ຫວຽດນາມສືບຕໍ່ປະກອບສ່ວນຕັ້ງໜ້າ ເຂົ້າໃນວິວັດການ ສ້າງປະຊາຄົມ ອາຊຽນ
ທ່ານຮອງລັດຖະມົນຕີການຕ່າງປະເທດ ຫວຽດນາມ ຟ້າມກວາງວີງ
(ພາປະກອບ)
(vovworld) – ວັນທີ 29/11, ຢູ່ ຮ່າໂນ້ຍ, ກະຊວງການຕ່າງປະເທດ ຫວຽດນາມ, ດ້ວຍຖານະເປັນອົງການປະສານງານແຫ່ງຊາດກ່ຽວກັບການຮ່ວມມື ອາຊຽນ, ຈັດຕັ້ງກອງປະຊຸມລະຫວ່າງກະຊວງ, ຂະແໜງການເພື່ອແນໃສ່ສະຫລຸບ, ຕີລາຄາສະພາບການຮ່ວມມືຂອງ ຫວຽດນາມ ໃນ ອາຊຽນ ປີ 2013, ກຳນົດທິດທາງການເຂົ້າຮ່ວມການຮ່ວມມື ອາຊຽນ ຂອງ ຫວຽດນາມ ແຕ່ນີ້ຮອດປີ 2015, ກໍ່ຄືສ້າງວິໄສທັດປະຊາຄົມ ອາຊຽນ ໄລຍະຫຼັງປີ 2015. ທ່ານຮອງລັດຖະມົນຕີການຕ່າງປະເທດ ຫວຽດນາມ ຟ້າມກວາງວີງ ເປັນປະທານກອງປະຊຸມ.
ບັນດາຜູ້ແທນເນັ້ນໜັກການເຂົ້າຮ່ວມຮ່ວມມື ອາຊຽນ ຂອງ ຫວຽດນາມ ໃນປີຜ່ານມາແມ່ນຕັ້ງໜ້າ ແລະ ມີປະສິດທິຜົນ. ພົ້ນເດັ່ນແມ່ນຫວຽດນາມ ໄດ້ມານະພະຍາຍາມພ້ອມກັບບັນດາປະເທດສະມາຊິກອື່ນຊຸກຍູ້ປະຕິບັດຖືກຕາມຄວາມຄືບໜ້າໃນຈຸດສຸມບຸລິມະສິດຂອງອາຊຽນໃນປີ 2013.
ກ່າວຄຳເຫັນສຳຫລຸບກອງປະຊຸມ, ທ່ານຮອງລັດຖະມົນຕີການຕ່າງປະເທດ ຫວຽດນາມ ຟ້າມກວາງວີງ ເນັ້ນໜັກວ່າ: ເຖິງວ່າ ອາຊຽນ ບັນລຸໄດ້ບັນດາໝາກຜົນເປັນໜ້າຊື່ນຊົມໃນປີຜ່ານມາກໍ່ຕາມ, ແຕ່ອາຊຽນ ຍັງປະສົບກັບສິ່ງທ້າທາຍຫຼາຍຢ່າງໃນໄລຍະຈະມາເຖິງ, ຮຽກຮ້ອງໃຫ້ແຕ່ລະປະເທດສະມາຊິກຕ້ອງມານະພະຍາຍາມຫຼາຍກ່ວາອີກ. ສຳລັບ ຫວຽດນາມ ແລ້ວ, ທ່ານຮອງລັດຖະມົນຕີການຕ່າງປະເທດ ຟ້າມກວາງວີງ ຊີ້ແຈ້ງວ່າ:
“ວິວັດການສ້າງຕັ້ງປະຊາຄົມ ອາຊຽນ ບໍ່ພຽງແຕ່ຢຸດຕິໃນວັນທີ 31/12/2015 ເທົ່ານັ້ນ ຫາກຍັງຕ້ອງສ້າງການກຳນົດທິດເພື່ອໃຫ້ ອາຊຽນ ສືບຕໍ່ພັດທະນາ, ເສີມຂະຫຍາຍບົດບາດຂອງຕົນຢູ່ພາກພື້ນພາຍຫຼັງປີ 2015. ດັ່ງນັ້ນ, ຫວຽດນາມ, ດ້ວຍບົດບາດເປັນສະມາຊິກຕັ້ງໜ້າ, ເປັນເຈົ້າການ, ມີຄວາມຮັບຜິດຊອບໃນອາຊຽນ, ຈະສືບຕໍ່ປະກອບສ່ວນຍ້ອນວ່າ ນີ້ແມ່ນຜົນປະໂຫຍດທີ່ແທດຈິງຂອງພວກເຮົາ. ແຕ່ນີ້ຮອດປີ 2015, ເມື່ອອາຊຽນ ສ້າງປະຊາຄົມ, ພວກເຮົາບໍ່ພຽງແຕ່ສະໜັບສະໜູນຈຸດໝາຍສ້າງປະຊາຄົມເທົ່ານັ້ນ ຫາກຍັງຖືນັ້ນແມ່ນຜົນປະໂຫຍດຍຸດທະສາດຂອງ ຫວຽດນາມ ແລະ ຈະເປັນເຈົ້າການ, ປະກອບສ່ວນຢ່າງມີຄວາມຮັບຜິດຊອບ”