ຫວຽດນາມປະກອບສ່ວນຕັ້ງໜ້າຢູ່ກອງປະຊຸມAMM48
ທ່ານ ລັດຖະມົນຕີວ່າການກະຊວງການຕ່າງປະເທດຫວຽດນາມ
ຟ້າມບິ່ງມິນ ເປັນປະທານຮ່ວມກອງປະຊຸມອາຊຽນ-ອີຢູ
(ພາບ:TTXVN)
(vovworld) – ພາຍຫຼັງສິ້ນສຸດກອງປະຊຸມ AMM ຄັ້ງທີ 48 ແລະ ບັນດາກອງປະຊຸມທີ່ກ່ຽວຂ້ອງ, ວັນທີ 6/8, ເມື່ອຕອບສຳພາດຕໍ່ນັກຂ່າວວິທະຍຸກະຈາຍສຽງຫວຽດນາມ, ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດຫວຽດນາມ ຟ້າມບິ່ງມິນ ຢືນຢັນວ່າ: ກອງປະຊຸມດັ່ງກ່າວບັນລຸໄດ້ຜົນງານຫຼາຍຢ່າງທີ່ສຳຄັນ ແລະ ຄະນະຜູ້ແທນຫວຽດນາມ ໄດ້ເຂົ້າຮ່ວມຢ່າງຕັ້ງໜ້າ. ທ່ານລັດຖະມົນຕີວ່າການກະຊວງການຕ່າງປະເທດຫວຽດນາມ ຟ້າມບິ່ງມິນ ກ່າວວ່າ:
“ພວກເຮົາຢືນຢັນວ່າ ຈະສືບຕໍ່ປະຕິບັດເພື່ອຮັບປະກັນການປະຕິບັດບັນດາຄຳໝັ້ນສັນຍາໃນອາຊຽນ ເພື່ອປະກອບສ່ວນໃນການສ້າງຕັ້ງປະຊາຄົມອາຊຽນ ໃນທ້າຍປີ 2015. ພວກເຮົາກໍປະກອບສ່ວນໃນການເພີ່ມທະວີບົດບາດຂອງອາຊຽນ, ພິເສດແມ່ນບົນບາດໃຈກາງ ເຊິ່ງຕົ້ນຕໍແມ່ນສ້າງຄວາມສາມັກຕີ, ຄວາມເຫັນດີເຫັນພ້ອມໃນທຸກບັນຫາ ແລະ ເລື່ອງຫວຽດນາມ ປະກອບສ່ວນໃນການສະເໜີຢ່າງລະອຽດກ່ຽວກັບຄູ່ຮ່ວມມືຂອງຫວຽດນາມ ຈາກບັນດາຂົງເຂດເສດຖະກິດ, ການຮ່ວມມື, ການຄ້າ ຕະຫຼອດຮອດການລົງທຶນ ແລະ ຄວາມໝັ້ນຄົງ. ”
ເມື່ອແບ່ງປັນກ່ຽວກັບໜຶ່ງໃນບັນດາບັນຫາສຳຄັນທີ່ໄດ້ຮັບການປຶກສາຫາລືຢູ່ບັນດາກອງປະຊຸມຄັ້ງນີ້ແມ່ນສະພາບການຢູ່ທະເລຕາເວັນອອກ. ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດຫວຽດນາມ ຟ້າມບິ່ງມິນ ຢືນຢັນວ່າ:
“ ນີ້ແມ່ນໜຶ່ງໃນບັນດາຫົວເລື່ອງທີ່ໄດ້ຮັບການເຫັນດີສູງພໍສົມຄວນ ແລະ ສະແດງຄວາມວິຕົກກັງວົນຈາກບັນດາລັດຖະມົນຕີອາຊຽນ. ນີ້ກໍແມ່ນຄັ້ງທຳອິດທີ່ບັນດາລັດຖະມົນຕີວ່າການກະຊວງການຕ່າງປະເທດອາຊຽນສະແດງ ຄວາມວິຕົກກັງວົນລວມ ກ່ຽວກັບບັນຫາກໍ່ສ້າງຖົມດິນເປັນເກາະ, ຢູ່ເວທີປາໄສອາຊຽນ ຄັ້ງນີ້. ບັນດາລັດຖະມົນຕີລ້ວນແຕ່ເນັ້ນໜັກວ່າ: ຄວນປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກຢ່າງເຂັ້ມງວດ, ພິເສດແມ່ນກ່ຽວຂ້ອງເຖິງເລື່ອງຮັກສາສະພາບເດີມ, ບໍ່ປ່ຽນແປງ ຫຼື ເຮັດໃຫ້ສະພາບການຢູ່ເຂດທະເລຕາເວັນອອກສັບສົນຂຶ້ນຕື່ມ. ບັນດາລັດຖະມົນຕີກໍຢືນຢັນຄວາມຕັດສິນໃຈວ່າ: ຄວນກ້າວໄປເຖິງການລົງນາມໃນປະມວນຂໍ້ກຳນົດກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (COC) ໂດຍໄວ ເພື່ອປະກອບສ່ວນຮັກສາສັນຕິພາບ ແລະ ສະຖຽນລະພາບຢູ່ທະເລຕາເວັນອອກ”.