ຫວຽດນາມຮຽກຮ້ອງສະກັດກັ້ນບັນດາການປະທະກັນທີ່ກ່ຽວຂ້ອງເຖິງນ້ຳ
ທ່ານນາງເອກອັກຄະລັດຖະທູດ ຫງວຽນທິເຟືອງງາ
(ພາບ: TTXVN)
(vovworld) – ວັນທີ 22/11 ສະພາຄວາມໝັ້ນຄົງສະຫະປະຊາຊາດ ພາຍໃຕ້ການເປັນປະທານຂອງ Senegal - ປະເທດເປັນປະທານສະພາຄວາມໝັ້ນຄົງໃນເດືອນ 11/2016, ໄດ້ຈັດຕັ້ງວາລະປະຊຸມປຶກສາຫາລືເປີດດ້ວຍຫົວຂໍ້ວ່າ “ນ້ຳ, ສັນຕິພາບ ແລະ ຄວາມສະຫງົບປອດໄພ”. ກ່າວຄຳເຫັນທີ່ວາລະປຶກສາຫາລື ທ່ານນາງເອກອັກຄະລັດຖະທູດ ຫງວຽນທິເຟືອງງາ ຫົວໜ້າຄະນະປະຕິບັດງານ ຫວຽດນາມ ປະຈຳ ສະຫະປະຊາຊາດ ໄດ້ຢືນຢັນເຖິງຄວາມສຳຄັນຂອງນ້ຳສຳລັບຊີວິດການເປັນຢູ່ຂອງມະນຸດ ແລະ ໃນການພັດທະນາເສດຖະກິດ - ສັງຄົມທຸກດ້ານ, ນ້ຳແມ່ນໜຶ່ງໃນບັນດາຈຸດໝາຍພັດທະນາແບບຍືນຍົງ ແລະ ນ້ຳມີບົດບາດສຳຄັນໃນການສ້າງຄວາມໄວ້ເນື້ອເຊື່ອໃຈ ແລະ ເພີ່ມທະວີການຮ່ວມມື. ທ່ານນາງເອກອັກຄະລັດຖະທູດ ຫງວຽນທິເຟືອງງາ ເນັ້ນໜັກວ່າ: ຫວຽດນາມ ແມ່ນໜຶ່ງໃນບັນດາປະເທດຖືກຜົນສະທ້ອນຢ່າງໜັກໜ່ວງທີ່ສຸດຈາກການປ່ຽນແປງຂອງດິນຟ້າອາກາດ, ຕ້ອງປະເຊີນໜ້າກັບທັງໄພນ້ຳຖ້ວມນ້ຳແກ່ງ ແລະ ໄພແຫ້ງແລ້ງ. ເພາະສະນັ້ນ ຫວຽດນາມ ຖືເປັນສຳຄັນພິເສດ ແລະ ຕັ້ງໜ້າເຂົ້າຮ່ວມບັນດາຂອບເຂດການຮ່ວມມືສາກົນ, ພາກພື້ນ ແລະ ອະນຸພາກພື້ນໃນຂົງເຂດນ້ຳ. ທ່ານນາງເອກອັກຄະລັດຖະທູດ ຫງວຽນທິເຟືອງງາ ຮຽກຮ້ອງສະພາຄວາມໝັ້ນຄົງສະຫະປະຊາຊາດສວມບົດບາດຕັ້ງໜ້າໃນການເຄົາລົບ ແລະ ເສີມຂະຫຍາຍບັນດາຫຼັກການຂອງກົດໝາຍສາກົນ, ສະກັດກັ້ນບັນດາການປະທະກັນທີ່ກ່ຽວຂ້ອງເຖິງນ້ຳ ແລະ ຖືວ່າ ບັນດາປະເທດພັດທະນາຄວນເພີ່ມທະວີການໜູນຊ່ວຍບັນດາປະເທດພວມພັດທະນາໃນຂົງເຂດນ້ຳ, ໂດຍຜ່ານການຖ່າຍທອດເຕັກໂນໂລຢີ, ສ້າງກຳລັງຄວາມສາມາດ ແລະ ຮັບມືກັບການປ່ຽນແປງຂອງດິນຟ້າອາກາດ.