(vovworld) - ຕອນບ່າຍວັນທີ 5/8, ທ່ານນາຍົກລັດຖະມົນຕີ ຫງວຽນເຕີນຢູ້ງ ໄດ້ໃຫ້ການຕ້ອນຮັບທ່ານເອກອັກຄະລັດຖະທູດ ອາເມລິກາ David Shear, ເນື່ອງໃນໂອກາດທ່ານເອກອັກຄະລັດຖະທູດສິ້ນສຸດອາຍຸການເຮັດວຽກຢູ່ ຫວຽດນາມ. ທ່ານນາຍົກລັດຖະມົນຕີ ຫງວຽນເຕີນຢູ້ງ ຢືນຢັນວ່າ: ຫວຽດນາມ ພ້ອມແລ້ວທີ່ແລກປ່ຽນ, ເຈລະຈາກັບ ອາເມລິກາ ໃນບັນດາບັນຫາ, ຂົງເຂດ ໃນນັ້ນມີບັນຫາກ່ຽວກັບສິດທິມະນຸດຕາມຈິດໃຈເຄົາລົບ ແລະ ເຂົ້າອົກເຂົ້າໃຈເຊິ່ງກັນ ແລະ ກັນ, ພ້ອມທັງຫວັງວ່າ 2 ຝ່າຍຈະສືບຕໍ່ຊຸກຍູ້ການເຄື່ອນໄຫວຮ່ວມມືດ້ານເສດຖະກິດ ຍ້ອນວ່ານີ້ແມ່ນຂົງເຂດເຊິ່ງຄວາມສາມາດບົ່ມຊ້ອນ, ທ່າແຮງການຮ່ວມມືລະຫວ່າງ 2 ປະເທດຍັງໃຫຍ່ຫຼວງຢູ່. ເມື່ອເຕື້ອງເຖິງການເຈລະຈາສັນຍາຂ້າມ ປາຊີຟິກ (TPP), ທ່ານນາຍົກລັດຖະມົນຕີ ຫງວຽນເຕີນຢູ້ງ ຖືວ່າເມື່ອສັນຍາໄດ້ສຳເລັດຈະເປີດກາລະໂອກາດອັນໃຫຍ່ຫຼວງ ໃຫ້ແກ່ການເຄື່ອນໄຫວຮ່ວມມືດ້ານເສດຖະກິດ, ການຄ້າ, ການລົງທຶນລະຫວ່າງ ຫວຽດນາມ ແລະ ອາເມລິກາ. ທ່ານນາຍົກລັດຖະມົນຕີ ປາດຖະໜາຢາກ ອາເມລິກາ ສະໜັບສະໜູນ ແລະ ສະຫງວນຄວາມໄຫວພິບທີ່ຈຳເປັນສຳລັບ ຫວຽດນາມ.
ສ່ວນທ່ານເອກອັກຄະລັດຖະທູດ David Shear ສະເໜີໃຫ້ 2 ຝ່າຍສືບຕໍ່ສົມທົບກັນຢ່າງແໜ້ນແຟ້ນເພື່ອຊຸກຍູ້ການຮ່ວມມືເສດຖະກິດ, ການຄ້າ, ການລົງທຶນ, ການເຈລະຈາ TPP... ເມື່ອແລກປ່ຽນກ່ຽວກັບບັນຫາທະເລຕາເວັນອອກ, ທ່ານເອກອັກຄະລັດຖະທູດ David Shear ຖືວ່າ: ໜຶ່ງໃນບັນດາສາຍເຫດຕົ້ນຕໍທີ່ກໍ່ຂາດຄວາມສະຫງົບ, ປອດໄພຢູ່ທະເລຕາເວັນອອກ ກໍ່ຄືໄພນາບຂູ່ເຖິງສັນຕິພາບ, ຄວາມສະຫງົບຢູ່ພາກພື້ນ ແມ່ນເລື່ອງທວງເອົາອະທິປະໄຕຕາມ “ເສັ້ນ 9 ຕອນ” ໄຮ້ເຫດຜົນຂອງ ຈີນ. ທ່ານເອກອັກຄະລັດຖະທູດ ຢືນຢັນທັດສະນະຂອງ ອາເມລິກາ ແມ່ນສະໜັບສະໜູນເລື່ອງແກ້ໄຂບັນດາການຂັດແຍ້ງກັນຢູ່ທະເລຕາເວັນອອກໂດຍສັນຕິວິທີ, ບົນພື້ນຖານເຄົາລົບກົດໝາຍສາກົນ. ທ່ານເອກອັກຄະລັດຖະທູດ David Shear ກໍ່ຖືວ່າ: ຫວຽດນາມ ຢືດໝັ້ນພ້ອມກັບບັນດາປະເທດ ອາຊຽນ ຮຽກຮ້ອງ ຈີນ ປະຕິບັດກົດໝາຍສາກົນຢ່າງເຂັ້ມງວດ, ຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC), ພ້ອມກັນເຈລະຈາເພື່ອມຸ່ງໄປເຖິງປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC).