ທ່ານ ເລຫາຍບີງ ໂຄສົກກະຊວງການຕ່າງປະເທດຫວຽດນາມ
photo:nld.com.vn
|
(vovworld)-ວັນທີ 15/5, ທີ່ການປະຊຸມຂ່າວປະຈຳເດືອນຂອງກະຊວງການຕ່າງປະເທດຫວຽດນາມ, ທ່ານ ເລຫາຍບີງ ໂຄສົກກະຊວງການຕ່າງປະເທດຫວຽດນາມ ໃຫ້ຮູ້ວ່າ: ໃນຊຸມມື້ຜ່ານມາ, ຫວຽດນາມ ສືບຕໍ່ເຈລະຈາກັບຈີນຢ່າງເຂັ້ມງວດຢູ່ທຸກຂັ້ນ, ດ້ວຍຫລາຍຮູບການເພື່ອຄັດຄ້ານການກະທຳຂອງຈີນ ຕັ້ງຮ້ານເຈາະນ້ຳມັນ ໄຮ່ຢາງ 981 ຢູ່ເຂດເສດຖະກິດຈຳເພາະ ແລະ ໄຫລ່ທະວີບຂອງຫວຽດນາມ. ແຕ່ວ່າ ມາຮອດປະຈຸບັນ, ຈີນ ຍັງຄົງສືບຕໍ່ຮັກສາ ແລະ ເປີດກວ້າງການກະທຳທີ່ຜິດພາດຂອງຕົນ. ບໍ່ພຽງແຕ່ສືບຕໍ່ລະດົມບັນດາກຳປັ່ນ, ໃນນັ້ນ ມີກຳປັ່ນທະຫານຫລາຍລຳເທ່ົານັ້ນ ຫາກຈີນ ຍັງມີການກະທຳກະມຶງກະມັງນາບຂູ່, ສະກັດກັ້ນບັນດາກຳລັງປະຕິບັດຫນ້າທີ່ປົກປັກຮັກສາອະທິປະໄຕຂອງຫວຽດນາມ. ຫວຽດນາມ ຄັດຄ້ານຢ່າງແຮງການກະທຳດັ່ງກ່າວຂອງຈີນ, ເດັດດ່ຽວຮຽກຮ້ອງຈີນ ຖອນຮ້ານເຈາະນ້ຳມັນ ແລະ ກຳປັ່ນ, ເຮືອບິນທັງໝົດອອກຈາກເຂດເສດຖະກິດຈຳເພາະ ແລະ ໄຫລ່ທະວີບຂອງຫວຽດນາມ, ບໍ່ໃຫ້ເກີດການກະທຳຄ້າຍຄືກັນໃນອະນາຄົດ.
ຫວຽດນາມ ສືບຕໍ່ນຳໃຊ້ທຸກມາດຕະການທີ່ຈຳເປັນ, ສອດຄ່ອງກັບກົດໝາຍສາກົນ, ໃນນັ້ນ ບຸລິມະສິດບັນດາມາດຕະການສັນຕິພາບ, ເພື່ອປົກປັກຮັກສາສິດ ແລະ ຜົນປະໂຫຍດອັນຊອບທຳຂອງຕົນ.
ເມື່ອຕອບຄຳຖາມທີ່ວ່າ: ມີເລື່ອງ ຫວຽດນາມ ພ້ອມກັບ ຟິລີບປີນ ເຕົ້າໂຮມກຳລັງໃນອາຊຽນ ເພື່ອກໍ່ກຳລັງດັນຕໍ່ຈີນ ຫລືບໍ່, ທ່ານເລຫາຍບີ່ງ ໄດ້ປະຕິເສດຂ່າວຄາວດັ່ງກ່າວ ແລະ ຢືນຢັນວ່າ:
“ຂ້າພະເຈົ້າຢືນຢັນວ່າ: ຂ່າວຄາວນີ້ບໍ່ມີຫລັກຖານ. ຄືດັ່ງພວກເຮົາໄດ້ຮູ້ນຳກັນແລ້ວ, ທີ່ກອງປະຊຸມລັດຖະມົນຕີການຕ່າງປະເທດ ອາຊຽນຜ່ານມາ, ບັນດາທ່ານລັດຖະມົນຕີການຕ່າງປະເທດ ອາຊຽນ ໄດ້ອອກຖະແຫລງການສະເພາະກ່ຽວກັບບັນຫາທະເລຕາເວັນອອກ. ສິ່ງດັ່ງກ່າວສະແດງໃຫ້ເຫັນຄວາມສາມັກຄີ, ເປັນເຈົ້າການ ແລະ ມີຄວາມຮັບຜິດຊອບສູງກໍຄືຄວາມວິຕົກກັງວົນຢ່າງເລິກເຊິ່ງຂອງບັນດາປະເທດ ອາຊຽນ ສຳລັບສັນຕິພາບ, ສະຖຽນລະພາບຢູ່ພາກພື້ນ.”
ທ່ານເລຫາຍບີງ ກໍເນັ້ນຫນັກວ່າ: ຫວຽດນາມ ໄດ້ສົ່ງຄຳຂອບອົກຂອບໃຈມາຍັງບັນດາປະເທດ, ສ່ວນບຸກຄົນ ແລະ ອົງການຈັດຕັ້ງສາກົນ ໄດ້ຄັດຄ້ານການກະທຳຜິດກົດໝາຍຂອງຈີນ ກໍຄືສະຫນັບສະຫນູນຄວາມຮຽກຮ້ອງຕ້ອງການອັນຊອບທຳ ແລະ ຖືກຕ້ອງກັບກົດໝາຍຂອງຫວຽດນາມ.
ກ່ຽວຂ້ອງເຖິງກໍລະນີກໍ່ຄວາມວຸ່ນວາຍຢູ່ເຂດອຸດສາຫະກຳ ບີງເຢືອງ ແລະ ເຂດເສດຖະກິດ ຫວູງອາງ ຮ່າຕີງ, ທ່ານເລຫາຍບີງ ຊີ້ແຈ້ງວ່າ: ເລື່ອງສະແດງນ້ຳໃຈຮັກຊາດ ແລະ ຕັດສິນໃຈປົກປັກຮັກສາອະທິປະໄຕຂອງປະເທດຊາດແມ່ນວຽກງານອັນຊອບທຳ, ແຕ່ການກະທຳນີ້ຕ້ອງຖືກຕ້ອງກັບກົດໝາຍ ແລະ ບັນດາອົງການກ່ຽວຂ້ອງຂອງຫວຽດນາມ ພວມຮີບເຮັ່ງຈັບຕົວບັນດາບຸກຄົນກໍ່ຄວາມວຸ້ນວາຍເພື່ອປັບໄຫມລົງໂທດຢ່າງເຂັ້ມງວດ.