(VOV ລົງນາມໃນຂໍ້ຕົກລົງຮ່ວມມືກັບສະຖາບັນ
ງານມະໂຫລານວິທະຍຸ - ໂທລະພາບກູບາ ຂອງກູບາ)
(vovworld) – ວັນທີ 9/9, ຄະນະຜູ້ແທນວິທະຍຸກະຈາຍສຽງຫວຽດນາມ (VOV) ໂດຍທ່ານ ຫງວຽນດັງຕ໋ຽນ, ຜູ້ອຳນວຍການໃຫຍ່ ເປັນຫົວໜ້າຄະນະໄດ້ເຂົ້າຮ່ວມພິທີໄຂງານມະໂຫລານວິທະຍຸ - ໂທລະພາບກູບາ 2013, ເຊິ່ງຈັດຂຶ້ນຢູ່ນະຄອນຫຼວງລາຮາວານ. ດ້ວຍຫົວຂໍ້ວ່າ: “ການກະທົບຂອງວິທະຍຸ - ໂທລະພາບສາທາລະນະເຖິງສັງຄົມ“. ງານມະໂຫລານມີການເຂົ້າຮ່ວມຂອງ 40 ກຸ່ມບໍລິສັດສື່ສານສາກົນ ແລະ ບັນດາວິທະຍຸ - ໂທລະພາບກູບາ ດ້ວຍຈຸດປະສົງເນັ້ນໜັກເຖິງບົດບາດຂອງສື່ສານ, ພິເສດແມ່ນຂອງວິທະຍຸ - ໂທລະພາບ ໃນຊີວິດທາງດ້ານການເມືອງ, ເສດຖະກິດ, ສັງຄົມຂອງແຕ່ລະປະເທດ ແລະ ເພີ່ມທະວີການຮ່ວມສຳພັນ ແລະ ຮ່ວມມືລະຫວ່າງບັນດາວິທະຍຸ - ໂທລະພາບ ແນໃສ່ຕອບສະໜອງດ້ານຂໍ້ມູນຂ່າວທີ່ນັບມື້ນັບເພີ່ມຂຶ້ນຂອງມະຫາຊົນ.
ໃນຂອບເຂດງານມະໂຫລານວິທະຍຸ - ໂທລະພາບກູບາ ຄັ້ງນີ້, VOV ໄດ້ລົງນາມໃນຂໍ້ຕົກລົງຮ່ວມມືກັບສະຖາບັນງານມະໂຫລານວິທະຍຸ - ໂທລະພາບກູບາ ຂອງກູບາ. ກ່າວຄຳເຫັນທີ່ພິທີ, ຜູ້ອຳນວຍການໃຫຍ່ VOV ຫງວຽນດັງຕ໋ຽນ ສະແດງຄວາມເຊື່ອໝັ້ນວ່າ, ຂໍ້ຕົກລົງນີ້ຈະຊ່ວຍເພີ່ມທະວີການພົວພັນຮ່ວມມືລະຫວ່າງສອງຝ່າຍໃນຂົງເຂດກະຈາຍສຽງ. ສ່ວນທ່ານ Guillermo Pavon Pacheco, ຮອງປະທານສະຖາບັນວິທະຍຸ - ໂທລະພາບ ກູບາ ຖືວ່າ, ການລົງນາມໃນຂໍ້ຕົກລົງຮ່ວມມືແມ່ນການເຄື່ອນໄຫວທີ່ມີຄວາມໝາຍ, ສ້າງພື້ນຖານໃຫ້ທັງສອງຝ່າຍສືບຕໍ່ການພົວພັນມິດຕະພາບ ແລະ ການຮ່ວມມືລະຫວ່າງສອງຝ່າຍ.