ຫວຽດນາມປາດຖະໜາບັນດາຝ່າຍກ່ຽວຂ້ອງລະງັບໃຈ,ຊອກຫາມາດຕະການສັນຕິພາບຂອງຢູແກຼນແລະພາກພື້ນ
ໂຄສົກກະຊວງການຕ່າງປະເທດ ຫວຽດນາມ ເລຫາຍບີ່ງ
(vovworld) – ວັນທີ 18/7, ເມື່ອຕອບຄຳຖາມຂອງນັກຂ່າວກ່ຽວກັບປະຕິກິລິຍາຂອງ ຫວຽດນາມ ຕໍ່ໜ້າສະພາບຄວາມເຄັ່ງຕຶງຢູ່ພາກຕາເວັນອອກ ຢູແກຼນ ໃນຊຸມວັນມໍ່ໆມານີ້, ໂຄສົກກະຊວງການຕ່າງປະເທດ ຫວຽດນາມ ເລຫາຍບີ່ງ, ໃຫ້ຮູ້ວ່າ: ຫວຽດນາມ ມີຄວາມວິຕົກວັງວົນຢ່າງເລິກເຊິ່ງຕໍ່ການຜັນແປທີ່ສັບສົນ ແລະ ສະພາບການໃຊ້ຄວາມຮຸນແຮງພວມເພີ່ມຂຶ້ນຢູ່ບັນດາແຂວງພາກຕາເວັນອອກ ຢູແກຼນ. ຫວຽດນາມ ປາດຖະໜາວ່າບັນດາຝ່າຍກ່ຽວຂ້ອງລະງັບໃຈ, ຫຼີກລ້ຽງບັນດາການກະທຳທີ່ເຮັດໃຫ້ສະພາບການສັບສົນຂຶ້ນຕື່ມ ແລະ ກໍ່ຄວາມເສຍຫາຍໃຫ້ແກ່ປະຊາຊົນ. ກ່ຽວຂ້ອງເຖິງສະພາບປະຊາຄົມຊາວ ຫວຽດນາມ ຢູ່ ຢູແກຼນ, ພິເສດແມ່ນຢູ່ພາກຕາເວັນອອກ ຢູແກຼນ ນັ້ນ, ກົມກົງສູນ, ກະຊວງການຕ່າງປະເທດ ໃຫ້ຮູ້ວ່າ: ປະຈຸບັນມີຊາວ ຫວຽດນາມ ປະນາມ 5.000 ຄົນພວມດຳລົງຊີວິດ, ຮຳ່ຮຽນ ແລະ ທຳມາຫາກິນຢູ່ພາກຕາເວັນອອກ ຢູແກຼນ. ກະຊວງການຕ່າງປະເທດ ຫວຽດນາມ ໄດ້ສະເໜີ ແລະ ໄດ້ຮັບການເຫັນດີຈາກອຳນາດການປົກຄອງ ຢູແກຼນ ຈະສົມທົບກັນເພື່ອຮັບປະກັນຄວາມປອດໄພ, ຄວາມສະຫງົບໃຫ້ປະຊາຄົມຊາວ ຫວຽດນາມ ຢູ່ທີ່ນີ້. ກະຊວງການຕ່າງປະເທດ ຫວຽດນາມ ກໍ່ໄດ້ກະກຽມບັນດາວິທີການອົບປະຍົບພົນລະເມືອງໃນກໍລະນີທີ່ຈຳເປັນ.