ທ່ານຮອງຫົວໜ້າຄະນະຂົນຂວາຍປະຊາຊົນສູນກາງ ໂງທິຢວານແທງ
(ພາບ: ອິນເຕີແນັດ)
(vovworld) – ໃນລະຫວ່າງວັນທີ 8 – 12/12, ພັກອົງການເອກະພາບແຫ່ງຊາດ ມາເລເຊຍ (UMNO) ໄດ້ຈັດຕັ້ງກອງປະຊຸມໃຫຍ່ປະຈຳປີຄັ້ງທີ 69 ຢູ່ນະຄອນຫລວງ ກົວລາລຳເປີ, ມາເລເຊຍ. ກ່າວຄຳເຫັນທີ່ວາລະໄຂ, ທ່ານປະທານພັກ UMNO ທັງເປັນນາຍົກລັດຖະມົນຕີ ມາເລເຊຍ ທ່ານ Najib Razak ຢືນຢັນວ່າ: ແຜນນະໂຍບາຍຂອງ ມາເລເຊຍ ແມ່ນຄວາມປອງດອງຊາດ, ສ້າງປະເທດອິດສະລາມໃຫ້ມີຄວາມສະຫງົບສຸກ, ກ່າວປະນາມລັດທິອິດສະລາມຫົວຮຸນແຮງ; ຖືເປັນສຳຄັນວຽກງານກໍ່ສ້າງລຸ້ນໜຸ່ມ ເຊິ່ງແມ່ນອະນາຄົດຂອງພັກ ແລະ ປະເທດຊາດ; ມານະພະຍາຍາມສຳເລັດຄາດໝາຍນຳ ມາເລເຊຍ ກາຍເປັນປະເທດພັດທະນາໃນປີ 2020. ທີ່ກອງປະຊຸມໃຫຍ່ຂອງ UMNO ມີ 33 ຄະນະຜູ້ແທນບັນດາພັກການເມືອງທີ່ມາຈາກ 21 ປະເທດໃນໂລກເຂົ້າຮ່ວມ. ຄະນະຜູ້ແທນພັກກອມມູນິດ ຫວຽດນາມ ໂດຍທ່ານນາງຮອງຫົວໜ້າຄະນະຂົນຂວາຍປະຊາຊົນສູນກາງ ເປັນຫົວໜ້າຄະນະ ເຂົ້າຮ່ວມກອງປະຊຸມໃຫຍ່. ໃນໄລຍະເຂົ້າຮ່ວມກອງປະຊຸມໃຫຍ່, ຮອງຫົວໜ້າຄະນະຂົນຂວາຍປະຊາຊົນສູນກາງ ໂງທິຢວານແທງ ໄດ້ເຂົ້າຢ້ຽມຂ່ຳນັບທ່ານປະທານພັກ UMNO, ນາຍົກລັດຖະມົນຕີ ມາເລເຊຍ Najib Razak ແລະ ພົບປະກັບເລຂາທິການໃຫຍ່ UMNO ລັດຖະມົນຕີຜຶນແຜ່ນດິນ ມາເລເຊຍ ທ່ານ Binj Tengku Mansor. ທີ່ບັນດາການພົບປະ, ທ່ານນາງ ໂງທິຢວານແທງ ຢືນຢັນວ່າ: ພັກ, ລັດ ຫວຽດນາມ ປາດຖະໜາຢາກເພີ່ມທະວີການພົວພັນລະຫວ່າງ 2 ພັກ, 2 ລັດກ່ວາອີກ ແລະ ພ້ອມແລ້ວທີ່ຈະສົມທົບກັບ ມາເລເຊຍ ຢ່າງມີປະສິດທິຜົນ ຢູ່ບັນດາເວທີປາໄສພາກພື້ນ ແລະ ສາກົນ; ພ້ອມກັນຮ່ວມແຮງຮ່ວມໃຈສ້າງປະຊາຄົມ ອາຊຽນ ສາມັກຄີ, ໝັ້ນຄົງເຂັ້ມແຂງ ແລະ ພັດທະນາຢ່າງສະໝ່ຳສະເໝີ.