ຫວຽດນາມ - ຝລັ່ງ ມຸ່ງເຖິງການພົວພັນຮ່ວມມືປ້ອງກັນຊາດຢ່າງມີປະສິດທິຜົນ
(ພາບ: qdnd.vn)
(vovworld) - ໂດຍຮັບຄຳເຊີນຂອງທ່ານ Philippe Errera, ຫົວໜ້າກົມໃຫຍ່ພົວພັນກັບສາກົນ ແລະ ຍຸດທະສາດ, ກະຊວງປ້ອງກັນປະເທດ ຝລັ່ງ, ພົນໂທ ຫງວຽນຈີ໋ວິ້ງ, ຮອງລັດຖະມົນຕີກະຊວງປ້ອງກັນປະເທດ ໄດ້ນຳໜ້າຄະນະຜູ້ແທນຂັ້ນສູງກະຊວງປ້ອງກັນປະເທດ ຫວຽດນາມ ໄປເຂົ້າຮ່ວມການເຈລະຈາດ້ານນະໂຍບາຍປ້ອງກັນຊາດ ຫວຽດນາມ - ຝລັ່ງ ຄັ້ງທຳອິດ, ແລະ ຢ້ຽມຢາມ ສຝລັ່ງແຕ່ວັນທີ 07-11/11/2016.
ທີ່ການເຈລະຈາ, ສອງຝ່າຍໄດ້ແລກປ່ຽນທັດສະນະກ່ຽວກັບສະພາບການສາກົນ ແລະ ພາກພື້ນເຊິ່ງທັງສອງຝ່າຍຕ່າງມີຄວາມສົນໃຈ. ກ່ຽວກັບການພົວພັນຮ່ວມມືປ້ອງກັນຊາດຫວຽດນາມ - ຝລັ່ງ, ສອງຝ່າຍຖືວ່າ, ບົນພື້ນຖານຂໍ້ຕົກລົງກ່ຽວກັບການຮ່ວມມືໃນຂົງເຂດປ້ອງກັນຊາດ (ລົງນາມເມື່ອເດືອນ 11/2009) ແລະ ກົນໄກຮ່ວມມືສອງຝ່າຍຢ່າງມີປະສິດຜົນ, ການພົວພັນຮ່ວມມືສືບຕໍ່ມີຄວາມຄືບໜ້າ, ພິເສດແມ່ນໃນຂົງເຂດບຳລຸງສ້າງ, ເຂົ້າຮ່ວມການເຄື່ອນໄຫວຮັກສາສັນຕິພາບຂອງສະຫະປະຊາຊາດ, ການປ້ອງກັນຄວາມສະຫງົບຢູ່ທະເລ. ໃນໄລຍະຈະມາເຖິງ, ສອງຝ່າຍເຫັນດີເປັນເອກະພາບລົງນາມໃນເອກະສານສຳຄັນ ແລະ ວິໄສທັດລວມກ່ຽວກັບການຮ່ວມມື ຫວຽດນາມ - ຝລັ່ງ ໃນຂົງເຂດປ້ອງກັນຊາດ ແລະ ຂໍ້ຕົກລົງກ່ຽວກັບການແລກປ່ຽນ ແລະ ພ້ອມກັນຮັກສາຂ່າວລັບ ແນໃສ່ເຮັດໃຫ້ການພົວພັນນັບມື້ນັບເລິກເຊິ່ງກວ່າອີກ. ສອງຝ່າຍເຫັນດີເປັນເອກະສັນ ສືບຕໍ່ຊຸກຍູ້ການພົບປະ, ແລກປ່ຽນຄະນະຜູ້ແທນທຸກຂັ້ນ; ເພີ່ມທະວີການເຈລະຈາຍຸດທະສາດກ່ຽວກັບການປ້ອງກັນຊາດ, ການຮ່ວມມື ແລະ ສະໜັບສະໜູນເຊິ່ງກັນ ແລະ ກັນໃນບັນດາກົນໄກປ້ອງກັນຊາດ ປ້ອງກັນຄວາມສະຫງົບ, ໃນເວທີປາໄສຫຼາຍຝ່າຍ… ເພື່ອນຳມາເຊິ່ງຜົນປະໂຫຍດໃຫ້ທັງສອງຝ່າຍ.