ທ່ານນາຍົກລັດຖະມົນຕີ ຫງວຽນເຕີນຢູງ ຕ້ອນຮັບລັດຖະມົນຕີການ
ຕ່າງປະເທດ ອີຕາລີ Giulio Terzidi Sant Agata
(vov) - ຕອນບ່າຍວັນທີ 29/2 ຢູ່ ຮ່າໂນ້ຍ, ທີ່ການຕ້ອນຮັບທ່ານ Giulio Terzidi Sant Agata ລັດຖະມົນຕີການຕ່າງປະເທດ ອີຕາລີທີ່ພວມຢ້ຽມຢາມ ແລະ ເຮັດວຽກຢູ່ຫວຽດນາມ, ທ່ານນາຍົກລັດຖະມົນຕີ ຫງວຽນເຕີນຢູງ ປາດຖະຫນາວ່າ ສອງຝ່າຍຈະ ມານະພະຍາຍາມຊອກຫາບັນດາມາດຕະການເພື່ອນຳການພົວພັນລະຫວ່າງສອງປະເທດເຂົ້າສູ່ລວງເລິກ, ເປັນຕົ້ນແມ່ນໃນຂົງເຂດເສດຖະກິດ, ການຄ້າ, ການລົງທຶນ, ສະເຫນີໃຫ້ ອີຕາລີ ສະຫງວນທຶນ ODA ໃຫ້ແກ່ຫວຽດນາມໃນຂົງເຂດບຳລຸງສ້າງແຫລ່ງຊັບພະຍາກອນມະນຸດ. ທ່ານນາຍົກລັດຖະມົນຕີ ຫງວຽນເຕີນຢູງ ຊົມເຊີຍບັນດາວິສາຫະກິດໃຫຍ່ຂອງ ອີຕາລີ ທີ່ໄດ້ມາຢ້ຽມຢາມ ແລະ ຊອກຫາກາລະໂອກາດລົງທຶນຢູ່ ຫວຽດນາມ ແລະ ຢັ້ງຢືນວ່າ ລັດຖະບານຫວຽດນາມ ຈະສ້າງເງື່ອນໄຂສະດວກເພື່ອໃຫ້ບັນດາວິສາຫະກິດ ອີຕາລີ ລົງທຶນຢູ່ຫວຽດນາມ ສຳເລັດຜົນ.
ໃນວັນດຽວກັນ, ທ່ານ ລັດຖະມົນຕີການຕ່າງປະເທດຫວຽດນາມ ຟ້າມບີ່ນມີນ ໄດ້ມີການເຈລະຈາກັບລັດຖະມົນຕີການຕ່າງປະເທດ ອີຕາລີ Giulio Terzidi Sant Agata, ທ່ານລັດຖະມົນຕີ ຟ້າມບີ່ນມີນ ຢືນຢັນ ວ່າ ຍາມໃດ ຫວຽດນາມ ກໍຖືບົດບາດ, ທ່ີຕັ້ງຂອງ ອີຕາລີ ຢູ່ ເອີລົບ ແລະ ໃນໂລກເປັນສຳຄັນ ແລະ ປາດຖະຫນາຢາກພັດທະນາການພົວພັນມິດຕະພາບ ແລະ ການຮ່ວມມືຮອບດ້ານກັບ ອີຕາລີ. ທ່ານລັດຖະມົນຕີການຕ່າງປະເທດ ຫວຽດນາມ ຟ້າມບີ່ນມີນ ໃຫ້ຮູ້ວ່າ:
“ພວກຂ້າພະເຈົ້າເຫັນດີເປັນເອກະພາບສ້າງເງື່ອນໄຂສະດວກເພື່ອໃຫ້ບັນດາວິສາຫະກິດ, ນັກລົງທຶນຂອງສອງປະເທດຮ່ວມສຳພັນເປັນຄູ່ຮ່ວມມື, ຊອກຮູ້ຕະຫລາດ, ພິເສດແມ່ນໃນບັນດາຂົງເຂດທີ່ອີຕາລີ ມີທ່າແຮງ ແລະ ຫວຽດນາມມີຄວາມຕ້ອງການຄື: ພື້ນຖານໂຄງລ່າງ, ກົນຈັກ, ສາທາລະນະສຸກ, ສິ່ງແວດລ້ອມ, ການຮ່ວມມືລະຫວ່າງວິສາຫະກິດຂະຫນາດກາງ ແລະ ນ້ອຍ.”
ສອງຝ່າຍເຫັນດີຈະເພີ່ມທະວີການແລກປ່ຽນບັນດາຄະນະຜູ້ແທນຂັ້ນຕ່າງໆ, ສູ້ຊົນນຳວົງເງິນການຄ້າສອງສົ້ນຂຶ້ນລະດັບ 3 ຕື້ USD ໃນໄລຍະ 2012 -2013. ສອງຝ່າຍກໍແລກປ່ຽນກ່ຽວກັບບາງບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ, ຢືນຢັນຄວາມປາດຖະຫນາຢາກສືບຕໍ່ປະສານສົມທົບກັນຢ່າງແຫນ້ນແຟ້ນ ແລະ ສະຫນັບສະຫນູນເຊິ່ງກັນ ແລະ ກັນ ໃນບັນດາເວທີປາໄສສາກົນ ແລະ ພາກພື້ນ ເປັນຕົ້ນແມ່ນໃນຂອບເຂດສະຫະປະຊາຊາດ, ASEAN, EU, ASEM.