(vovworld) - ມີຫຼາຍຮູບພາບກ່ຽວກັບຫວຽດນາມ ຖືກວາງສະແດງຢູ່ເຂດໂຄສະນາການທ່ອງທ່ຽວ ແລະ ຮ້ານວາງສະແດງຂອງໜັງສືພິມປະຊາຊົນຢູ່ ງານບຸນໜັງສືພິມມະນຸດສະທຳຄັ້ງທີ 84 ທີ່ດຳເນີນໃນລະຫວ່າງວັນທີ 12-14/9 ຢູ່ສວນສາທາລະນະ La Courneuve, ຊານນະຄອນຫຼວງ ປາຣີ. ສິ່ງທີ່ໜ້າສົນໃຈແມ່ນ “ເຂດວາງສະແດງຂອງວິສາຫະກິດ“, ເຂດໂຄສະນາການທ່ອງທ່ຽວທີ່ມີຊື່ວ່າ “ເຮືອນຫວຽດນາມ“ ໄດ້ດຶງດູດແຂກສາກົນມາຢ້ຽມຢາມເປັນຈຳນວນຫຼວງຫຼາຍ. ຢູ່ທີ່ນີ້, ບັນດາຮູບພາບທີ່ເປັນເອກະລັກສະເພາະຂອງຫວຽດນາມ, ບັນດາສະຖານທີ່ທ່ອງທ່ຽວທີ່ດູດດື່ມ ພ້ອມກັບວັດຖຸພັນຕ່າງໆຄື: ຄ້ອງ, ຕຸກກະຕານຳ້, ດອກບົວ ໄດ້ຮັບການວາງສະແດງຢ່າງສວຍງາມ. ພິເສດບັນດານັກສິນລະປິນທີ່ມາຈາກຫວຽດນາມ ໄດ້ສະແດງບັນດາບົດດົນຕີທີ່ເປັນມູນເຊື້ອ ດ້ວຍເຄື່ອງດົນຕີພື້ນເມືອງ, ອັນໄດ້ສ້າງບັນຍາກາດຟົດຟື້ນ ແລະ ດຶງດູດຜູ້ຊົມ. ກ່າວຄວາມເຫັນທີ່ພິທີເປີດ “ເຮືອນຫວຽດນາມ“, ທ່ານລັດຖະມົນຕີຊ່ວຍວ່າການກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມ ເລແຄ໋ງຫາຍ, ເນັ້ນໜັກວ່າ:
“ຂະແໜງທ່ອງທ່ຽວຫວຽດນາມ ຍາມໃດກໍ່ກຳນົດຝລັ່ງແມ່ນຕະຫຼາດຈຸດສຸມ. ແລະງານບຸນໜັງສືພິມມະນຸດສະທຳ ແມ່ນເຫດການທີ່ມີຄວາມໝາຍສຳຄັນທີ່ສຸດ, ປະກອບສ່ວນຊຸກຍູ້ການຮ່ວມມືດ້ານທ່ອງທ່ຽວລະຫວ່າງສອງປະເທດ. ນີ້ກໍ່ແມ່ນໂອກາດ ເພື່ອໃຫ້ພວກເຮົາຫວນຄືນໄລຍະທາງພັດທະນາລະຫວ່າງສອງປະເທດ, ມຸ່ງໄປສູ່ອະນາຄົດ, ດ້ວຍແງ່ຫວັງຮ່ວມມືທີ່ດີກວ່າ“.