ທ່ານເລຂາທິການໃຫຍ່ ສປຊ Ban Ki moon ກ່າວຄຳເຫັນທີ່ກອງປະຊຸມ
(ພາບ: ສຳນັກຂ່າວສານຫວຽດນາມ)
(vovworld) – ວັນທີ 2/8, ສະພາຄວາມໝັ້ນຄົງ ສປຊ ໄດ້ຈັດຕັ້ງວາລະປະຊຸມປຶກສາຫາລືດ້ວຍຫົວຂໍ້ວ່າ “ເດັກນ້ອຍໃນການປະທະກັນດ້ວຍກຳລັງອາວຸດ”. ກ່າວຄຳເຫັນທີ່ວາລະປະຊຸມ, ທ່ານນາງ ເອກອັກຄະລັດຖະທູດ ຫງວຽນເຟືອງງາ, ຫົວໜ້າຄະນະຜູ້ຕາງໜ້າ ຫວຽດນາມ ປະຈຳ ສປຊ, ໄດ້ສະແດງຄວາມວິຕົກວັງວົນຕໍ່ບັນດາການກະທົບຍາວນານເຖິງການພັດທະນາຂອງເດັກນ້ອຍໃນ ແລະ ພາຍຫຼັງການປະທະກັນ. ທ່ານນາງຢັ້ງຢືນວ່າ: ຫວຽດນາມກ່າວປະນາມເລື່ອງສືບຕໍ່ເກີດສະພາບການໃຊ້ຄວາມຮຸນແຮງສຳລັບເດັກ, ພິເສດແມ່ນບັນດາກໍລະນີຄາດຕະກຳ, ການໃຊ້ຄວາມຮຸນແຮງທາງເພດສຳພັນ, ບັງຄັບເປັນທະຫານ, ລອກຈັບຕົວ, ບຸກໂຈມຕີໂຮງຮຽນ ແລະ ໂຮງໝໍ. ທ່ານນາງ ຫງວຽນເຟືອງງາ ຮຽກຮ້ອງໃຫ້ບັນດາຝ່າຍເຂົ້າຮ່ວມສູ້ຮົບຢຸດຕິການກະທຳນີ້, ກ່ອນອື່ນໝົດດ້ວຍການປະຕິບັດກົດໝາຍວ່າດ້ວຍສິດທິມະນຸດ ແລະ ມະນຸດສະທຳສາກົນ. ທ່ານນາງເອກອັກຄະລັດຖະທູດຢັ້ງຢືນວ່າ ຫວຽດນາມ ຈະສືບຕໍ່ຮ່ວມມືພ້ອມກັບປະຊາຄົມໂລກເພື່ອປົກປ້ອງ ແລະ ປັບປຸງສະພາບການຂອງເດັກນ້ອຍໃນການປະທະກັນດ້ວຍກຳລັງອາວຸດ. ທ່ານນາງ ຫງວຽນເຟືອງງາ ກໍ່ແບ່ງປັນວ່າ ລຸ່ນໜຸ່ມ ຫວຽດນາມ ພວມຕ້ອງແບກຫາບຜົນຮ້າຍຢ້ອນຫຼັງຈາກສົງຄາມທ່ີດຸເດືອດ, ຫວຽດນາມ ໄດ້ ແລະ ພວມມານະພະຍາຍາມຈົດສຸດຄວາມສາມາດເພື່ອປົກປ້ອງ, ເບິ່ງແຍງດູແລ ແລະ ຮັບປະກັນບັນດາເງື່ອນໄຂດີທີ່ສຸດໃຫ້ແກ່ເດັກນ້ອຍ, ພິເສດແມ່ນເດັກພິການເຊິ່ງແມ່ນຜູ້ປະສົບເຄາະຮ້າຍຈາກລູກລະເບີດຍັງບໍ່ທັນແຕກ ແລະ ທາດພິດສີສົ້ມ/ດີໂອຊິນ.