ຫວຽດນາມ-ສະຫະລັດອາເມລິກາຊຸກຍູ້ການພົວພັນຮອບດ້ານລະຫວ່າງສອງຝ່າຍຢ່າງແຮງ
(ພາບປະກອບ)
(vovworld)- ຕອນບ່າຍ ວັນທີ 16/11, ທ່ານ ຮອງນາຍົກລັດຖະມົນຕີຫວຽດນາມ ເວືອງດິ່ງເຫ້ວ ໄດ້ໃຫ້ການຕ້ອນຮັບ ທ່ານ Ted Osius ເອກອັກຄະລັດຖະທູດສະຫະລັດອາເມລິການ ປະຈຳຫວຽດນາມ. ທີ່ການຕ້ອນຮັບ, ທ່ານ ຮອງນາຍົກລັດຖະມົນຕີ ເວືອງດິ່ງເຫ້ວ ໄດ້ອວຍພອນການເລືອກຕັ້ງ ປະທານາທິບໍດີ ຂອງສະຫະລັດອາເມລິກາ ປະສົບຜົນສຳເລັດຢ່າງຈົບງາມ. ທ່ານ ຮອງນາຍົກລັດຖະມົນຕີ ເວືອງດິ່ງເຫ້ວ ຫວັງວ່າ ໃນຖານະຕຳແໜ່ງເປັນປະທານາທິບໍດີສະຫະລັດອາເມລິກາ, ທ່ານ Donald Trump ຈະນຳເອົາການພົວພັນ ລະຫວ່າງ ຫວຽດນາມ-ສະຫະລັດອາເມລິກາ ໃຫ້ນັບມື້ນັບພັດທະນາຢ່າງແຮງ, ຮອບດ້ານ, ແທດຈິງກວ່າ. ທ່ານ ຮອງນາຍົກລັດຖະມົນຕີ ເວືອງດິ່ງເຫ້ວ ເນັ້ນໜັກວ່າ: ຫວຽດນາມ ຍາມໃດກໍ່ຖື ສະຫະລັດອາເມລິກາ ເປັນຄູ່ຮ່ວມມືທີ່ສຳຄັນແຖວໜ້າ, ປາດຖະໜາຊຸກຍູ້ການພົວພັນອັນຍາວນານ, ໝັ້ນຄົງ, ຕ່າງຝ່າຍຕ່າງມີຜົນປະໂຫຍດ ກັບສະຫະລັດອາເມລິກາ. ທ່ານ ຮອງນາຍົກລັດຖະມົນຕີ ເວືອງດິ່ງເຫ້ວ ສະເໜີຝ່າຍສະຫະລັດອາເມລິກາ ເອົາໃຈໃສ່, ສະໜັບສະໜູນ ແລະ ຊຸກຍູ້ບັນດາວິສາຫະກິດສະຫະລັດອາເມລິກາລົງທຶນ ເຂົ້າຫວຽດນາມ, ສ້າງເງື່ອນໄຂສະດວກເພື່ອໃຫ້ສິນຄ້າ ຂອງຫວຽດນາມ ສຳຜັດກັບຕະຫຼາດສະຫະລັດອາເມລິກາ, ເປັນຕົ້ນແມ່ນບັນດາຜະລິດຕະພັນກະເສດ.
ສ່ວນ ທ່ານ ເອກອັກຄະລັດຖະທູດ Ted Osius ຢືນຢັນວ່າ: ສະຫະລັດອາເມລິກາ ຖືອາຊີເປັນພາກພື້ນຈຸດສຸມ ໃນທິດທາງຮ່ວມມື, ພັດທະນາການພົວພັນ ກັບບັນດາປະເທດ ໃນໄລຍະຈະມາເຖິງ, ໃນນັ້ນ ມີຫວຽດນາມ. ທ່ານ ເອກອັກຄະລັດຖະທູດ Ted Osius ໃຫ້ຮູ້ວ່າ: ໃນໄລຍະຈະມາເຖິງ, ສະຫະລັດອາເມລິການ ຈະສຸມໃສ່ໜູນຊ່ວຍການແກ້ໄຂມົນລະພິດສິ່ງແວດລ້ອມ ຢູ່ພາກພື້ນແມ່ນນຳຂອງ, ຮ່ວມມືຊອກຫາທຳລາຍລະເບີດ, ແກ້ໄຂມົນລະພິດທາດພິດສີສົມ(dioxin), ຊອກຫາອັດຖິທະຫານ, ໜູນຊ່ວຍດ້ານມະນຸດສະທຳ ແລະ ແກ້ໄຂບັນດາໄພພິບັດ ຢູ່ຫວຽດນາມ. ທ່ານ ເອກອັກຄະລັດຖະທູດ Ted Osius ກໍ່ຢືນຢັນວ່າ: ສະຫະລັດອາເມລິກາ ຍາມໃດກໍ່ເອົາໃຈໃສ່ພັດທະນາການພົວພັນຮ່ວມມືດ້ານການຄ້າ, ການລົງທຶນສອງຝ່າຍ ກັບຫວຽດນາມ, ພ້ອມທັງ ຈະອັບເດດສະພາບການໃຫ້ສັດຕະຍາບັນສັນຍາຄູ່ຮ່ວມມືຂ້າມປາຊີຟິກ TPP.