ຫວຽດນາມຮັບປະກັນທຸກສິດພື້ນຖານຂອງພົນລະເມືອງເປັນຢ່າງດີ
ທ່ານນາງ ດັ້ງທິງອກທິ້ງ, ຮອງປະທານປະເທດຫວຽດນາມກ່າວຄຳເຫັນທີ່
ກອງປະຊຸມສະພາສິດທິມະນຸດ ສປຊ ຊຸດທີ 32
|
(vovworld)- ວັນທີ 13/6/2016, ທ່ານນາງ ດັ້ງທິງອກທິ້ງ, ຮອງປະທານປະເທດຫວຽດນາມ ນຳຫນ້າຄະນະຜູ້ແທນຫວຽດນາມ ໄປເຂົ້າຮ່ວມກອງປະຊຸຸມສະພາສິດທິມະນຸດ ສປຊ ຊຸດທີ 32 ຢູ່ ເຊີແນວ ປະເທດສະວິດ ເນື່ອງໃນໂອກາດສະພາສິດທິມະນຸດສະເຫລີມສະຫລອງ 10 ປີແຫ່ງວັນສ້າງຕັ້ງ. ກ່າວຄຳເຫັນທີ່ກອງປະຊຸມ, ທ່ານນາງຮອງປະທານປະເທດ ດັ້ງທິງອກທິ້ງ ສະເຫນີ ສະພາສິດທິມະນຸດສະຫງວນຄວາມເອົາໃຈໃສ່ຢ່າງເໝາະສົມໃຫ້ແກ່ການປະຕິບັດໂຄງການດຳເນີນງານ ປີ 2030 ກ່ຽວກັບການພັດທະນາແບບຍືນຍົງ ແລະ ບັນດາການກະທົບຈາກການປ່ຽນແປງຂອງດິນຟ້າອາກາດຕໍ່ສິດທິມະນຸດ. ທ່ານນາງຮອງປະທານປະເທດ ກໍໄດ້ເຕື້ອງເຖິງສະພາບໄພແຫ້ງແລ້ງ, ນ້ຳເຄັມຊຶມເຂົ້າຍ້ອນການກະທົບຈາກການປ່ຽນແປງຂອງດິນຟ້າອາກາດຢູ່ບັນດາແຂວງພາກກາງ, ເຂດໄຕງວຽນ ແລະ ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ.
ທ່ານນາງຮອງປະທານປະເທດ ດັ້ງທິງອກທິ້ງ ໄດ້ເນັ້ນຫນັກບັນດາຄວາມມານະພະຍາຍາມຂອງຫວຽດນາມ ໃນການຮັບປະກັນສິດທິມະນຸດ, ພິເສດ ແມ່ນຜົນງານກ່ຽວກັບການພັດທະນາເສດຖະກິດສັງຄົມ, ການປະຕິບັດຄາດໝາຍພັດທະນາສະຫັດສະວັດ, ການລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ການສຶກສາຊັ້ນປະຖົມພາກບັງຄັບ, ຫລຸດຜ່ອນອັດຕາການຕາຍຂອງແມ່ແລະເດັກຫາກໍເກີດ, ຮັບປະກັນຄວາມສະເຫມີພາບລະຫວ່າງຍິງຊາຍ ແລະ ຄວາມກ້າວຫນ້າຂອງແມ່ຍິງ. ທ່ານນາງຮອງປະທານປະເທດ ຢືນຢັນວ່າ ຫວຽດນາມ ຈະມານະພະຍາຍາມຢ່າງບໍ່ຢຸດຢັ້ງເພື່ອຮັບປະກັນສິດຂອງປະຊາຊົນຫວຽດນາມທຸກຄົນ ພ້ອມທັງປະກອບສ່ວນຢ່າງຕັ້ງຫນ້າເຂົ້າໃນການຮັບປະກັນສິດທິມະນຸດໃນຂອບເຂດທົ່ວໂລກ.
ຕອນບ່າຍວັນດຽວກັນ, ທີ່ສຳນັກງານສະຫະພັນລັດຖະສະພາສາກົນ(IPU), ທ່ານນາງຮອງປະທານປະເທດ ໄດ້ພົບປະກັບທ່ານ Martin Chungong, ເລຂາທິການໃຫຍ່ IPU. ທ່ານນາງຮອງປະທານປະເທດ ໄດ້ຢືນຢັນວ່າ: ຫວຽດນາມ ຖືບົດບາດຂອງ IPU ເປັນສຳຄັນ ແລະ ຍາມໃດກໍເຂົ້າຮ່ວມຢ່າງຕັ້ງຫນ້າ ແລະ ມີຄວາມຮັບຜິດຊອບເຂົ້າບັນດາການເຄື່ອນໄຫວຂອງ IPU ແລະ ປາດຖະຫນາວ່າ ໃນໄລຍະຈະມາເຖິງ IPU ຈະສຸມໃສ່ເຂົ້າບັນດາເນື້ອໃນຄື: ປະຕິບັດບັນດາຄາດໝາຍພັດທະນາແບບຍືນຍົງ, ຮັບມືກັບການປ່ຽນແປງຂອງດິນຟ້າອາກາດ ແລະ ເພີ່ມທະວີການເຄື່ອນໄຫວຂອງສະມາຄົມສະມາຊິກສະພາແຫ່ງຊາດຍິງ. ທ່ານເລຂາທິການໃຫຍ່ IPU ຢືນຢັນ: ຄະນະເລຂາ ຈະສືບຕໍ່ມານະພະຍາຍາມເພື່ອພ້ອມກັບບັນດາສະມາຊິກສະພາແຫ່ງຊາດສ້າງໂຄງການດຳເນີນງານຮອບດ້ານ, ສ່ອງແສງບັນດາຄວາມເອົາໃຈໃສ່ລວມຂອງປະຊາຄົມສາກົນ.