(vovworld) – ວັນທີ 10/03, ກອງປະຊຸມຄັ້ງທີ 33 ຂອງອົງການອາຫານ ແລະ ການກະເສດສະຫະປະຊາຊາດ (FAO) ເຂດອາຊີ - ປາຊີຟິກ ຖືກໄຂຂຶ້ນຢ່າງເປັນທາງການຢູ່ສູນກອງປະຊຸມສາມກົນ Putrajaya, ປະເທດມາເລເຊຍ ເພື່ອແນໃສ່ເພີ່ມທະວີການຄ້ຳປະກັນດ້ານສະບຽງອາຫານ, ຮັບມືກັບການປ່ຽນແປງຂອງດິນຟ້າອາກາດ ແລະ ການພັດທະນາກະສິກຳແບບຍືນຍົງ. ເຂົ້າຮ່ວມກອງປະຊຸມມີບັນດາລັດຖະມົນຕີ, ເຈົ້າໜ້າທີ່ຂັ້ນສູງ ແລະ ຜູ້ແທນ, ນັກຊ່ຽວຊານນັບຮ້ອຍຄົນທີ່ມາຈາກ 46 ປະເທດ. ຄະນະຜູ້ແທນຫວຽດນາມ ໂດຍທ່ານລັດຖະມົນຕີຊ່ວຍວ່າການກະຊວງກະສິກຳ ແລະ ພັດທະນາຊົນນະບົດ ເລກ໋ວກແຍງ ນຳໜ້າ.
ໃນບົດປະກອບຄວາມເຫັນທີ່ກອງປະຊຸມ, ທ່ານລັດຖະມົນຕີຊ່ວຍວ່າການກະຊວງກະສິກຳ ແລະ ພັດທະນາຊົນນະບົດ ເລກ໋ວກແຢງ ໃຫ້ຮູ້ວ່າ, ການພັດທະນາກະສິກຳ, ຄ້ຳປະກັນດ້ານສະບຽງອາຫານ ແມ່ນພື້ນຖານສຳຄັນສຳລັບຄວາມເປັນລະບຽບຮຽບຮ້ອຍທາງສັງຄົມ ແລະ ການເມືຶອງ, ເປັນພື້ນຖານໃຫ້ການພັດທະນາເສດຖະກິດສັງຄົມຢູ່ແຕ່ລະປະເທດ. ຫວຽດນາມ ໄດ້ຄ້ຳປະກັນດ້ານສະບຽງອາຫານໃນລະດັບຊາດແລ້ວ. ຫວຽດນາມ ພ້ອມແລ້ວທີ່ຈະຮ່ວມມືກັບ FAO ແລະ ບັນດາປະເທດສະມາຊິກ ເພື່ອຄ້ຳປະກັນດ້ານສະບຽງອາຫານ ແລະ ບັນລຸໄດ້ຄາດໝາຍ 1 ແລະ 2 ຂອງບັນດາຄາດໝາຍພັດທະນາແບບຍືນຍົງ (SDG) ດ້ວຍວິທີເຂົ້າຮ່ວມກັບ FAO ແລະ ບັນດາຄູ່ຮ່ວມມືພັດທະນາ ເພື່ອປະຕິບັດບັນດາໂຄງການຮ່ວມມືໃຕ້-ໃຕ້ ໃນພາກພື້ນ ແລະ ແບ່ງປັນບົດຮຽນກັບປະເທດຕ່າງໆ.