ທ່ານ ເລຮວ່າຍຈູງ, ເອກອັກຄະລັດຖະທູດ, ຫົວຫນ້າຄະນະຜູ້ຕາງຫນ້າຂອງຫວຽດນາມປະຈຳ ສປຊ
ພາບ:thoisu.com.vn
|
(vovworld)- ກອງປະຊຸມຄັ້ງທີ 23 ບັນດາປະເທດສະມາຊິກສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລ(UNCLOS) ປີ 1982 ຖືກຈັດຂຶ້ນແຕ່ວັນທີ 10 - 14/6 ທີ່ສຳນັກງານຂອງສປຊ ຢູ່ນິວຢອກ ສະຫະລັດອາເມລິກາ. ນີ້ແມ່ນໂອກາດເພື່ອໃຫ້ບັນດາປະເທດສະມາຊິກສຳຫລວດກວດຄືນການເຄື່ອນໄຫວຂອງບັນດາອົງການທີ່ໄດ້ຮັບການສ້າງຕັ້ງຂຶ້ນຕາມກຳນົດຂອງສົນທິສັນຍາດັ່ງກ່າວ. ທີ່ກອງປະຊຸມ, ທ່ານ ເລຮວ່າຍຈູງ, ເອກອັກຄະລັດຖະທູດ, ຫົວຫນ້າຄະນະຜູ້ຕາງຫນ້າຂອງຫວຽດນາມປະຈຳ ສປຊ, ຫົວຫນ້າຄະນະຜູ້ແທນຫວຽດນາມເຂົ້າຮ່ວມກອງປະຊຸມໄດ້ມີບົດກ່າວປາໄສສຳຄັນ, ຕີລາຄາສູງການເຄື່ອນໄຫວຂອງບັນດາອົງການທີ່ໄດ້ຮັບການສ້າງຕັ້ງຂຶ້ນເມື່ອປີ 2012 ໃນຂອບເຂດສົນທິສັນຍາ. ກ່ຽວກັບບັນດາບັນຫາກ່ຽວຂ້ອງເຖິງທະເລຕາເວັນອອກ, ທ່ານເອກອັກຄະລັດຖະທູດ ເລຮວ່າຍຈູງ ເນັ້ນຫນັກວ່າ: ເລື່ອງສ້າງເງື່ອນໄຂສະດວກໃຫ້ແກ່ຊາວປະມົງທີ່ເຄື່ອນໄຫວຫາປາຢູ່ທະເລຢ່າງປອດໄພ ແລະ ໝັ້ນຄົງແມ່ນຄວາມຮັບຜິດຊອບຂອງບັນດາປະເທດແຄມທະເລ. ທ່ານເລຮວ່າຍຈູງ ສະເຫນີວ່າ: ໃນຂະນະບໍ່ທັນບັນລຸໄດ້ມາດຕະການແກ້ໄຂການພິພາດກ່ຽວກັບຜືນແຜນດິນ ແລະ ຂີດເສັ້ນຊາຍແດນບົນທະເລ, ບັນດາປະເທດແຄມທະເລຕ້ອງປະຕິບັດບັນດາຂໍ້ກຳນົດຂອງ UNCLOS ຢ່າງເຂັ້ມງວດ. ທຸກການກະທຳພຽງຝ່າຍດຽວ ພຽງແຕ່ເຮັດໃຫ້ສະພາບການເຄັ່ງຕຶງຂຶ້ນຕື່ມ, ໄປຝືນກັບຈຸດປະສົງ ແລະ ຫລັກການຂອງ UNCLOS. ທ່ານເລຮ່ວາຍຈູງ ເນັ້ນຫນັກເຖິງຄວາມຮຽກຮ້ອງຮັກສາສະພາບແວດລ້ອມສັນຕິພາບ, ຄວາມໝັ້ນຄົງ ແລະ ການຮ່ວມມືຢູ່ທະເລຕາເວັນອອກ ເພື່ອນຳໃຊ້ບັນດາເຂດທະເລ, ຂຸດຄົ້ນຊັບພະຍາກອນຢ່າງໝັ້ນຄົງ ແລະ ປົກປັກຮັກສາສິ່ງແວດລ້ອມທະເລຕາມກຳນົດຂອງສົນທິສັນຍາແມ່ນຄຳຮຽກຮ້ອງຕ້ອງການຢ່າງແນ່ນອນ ແລະ ໄດ້ຮັບຄວາມເອົາໃຈໃສ່, ການຊຸກຍູ້ຈາກບັນດາປະເທດໃນພາກພື້ນ. ເນື່ອງໃນໂອກາດນີ້, ທ່ານເອກອັກຄະລັດຖະທູດເລຮ່ວາຍຈູງ ໄດ້ແນະນຳກົດໝາຍວ່າດ້ວຍທະເລຂອງຫວຽດນາມ ຊື່ງມີຜົນສັກສິດນັບແຕ່ວັນທີ 1/1/2013 ເປັນຕົ້ນໄປ ແລະ ຢືນຢັນວ່າ: ບັນດາຂໍ້ກຳນົດຂອງກົດໝາຍສະບັບນີ້ແມ່ນສອດຄອ່ງກັບບັນດາຂໍ້ກຳນົດທີ່ໄດ້ລະບຸ້ໄວ້ໃນ UNCLOS ປີ 1982.