(vovworld) – ໃນຂອບເຂດການຢ້ຽມຢາມ ອົດສະຕາລີ ຢ່າງເປັນທາງການຂອງທ່ານນາຍົກລັດຖະມົນຕີ ຫງວຽນເຕິນຢຸງ ຕາມຄຳເຊີນຂອງທ່ານນາຍົກລັດຖະມົນຕີ Tony Abbott, ຕອນເຊົ້າວັນທີ 18/3, ພິທີຕ້ອນຮັບທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ດຳເນີນຢ່າງສົມກຽດ, ຢູ່ນະຄອນຫຼວງ Canberra. ພາຍຫຼັງພິທີຕ້ອນຮັບ, ນາຍົກລັດຖະມົນຕີ 2 ທ່ານ ໄດ້ດຳເນີນການເຈລະຈາ. ບົນນ້ຳໃຈມິດຕະພາບ, ໄວ້ເນື້ອເຊື່ອໃຈ ແລະ ເຂົ້າອົກເຂົ້າໃຈ ຊຶ່ງກັນ ແລະ ກັນ. ກ່າວຄຳເຫັນທີ່ການປະຊຸມຂ່າວຫຼັງການເຈລະຈາ, ທ່ານນາຍົກລັດຖະມົນຕີ ຫງວຽນເຕິນຢຸງ ຢືນຢັນວ່າ:
“ຂ້າພະເຈົ້າແລະທ່ານ ທ່ານນາຍົກລັດຖະມົນຕີ Tony Abbott ໄດ້ເຫັນດີສົມທົບກັນຢ່າງແໜ້ນແຟ້ນໃນການຍູ້ແຮງການຜັນຂະຫຍາຍບັນດາຂໍ້ຕົກລົງທີ່ບັນລຸໄດ້ກ່ຽວກັບການປ້ອງກັນຊາດ ປ້ອງກັນຄວາມສະຫງົບ, ເພີ່ມທະວີການແລກປ່ຽນບົດຮຽນ, ແບ່ງປັນຂໍ້ມູນຂ່າວ, ໜູນຊ່ວຍຫວຽດນາມ ໃນການບຳລຸງສ້າງພາສາອັງກິດ ແລະ ວີຊາການຮັກສາສັນຕິພາບ, ເປີດກວ້າງການຮ່ວມມືໃນບັນດາໜ້າທີ່ພິເສດ, ຊອກຫາກູ້ໄພກູ້ຊີບ, ຮັບມືກັບໄພທຳມະຊາດ, ໂລກລະບາດ, ການຫັນປ່ຽນຂອງດິນຟ້າອາກາດ, ການຕ້ານກໍ່ການຮ້າຍ, ຕ້ານການຄ້າຄົນ, ຄວາມປອດໄພທາງເຄືອຂ່າຍອິນເຕີແນດ, ຄວາມປອດໄພສຳລັບແຫຼ່ງນຳ້. ພ້ອມກັນນັ້ນ, ພວກຂ້າພະເຈົ້າເຫັນດີສືບຕໍ່ການທາບທາມ, ສະໜັບສະໜູນກັນທີ່ກົນໄກຮ່ວມມືໃນພາກພື້ນກ່ຽວກັບການປ້ອງກັນຊາດ, ປ້ອງກັນຄວາມສະຫງົບເຊັ່ນ ADMM, ADMM+,ARF…“
ນາຍົກລັດຖະມົນຕີທັງສອງທ່ານເຫັນດີເຮັດໃຫ້ການພົວພັນຄູ່ຮ່ວມມືຮອບດ້ານໃນປະຈຸບັນໃຫ້ເລິກເຊິ່ງຂຶ້ນຕື່ມ ແລະເພີ່ມທະວີການພົວພັນນີ້ໃຫ້ເໝາະສົມກັບທາດແທ້ຍຸດທະສາດທີ່ນັບມື້ນັບເພີ່ມຂຶ້ນຂອງການພົວພັນລະຫວ່າງສອງປະເທດ.