິດ, ຄ່ອງແຄ້ວ ແລະ ນັບມື້ນັບປະກອບສ່ວນຢ່າງຕັ້ງໜ້າໃຫ້ສັນຕິພາບ, ສະຖຽນລະພາບ ແລະ ວັດທະນາຖາວອນໃນພາກພື້ນ ກໍຄືໃນໂລກ.