ກອງປະຊຸມຄັ້ງທີ 12 ຂອງຄະນະບໍລິຫານງານສູນກາງພັກ ກອມມູນິດ ຫວຽດນາມ
|
(vovworld) – ວັນທີ 1/11, ຄະນະບໍລິຫານງານສູນກາງພັກກອມມູນິດ ຫວຽດນາມ ຊຸດທີ 12 ໄດ້ປະກາດໃຊ້ມະຕິເລກທີ 05 ກ່ຽວກັບບາງແຜນນະໂຍບາຍ, ນະໂຍບາຍໃຫຍ່ເພື່ອສືບຕໍ່ປ່ຽນໃໝ່ຮູບແບບການເຕີບໂຕ, ຍົກສູງຄຸນນະພາບການເຕີບໂຕ, ສະມັດຕະພາບການອອກແຮງງານ, ກຳລັງແກ່ງແຍ້ງຂອງພື້ນຖານເສດຖະກິດ. ມະຕິໄດ້ຊີ້ແຈ້ງວ່າ, ປ່ຽນໃໝ່ຮູບແບບການເຕີບໂຕເພື່ອຍົກສູງຄຸນນະພາບການເຕີບໂຕ, ສະມັດຕະພາບການອອກແຮງງານ ແລະ ກຳລັງແກ່ງແຍ້ງຂອງພື້ນຖານເສດຖະກິດ, ເພື່ອພັດທະນາຢ່າງໄວ ແລະ ໝັ້ນຄົງໃນທຸກ ດ້ານນັບທັງດ້ານເສດຖະກິດ, ສັງຄົມ ແລະ ສິ່ງແວດລ້ອມ. ປ່ຽນໃໝ່ຮູບແບບການເຕີບໂຕຕິດພັນກັບການປະຕິບັດ 3 ບາດກ້າວບຸກທະລຸຍຸດທະສາດຢ່າງແໜ້ນແຟ້ນ, ສ້າງໂຄງປະກອບພື້ນຖຖານເສດຖະກິດດ້ວຍຈຸດສຸມບຸລິມະສິດ, ແມ່ນ: ປັບປຸງລະບອບເສດຖະກິດການຕະຫຼາດຕາມການກຳນົດທິດສັງຄົມນິຍົມ, ຮັບປະກັນເສດຖະກິດມະຫາພາກເປັນປົກກະຕິ, ປັບປຸງສະພາບແວດລ້ອມແຫ່ງການລົງທຶນ ດຳເນີນທຸລະກິດເພື່ອສ້າງຄວາມອຶງດູດ, ສ້າງຄວາມສະດວກໃຫ້ແກ່ການເລີ່ມດຳເນີນອາຊີບ ແລະ ການປ່ຽນໃໝ່, ການປະດິດສ້າງ…
ມະຕິວາງຈຸດໝາຍປັບປຸງພື້ນຖານເສດຖະກິດມະຫາພາກໃຫ້ໝັ້ນຄົງ, ຄວບຄຸມໄພເງິນເຟີ້ໃຫ້ຢູ່ໃນລະດັບສະເລ່ຍຕ່ຳກ່ວາ 5%/ປີ, ຫລຸດຜ່ອນອັດຕາລາຍຈ່າຍເກີນດຸນງົບປະມານແຫ່ງລັດ, ຮອດປີ 2020 ໃຫ້ຫລຸດລົງຕ່ຳກ່ວາລະດັບ 4% GDP, ຮອດປີ 2030 ຫລຸດລົງປະມານ 3% GDP. ໄລຍະ 2016 – 2020, ແຕ່ລະປີມີວິສາຫະກິດປະມານ 30 – 35% ມີການເຄື່ອນໄຫວປ່ຽນໃໝ່ຢ່າງມີຫົວຄິດປະດິດສ້າງ. ຕາມນັ້ນແລ້ວ, ສືບຕໍ່ຮັບປະກັນສະຖຽນລະພາບ ແລະ ປັບປຸງພື້ນຖານເສດຖະກິດມະຫາພາກໃຫ້ໝັ້ນຄົງ, ເຂັ້ມແຂງ, ຄວບຄຸມໄພເງິນເຟີ້ເປັນຢ່າງດີ…
ມະຕິໄດ້ເນັ້ນໜັກວ່າ: ຫວຽດນາມ ສືບຕໍ່ປະຕິບັດ 3 ຂອດບຸກທະລຸຍຸດທະສາດແມ່ນ ປັບປຸງລະບອບເສດຖະກິດການຕະຫຼາດກຳນົດທິດສັງຄົມນິຍົມ, ຈຸດສຸມແມ່ນປັບປຸງລະບອບກ່ຽວກັບການຫັນເປັນຫຸ້ນສ່ວນ, ກຳນົດລາຄາລັດວິສາຫະກິດ… ພັດທະນາຕະຫຼາດການເງິນ, ປັບປຸງລະບອບຄຸ້ມຄອງການລົງທຶນແຫ່ງລັດ, ຮັບປະກັນປະສິດທິຜົນ ແລະ ເໝາະສົມກັບທຳນຽມສາກົນ… ສືບຕໍ່ພັດທະນາໂຄງປະກອບພື້ນຖານເສດຖະກິດ - ສັງຄົມໃຫ້ຄົບຊຸດ, ທັນສະໄໝ. ເອົາໃຈໃສ່ເປັນພິເສດເຖິງການພັດທະນາແຫຼ່ງຊັບພະຍາກອນມະນຸດ ຫວຽດນາມ ຕອບສະໜອງຄວາມຮຽກຮ້ອງຕ້ອງການພັດທະນາ ແລະ ການເຊື່ອມໂຍງຂອງປະເທດຊາດ.
ມະຕິບຸລິມະສິດພັດທະນາ ແລະ ຖ່າຍທອດ ວິທະຍາສາດ -ເຕັກໂນໂລຢີ, ພິເສດແມ່ນ ວິທະຍາສາດ -ເຕັກໂນໂລຢີທັນສະໄໝ, ຖືນີ້ແມ່ນປັດໄຈຕົ້ນຕໍເພື່ອຍົກສູງສະມັດຕະພາບ, ຄຸນນະພາບ ແລະ ກຳລັງແກ່ງແຍ້ງຂອງພື້ນຖານເສດຖະກິດ. ຍູ້ແຮງການສ້າງໂຄງປະກອບສັງລວມຂອງຂະແໜງ, ຂົງເຂດເສດຖະກິດໃນຂອບເຂດທົ່ວປະເທດ ແລະ ແຕ່ລະທ້ອງຖິ່ນ, ວິສາຫະກິດດ້ວຍວິໄສທັດໄລຍະຍາວ, ມີວິວັດທະນາການລະອຽດ, ຕິດພັນຢ່າງແໜ້ນແຟ້ນລະຫວ່າງການສ້າງໂຄງປະກອບສັງລວມພື້ນຖານເສດຖະກິດກັບການສ້າງໂຄງປະກອບບັນດາຂະແໜງ, ຂົງເຂດຈຸດສຸມ. ມະຕິກໍ່ເນັ້ນໜັກເລື່ອງເອົາໃຈໃສ່ເປັນພິເສດເຖິງການປ່ຽນໃໝ່ຮູບແບບການເຕີບໂຕ, ຕິດພັນກັບການປ້ອງກັນຊາດ, ປ້ອງກັນຄວາມສະຫງົບ ແລະ ການປ່ຽນໃໝ່ແບບວິທີ, ຍົກສູງຄວາມສາມາດ, ຜົນສັກສິດ ແລະ ປະສິດທິຜົນການຄຸ້ມຄອງຂອງລັດ.