ທ່ານນາງ ຫງວຽນທິກີມຕຽນ ລັດຖະມົນຕີກະຊວງສາທາລະນະສຸກຫວຽດນາມ
ພາບ:internet
|
(vovworld)-ຄະນະຜູ້ແທນຫວຽດນາມ ໂດຍທ່ານນາງ ຫງວຽນທິກີມຕຽນ ລັດຖະມົນຕີກະຊວງສາທາລະນະສຸກຫວຽດນາມ ເປັນຫົວຫນ້າຄະນະໄດ້ໄປເຂົ້າຮ່ວມກອງປະຊຸມຄັ້ງທີ 66 ສະມັດຊາໃຫຍ່ອົງການອະນາໄມໂລກ, ຊື່ງແມ່ນອົງການວາງນະໂຍບາຍສູງສຸດຂອງອົງການອະນາໄມໂລກ(WHO) ຊື່ງດຳເນີນແຕ່ວັນທີ 20 - 28/5 ຢູ່ ເຊີແນວ ປະເທດສະວິດ. ກ່າວຄຳເຫັນທີ່ກອງປະຊຸມຄົບຄະນະພາຍໃຕ້ຫົວຂໍ້ວ່າ: ເບີ່ງແຍງດູແລສຸຂະພາບແຫ່ງຊາດຢູ່ຫວຽດນາມໃນໄລຍະໃຫມ່, ທ່ານນາງລັດຖະມົນຕີ ຫງວຽນທິກິມຕຽນ ເນັ້ນຫນັກວ່າ: ການຮັກສາ, ເບີ່ງແຍງດູແລ ແລະ ປົວແປງສຸຂະພາບໃຫ້ແກ່ປະຊາຊົນບໍ່ພຽງແຕ່ແມ່ນຈຸດໝາຍເທົ່ານັ້ນ ຫາກຍັງແມ່ນຍຸດທະສາດຂອງຂະແຫນງສາທາລະນະສຸກໃນໄລຍະ 2011 - 2020 ອີກດ້ວຍ. ໂດຍມີການລົງທຶນຂອງລັດຖະບານ ແລະ ບັນດາການຫນູນຊ່ວຍດ້ານການເງິນ ແລະ ເຕັກນິກຂອງບັນດາຄູ່ຮ່ວມມື, ການປະກອບສ່ວນຂອງທັງສັງຄົມ, ຂົງເຂດສາທາລະນະສຸກຫວຽດນາມໄດ້ບັນລຸຄວາມກ້າວຫນ້າດີພໍສົມຄວນໃນການເບີ່ງແຍງດູແລສຸຂະພາບ ແລະ ປະຕິບັດສຳເລັດຈຸດໝາຍພັດທະນາສະຫັດສະຫວັດ (MDG) ທີ່ກ່ຽວຂ້ອງເຖິງຂົງເຂດສຸຂະພາບ. ກອງປະຊຸມດັ່ງກ່າວແມ່ນໂອກາດດີເພື່ອໃຫ້ບັນດານັກຄຸ້ມຄອງກໍຄືນັກວິຊາສະເພາະຂອງບັນດາປະເທດໄດ້ຖອດຖອນ, ແລກປ່ຽນບົດຮຽນເພື່ອວາງອອກບັນດາໂຄງການເຄື່ອນໄຫວທີ່ເໝາະສົມທີ່ສຸດໃຫ້ແກ່ປະເທດຊາດ. ໃນຊຸມປີຜ່ານມາ, ຫວຽດນາມ ໄດ້ຮັບຖືວ່າ ແມ່ນຫນຶ່ງໃນບັນດາປະເທດພົ້ນເດັ່ນກ່ຽວກັບຂົງເຂດສາທາລະນະສຸກເມື່ອທຽບໃສ່ບັນດາປະເທດມີເງື່ອນໄຂເສດຖະກິດຄ້າຍຄືກັນ ແລະ ກາຍເປັນຫນຶ່ງໃນບັນດາປະເທດທຳອິດໃນໂລກສາມາດຄວບຄຸມໂລກSARS ສຳເລັດຜົນ.